Read Biatah Bidayuh DITRONOMI 1 Bible Online

DITRONOMI 1 - Biatah Bidayuh bible

DITRONOMI 1

¹Darŭm surat ati inŭh pinganang Moses di sopŭrŭg daya Israel darŭm ngara di tarun tana-pajam di timor Yang Jordan. Ngara agi di Rubān Jordan sindŭk Suph, di asah kupo Paran di ndi parad ngga kupo kupo Tophel, Laban, Hazeroth, ngga Dizahab di parad mandi. (

²An simŭng ndi andu panu so Darŭd Sinai di ka Kadesh Barnea kadŭg rais tarun tana sandah Edom.)

³Di sibungas andu darŭm buran simŭng ndi, darŭm sawa adi pat puru ripas ngara bu so Egypt, Moses kidaan di daya Israel sopŭrŭg kayuh adi TUHAN ko pesan ayŭh da kidaan di ngara.

⁴ Anŭ inŭh ripas TUHAN[1] muko ngarah Sihon adi raja daya Amor, adi mritah di kupo Heshbon, ngga Og adi raja Bashan adi mritah di kupo Ashtaroth ngga kupo Edrei.

⁵Anŭ inŭh darŭm daya Israel di timor Yang Jordan di tarun tana Moab, Moses piguru kidaan rati ukum-adat ngga ajar Tapa. Ayŭh nang,

⁶“Darŭm ata gibabŭ di Darŭd Sinai, TUHAN adi Tapa ta nang di ata, ‘Angān mbŭh sukup tui rŭŭ di darŭd ati.

⁷Natas bari ka bipindah so ti. Di ka rais tarun tana sandah daya Amor ka sopŭrŭg tarun tana adi maning anŭ, ka Rubān Jordan, ka rais tarun tana sandah ngga rabak rabak, ka utung rais tura ka siratan, ngga tabing Rawŭt Mediterranean. Di ka tarun tana Canaan, mutas dudu darŭd Lebanon jeh ndŭg Yang Euphrates.

⁸Sopŭrŭg anŭ inŭh tarun tana adi Aku, adi TUHAN, mbŭh bijanji an nggen di babuk ngan Abraham, Isaac ngga Jacob, ka di bara sesang ngara. Panu meh ka ngisi tarun tana anŭ.’ ”

⁹Moses nang di bara daya, “Sitadŭn ata gibabŭ di Darŭd Sinai, aku agi kidaan di angān, ‘Pinanggong ku nguru angān agi raru bat di aku. Dŭh-i kayuh adi aku bisa sadi ndai.

¹⁰TUHAN adi Tapa ngan mbŭh bada angān raru bagŭ mun bitang di rangit.

¹¹Isa-i TUHAN, adi Tapa tayung-babuk ngan, bada angān bitambah siribu kari bagŭ ka mujur nimun adi muko-I janji!

¹²Pak simuki aku sadi re tungang nura pinanggong ngatur kaii ngan?

¹³Mien kada daya adi bijak, adi mirati, ka adi mbŭh pandai ndai kraja so barang tibaran-asar, ka aku re bada ngara tukang ngatur angān.’

¹⁴Angān mbŭh situju nang anŭ inŭh atur adi kana.

¹⁵Jadi aku tambit ngara adi bijak ka pinguru adi mbŭh pandai adi angān mien so tibaran tibaran-asar ngan, ka aku mbŭh bada ngara tukang ngatur angān. Kada ngara tukang ngatur siribu naan daya, kada siratus naan, kada rimŭh puru, ka kada simŭng naan. Aku tijuan gŭh pinurung yŭn barang tibaran-asar.

¹⁶“Di tipuh anŭ aku ngajar ngara. ‘Dingah nŭh kaii adi timbur di ruang bara daya ngan. Nyirase kaii ngga aran adi tŭnggŭn, bait-i dog ka daya adŭp ngan puan kah daya pinami adi rŭŭ di ruang ngan.

¹⁷Dŭhnyah marad kan matŭd itong. Ngatur sarah barang naan daya dŭh mien asi asi ngara. Dŭhnyah taru di tadŭ daya, amai pimatŭd itong ngan agi mandŭg so Tapa. Kambŭi agi har adi raru mbar angān ngatur, taban-i ka ku, ka aku re ngatur-i.’

¹⁸Nganŭ gŭh, aku agi nggen ajar yŭn sopŭrŭg kayuh bŭkŭn adi patut angān ndai.

¹⁹“Ata ndai anŭ adi TUHAN Tapa ta mbŭh pesan bada ata ndai. Ata bu tingge Darŭd Sinai ka panu mutas tarun tana-pajam adi bayah ka adi pitaru, nuju rais tarun tana sandah daya Amor. Kan ata mbŭh ndŭg Kadesh Barnea,

²⁰aku agi kidaan di angān, ‘Angān madin mbŭh ndŭg rais tarun tana sandah daya Amor, adi TUHAN Tapa ta, Tapa tayung-babuk ta, nggen di ata. Tingga, no rah-i. Panu ka ngisi-i nimun adi-I mbŭh pesan. Dŭhnyah gapang bait taru.’

²²“Pak angān agi mandŭg tudu aku ka nang, ‘Ja ata pait pinyiong diŭ so ata, isa ngara nyibatŭh tarun tana anŭ, isa ngara kidaan aran adi kana kadŭg ta buang munki kupo kupo diginŭ.’

²³“Anŭ sak kayuh adi kana ndai nŭh, jadi aku mien simŭng duwŭh naan daya, ndi naan so barang tibaran-asar.

²⁴Ngara matak ka rais tarun tana sandah jeh ndŭg Rubān Eshcol di pirasa-i.

²⁵Ngara tambit kada buwa kayuh so rais anŭ ngga mari ka kidaan nang tarun tana anŭ adi TUHAN adi Tapa ta nggen di ata agi raru mandis.

²⁶ “Pak angān rawan pesan TUHAN adi Tapa ngan, ka dŭh raan mŭrŭt tarun tana anŭ.

²⁷Angān mingungut dupan adŭp ngan: ‘TUHAN tiru di ata. Ayŭh taban ata ruah so Egypt batur ngga-I ton ata ka darŭm tangan bara daya Amor, isa ngara siŭ ata.

²⁸Mani ata sah mŭrŭt kamanŭ? Ata taru. Ngara adi pait ta kidaan di ata nang daya adi rŭŭ di tarun tana anŭ agi baga bigatung buang bake so ata, ka nang ngara rŭŭ darŭm kupo kupo adi bikuta bigatung ndŭg rangit. Ngara kiris grigasi diginŭ!’

²⁹“Pak aku nang di angān, ‘Dŭhnyah taru bara daya anŭ.

³⁰TUHAN adi Tapa ngan re nguru angān, ka re birawan yŭn ngan nimun adi muko angān kiris Ayŭh birawan yŭn ngan di Egypt,

³¹ ka di tarun tana-pajam. Angān muko kiris simuki Ayŭh nguru angān ngga siramat ndi aran aran ndŭg tarun ati, nimun sama daya kabis anak adŭp-i.’

³² Pak sunggu aku nang sakanŭ, angān babŭ dŭh sabah di TUHAN,

³³pŭn ka Ayŭh adi ari panu diŭ so angān jiroh tarun yŭn angān bibari. An kiren aran di angān, Ayŭh panu diŭ di jawin ngan darŭm tŭngŭn apui singarŭm, ka darŭm tŭngŭn abun sandu.

³⁴ “TUHAN dingah angān mingungut ka-I jadi baji, ka Ayŭh bipayu nang,

³⁵‘Ndi naan so angān so turap ati adi arap dŭh gŭh re mŭrŭt tarun tana mandis anŭ adi Aku ko bijanji an nggen di tayung-babuk ngan.

³⁶Adŭ-i Caleb anak Jephunneh adi bisa mŭrŭt kamanŭ. Ayŭh agi sawŭ tŭtŭd di Aku, ka Aku re nggen di ayŭh ngga di bara sesang-i tarun tana anŭ adi muko-i pirasa.’

³⁷Sitagar angān TUHAN baji gŭh di aku ka nang, ‘Kuu Moses, dŭh gŭh re mŭrŭt tarun tana anŭ.

³⁸Pak nyiriang atin pinurung mu, Joshua anak Nun. Ayŭh re nguru Israel ngisi tarun tana anŭ.’

³⁹“Komŭnŭ TUHAN nang di sopŭrŭg ta, ‘Bara anak ngan adi gibabŭ mara, adi gibayuh puan katŭn kayuh adi batur ngga adi sarah, re mŭrŭt tarun tana anŭ -- bara anak ngan adi nang ngan re dog nakap bara pinganyu ngan. Aku re nggen tarun tana anŭ di ngara, ka ngara re ngisi-i.

⁴⁰Pak adŭp ngan, bigiring ka pari di ka tarun tana-pajam kadŭg aran nuju Tanjung Aqaba.’

⁴¹“Angān nam, ‘Moses, kieh mbŭh bidosa rawan TUHAN. Pak madin kieh re nyerang nimun adi TUHAN Tapa ta mbŭh pesan di ata.’ Nganŭ barang naan angān mbŭh sidia re matak biperang, pikir sanang re nyerang rais tarun tana sandah anŭ.

⁴²“Pak TUHAN nang di aku, ‘Bakan ngara bada dŭhnyah nyerang, amai Aku dŭh re agi ngga ngara, ka pinganyu ngara re ngarah ngara.’

⁴³Aku kidaan di angān kayuh adi TUHAN mbŭh nang, pak angān dŭh piduri. Angān rawan Ayŭh, ka ngga atin sambuh ngan angān matak ka rais tarun tana sandah di biperang.

⁴⁴Nganŭ bara daya Amor adi rŭŭ di tarun tana sandah anŭ ruah di rawan angān mun dudu banyis. Ngara tadak angān ndŭg Hormah ka ngarah angān di rais tarun tana sandah Edom.

⁴⁵Ka angān nyirais mite turung so TUHAN, pak Ayŭh dŭh raan dingah angān, ka dŭh piduri angān.

⁴⁶“Ripas anŭ ata rŭŭ tui di Kadesh.