Read Biatah Bidayuh DITRONOMI 14 Bible Online

DITRONOMI 14 - Biatah Bidayuh bible

DITRONOMI 14

¹ “Angān inŭh daya TUHAN adi Tapa ngan. Jadi kan angān ngurid daya kabŭs, dŭhnyah nidi ganan ngan puan kah nundo bangap ngan, mun anŭ adi daya bŭkŭn ndai.

² Angān dog dapu TUHAN adi Tapa ngan; Ayŭh mbŭh mien angān bada jadi daya adŭp-I so dudu bangsa daya adi udip di ong.

³“Dŭhnyah man tadŭ tadŭ kayuh adi TUHAN mbŭh nang kais.

⁴Angān siŭn man dāng dāng ati: sapi, biri, kambing,

⁵peyu, biri tarun, kambing tarun, bait jerak;

⁶tadŭ tadŭ dāng adi tipire siruh tinjug-i buang adi ngunyai pinguman so kundi-i.

⁷Pak mating dāng siŭn dog man adŭ-i adi tipire siruh tinjug-i buang adi ngunyai pinguman so kundi-i. Angān dŭh siŭn man onta, rebit, puan kah dŭngŭn batuh. Dāng dāng anŭ dŭh siŭn dŭh dog nyirundeng kais; ngara ngunyai pinguman so kundi pak-i dŭh biyŭn siruh tinjug adi tipire.

⁸Dŭhnyah man ayo. Dāng anŭ dŭh siŭn dŭh dog nyirundeng kais. Dāng anŭ tipire siruh tinjug-i, pak dŭh ngunyai pinguman so kundi-i. Dŭhnyah man tadŭ tadŭ so dudu dāng anŭ, puan kah tama tadang-i.

⁹“Angān siŭn man tadŭ tadŭ masam iken adi bisirimed ngga adi bisisik,

¹⁰pak tadŭ tadŭ dāng adi udip darŭm piin adi dŭh bisirimed ngga bisisik dŭh siŭn dog man. Dāng anŭ kais.

¹¹“Angān siŭn man tadŭ tadŭ manuk adi bisig.

¹²Pak ati inŭh manuk manuk adi angān dŭh siŭn man: beuh, bo, beuh sise, kak, manuk gagak, manuk volcha, manuk camar, manuk onta, manuk iken rawŭt, bangau, manuk undan, manuk kosa, ka kadā.[12]

¹⁹“Sopŭrŭg anak kayuh piurad inŭh kais; dŭhnyah man-i.

²⁰Angān siŭn man kada-i adi bisig.[13]

²¹ “Dŭhnyah man tadŭ tadŭ dāng adi kabŭs sadi adŭp-i. Angān siŭn bada daya pinami adi rŭŭ di ruang ngan man-i, puan kah jua-i ka ngara adi bŭkŭn. Pak angān dog dapu TUHAN adi Tapa ngan. Angān daya-I. “Dŭhnyah tanŭk anak biri puan kah anak kambing darŭm sisuh nyindŭ-i.

²² “Nyidŭrŭ ndi utung-so-simŭng so buwa tana ngan barang sawa.

²³Komŭnŭ di ka tarun anŭ adi ndi adŭ adi TUHAN adi Tapa ngan mbŭh mien yŭn adŭp-I dog nyambah; ka diginŭ di sirung jawin-I man pinganggen ndi utung-so-simŭng anŭ so gandom, wain, ngga inyo kanā, ngga anak bungas sapi ngga biri ngan. Ndai simŭnŭ isa angān bisa birajar ari stabi di TUHAN adi Tapa ngan.

²⁴Kambŭi tarun adi yŭn bisambah mbŭh paŭh jo so arŭn ngan, adi ka angān taban pinganggen ndi utung-so-simŭng so buwa tana adi TUHAN mbŭh nggen di angān, ka nŭŭh ndai kayuh ati:

²⁵Jua buwa tana ngan ka taban rega-i di ka tarun yŭn anŭ adi ndi adŭ yŭn bisambah.

²⁶Pakai duit anŭ ngga miris tadŭ tadŭ kayuh adi raan ngan, mun dagin sapi, dagin anak biri, wain, ka nok adi bisā; ka diginŭ di sirung jawin TUHAN adi Tapa ngan, angān ngga bara rawang ngan siŭn man ka nyipawŭn adŭp ngan.

²⁷“Dŭhnyah dŭh rada bara daya Levi adi rŭŭ di kupo kupo ngan; ngara dŭh biyŭn buat-rata adŭp ngara.

²⁸Di tŭbŭn barang taruh sawa taban pinganggen ndi utung so simŭng so sopŭrŭg buwa pimuruh ngan ka nyikŭn-i di darŭm kupo kupo ngan.

²⁹Pinguman anŭ inŭh yŭn bara daya Levi amai ngara dŭh biyŭn buat-rata, ka gŭh yŭn daya pinami, anak tumang ka dayung uban adi rŭŭ di kupo kupo ngan. Ngara siŭn mandŭg ka tambit sikiang adi ngara biguna. Ndai simŭnŭ, ka TUHAN adi Tapa ngan re nyiberkat angān di sopŭrŭg kayuh adi angān ndai.