Read Biatah Bidayuh DITRONOMI 11 Bible Online

DITRONOMI 11 - Biatah Bidayuh bible

DITRONOMI 11

¹“Rindu TUHAN adi Tapa ngan ka ari tunda sopŭrŭg ukum adat-I.

²Ingat andu ati kayuh adi angān mbŭh birajar pasar TUHAN so ka kayuh adi angān mbŭh kinyam ngga so. Angān inŭh, dŭh-i bara anak ngan, adi mbŭh kinyam kayuh anŭ. Angān kiris bās TUHAN, kuasa-I, pinyibake-I,

³ ngga pingandai nginga-I. Angān mbŭh kiris kayuh adi mbŭh-I ndai di raja Egypt ngga di ndi tarun tana rais-i.

⁴ Angān mbŭh kiris munki TUHAN pirarap soldadu Egypt, samŭn kuda kuda ngga krita kuda ngara, bada rŭnggŭd di Rawŭt Bireh,[11] kan ngara tadak angān.

⁵Angān puan ani kayuh adi TUHAN mbŭh ndai yŭn ngan di tarun tana-pajam diŭ so angān ndŭg tarun ati.

⁶ Angān ingat kayuh adi mbŭh-I ndai di tunduh Dathan ngga Abiram, adi anak anak Eliab so tibaran-asar Reuben. Di sirung jawin sopŭrŭg daya, tana tikuka ka tŭrŭn ngara, samŭn rawang ngga bari bari ngga sopŭrŭg daya-gaji ka dāng kudip ngara.

⁷Sawŭ, angān inŭh adi mbŭh kiris sopŭrŭg kayuh bās anŭ adi TUHAN mbŭh ndai.

⁸“Tunda sopŭrŭg kayuh adi Aku mbŭh pesan di angān andu ati. Simŭnŭ angān dapŭd mutas yang anŭ ka ngisi tarun tana anŭ adi angān mbŭh re mŭrŭt.

⁹Angān re tui udip di tarun tana anŭ adi kaya ngga damŭn adi TUHAN mbŭh bijanji an nggen di tayung-babuk ngan ngga di bara sesang ngara.

¹⁰Tarun tana adi angān re ngisi dŭh mun tarun tana Egypt adi yŭn ngan muko rŭŭ dawŭ-i. Diginŭ, kan angān purun bine, angān an bandar bandar nyiraja ndai parit ngga tambit piin ka teya ngan.

¹¹Pak tarun tana adi angān re mŭrŭt inŭh tarun tarun tana darŭd ngga rubān, tarun tana adi dog misa ujen.

¹²TUHAN adi Tapa ngan kingat jaga tarun tana anŭ sitŭkŭd sawa.

¹³ “Ngapŭi, tunda sopŭrŭg pesan adi aku mbŭh nggen di angān andu ati; rindu TUHAN adi Tapa ngan ka bituan di Ayŭh ngga siabo abo atin ngan.

¹⁴Kambŭi angān ndai simŭnŭ, Ayŭh re pait ujen ka tarun tana ngan di tipuh ujen dog biguna, di tipuh jaya ngga di tipuh bunga, isa gandom, wain, ngga inyo kanā, agi yŭn guna ngan,

¹⁵ka kupai yŭn dāng kudip ngan. Angān re biyŭn sikiang kiang pinguman adi raan ngan.

¹⁶Dŭhnyah bada adŭp ngan miriseu so TUHAN ka nyambah ka bituan di tapa tapa adi bŭkŭn.

¹⁷Kambŭi angān ndai simŭnŭ, TUHAN re baji di angān. Ayŭh re bitan ujen, ka tana ngan re raru badŭh ndŭg ka kayuh adi purun ngan dŭh bisa timbu. Ka angān re kabŭs sikirau diginŭ, sunggu tarun tana anŭ raru kana adi nggen-I di angān.

¹⁸ “Ingat sopŭrŭg pesan anŭ ka na-i darŭm atin ngan. Mŭŭng-i di tangan ngan, ka na-i di arŭ ngan ndu pingingat.

¹⁹Ngajar-i di bara anak ngan. Kirakar pasar-i di tika angān di arŭn ka di tika angān panu ruah, di tika angān rŭŭ ka di tika angān nyiraja.

²⁰Nuris-i di uros tiban ramin ngan, ka di tiban buwang ramin ngan.

²¹Kambŭi angān ndai simŭnŭ, angān ngga bara anak ngan re tui udip di tarun tana adi TUHAN adi Tapa ngan mbŭh bijanji an nggen di tayung-babuk ngan. Angān re rŭŭ diginŭ sitian rangit babŭ agi di sambu tana.

²²“Tunda ngga atin tŭtŭd sopŭrŭg kayuh adi aku mbŭh pesan di angān: Rindu TUHAN adi Tapa ngan, ndai sopŭrŭg kayuh adi-I pesan, ka tŭtŭd di Ayŭh.

²³Komŭnŭ darŭm angān panu masang, Ayŭh re pibu sopŭrŭg bangsa anŭ, ka angān re ngisi tarun tana bangsa bangsa adi bās dŭ ka adi bikuasa dŭ so angān.

²⁴ Sopŭrŭg tarun tana adi angān kudak re jadi tung jangān. Buka tarun tana ngan re so tarun tana-pajam tura ka siratan jeh ndŭg Darŭd Darŭd Lebanon tura ka utara, ka so Yang Euphrates di timor jeh ndŭg Rawŭt Mediterranean di barat.

²⁵Kamaki maki angān panu di tarun tana anŭ, TUHAN adi Tapa ngan re bada daya taru di angān, nimun adi muko-I janji, ka mating daya re tungang pirŭŭ angān.

²⁶“Andu ati aku bada angān mien aki ndi, berkat kah pangu --

²⁷berkat, anŭ inŭh kambŭi angān tunda sopŭrŭg pesan TUHAN adi Tapa ngan adi aku nggen di angān andu ati;

²⁸pak pangu, anŭ inŭh kambŭi angān dŭh tunda sopŭrŭg pesan anŭ ka di nyambah tapa tapa adi bŭkŭn adi angān bŭn nyambah dawŭ-i.

²⁹ Kan TUHAN taban angān ka tarun tana adi angān re ngisi, angān an piagah berkat so Darŭd Gerizim ka pangu so Darŭd Ebal. (

³⁰So-duwŭh darŭd anŭ agi di tura ka barat Yang Jordan di tarun tana daya Canaan adi rŭŭ di gadung Rubān Jordan. Darŭd darŭd anŭ nura barat, dŭh jo so dudu tŭngŭn kayuh pirapu' Moreh sindŭk kupo Gilgal.)

³¹Angān madin mbŭh aŭn re mutas Yang Jordan ka ngisi tarun tana adi TUHAN adi Tapa ngan nggen di angān. Kan angān tambit-i ka rŭŭ diginŭ,

³²ingat nakit angān tunda sopŭrŭg ukum-adat adi aku nggen di angān andu ati.”