Read Biatah Bidayuh DITRONOMI 15 Bible Online

DITRONOMI 15 - Biatah Bidayuh bible

DITRONOMI 15

¹“Di tŭbŭn barang sawa adi ju angān an kinating utang utang ngara adi nginjam duit ngan.

²Simuti inŭh kayuh siŭn dog ndai. Barang naan so angān adi mbŭh nginjam duit di tadŭ tadŭ dingan ngan an kinating utang anŭ; angān dŭh siŭn nageh duit anŭ, amai adŭp TUHAN inŭh adi mbŭh kadŭn ka kinating utang anŭ.

³Angān bisa nageh kayuh adi daya pinami nginjam, pak angān dŭh siŭn nageh kayuh adi daya bangsa adŭp ngan nginjam so angān.

⁴“TUHAN adi Tapa ngan re nyiberkat angān di tarun tana adi-I nggen di angān. Ndi so angān mating gŭh re jadi sirata

⁵kambŭi angān tunda pinganang-I ka nakit sita sopŭrŭg kayuh adi aku pesan di angān andu ati.

⁶TUHAN re nyiberkat angān, nimun adi muko-I janji. Angān re nginjam duit di bagŭ bangsa, pak angān dŭh re nginjam so daya; angān re nguasa bagŭ bangsa, pak mating bangsa re nguasa angān.

⁷ “Kambŭi di tadŭ tadŭ kupo di tarun tana adi TUHAN adi Tapa ngan nggen di angān agi dingan ngan adi sutok, mba ngapŭh angān bidagis ka abah turung ngara.

⁸Angān patut turung ngara ka nginjam di ngara sikiang adi raan-i.

⁹Dŭhnyah angān, amai sawa adi ngga utang dog kinating mbŭh sindŭk, abah nginjam kayuh di ngara. Dŭhnyah bada pikir adi arap mun anŭ mŭrŭt atin ngan. Kambŭi angān abah, ngara re ngadu ka TUHAN, ka angān meh re sawŭ sarah.

¹⁰Nggen di ngara ngga sanang asŭng, ka TUHAN re nyiberkat angān di sopŭrŭg kayuh adi angān ndai.

¹¹ Taŭn re agi kada daya Israel adi sirata ka adi sutok, jadi aku pesan angān bada dŭhnyah bidagis ngga ngara.

¹² “Kambŭi tadŭ tadŭ dingan ngan, dari puan kah dayung jua adŭp-i[14] di angān yŭn jadi urun, angān an pirupas ayŭh kan ayŭh mbŭh nyiraja yŭn ngan sitŭkŭd nŭm sawa. Kan-i mbŭh sawa adi ju, angān dŭh siŭn dŭh pirupas ayŭh.

¹³Kan angān pirupas ayŭh, dŭhnyah bada ayŭh bu bŭrŭh-beyang.

¹⁴Nggen di ayŭh ngga sanang asŭng kayuh adi TUHAN mbŭh nggen di angān, mun biri, gandom, ka wain.

¹⁵Ingat adŭp ngan muko jadi urun di Egypt, ka TUHAN adi Tapa ngan mbŭh pirupas angān; anŭ inŭh sabab-i aku madin nggen di angān pesan ati.

¹⁶“Pak kadŭ urun ngan abah bu, amai ayŭh rindu angān ngga rawang ngan ka raan dŭ babŭ rŭŭ ngga angān.

¹⁷Kambŭi simŭnŭ taban ayŭh di ka tiban ramin ngan ka diginŭ tabŭk kajit-i, nŭ ka ayŭh bisa jadi urun ngan sitŭkŭd umbur-i. Simŭnŭ gŭh ngga urun ngan adi dayung.

¹⁸Dŭhnyah mingungut kan angān pirupas urun ngan; mŭnŭ mbŭh nŭm sawa gŭh ayŭh nyiraja yŭn ngan ngga sitangah gaji daya-gaji.[15] Ndai simŭnŭ, ka TUHAN adi Tapa ngan re nyiberkat angān di sopŭrŭg kayuh adi angān ndai.

¹⁹ “Nitah yŭn TUHAN adi Tapa ngan sopŭrŭg anak bungas dari sapi ngga anak bungas dari biri ngan; dŭhnyah bada tadŭ tadŭ sapi anŭ ndai kraja ngan ka dŭhnyah gutin buruh tadŭ tadŭ biri anŭ.

²⁰Barang sawa angān ngga rawang ngan an man-i di sirung jawin TUHAN di tarun yŭn anŭ adi ndi adŭ yŭn bisambah.

²¹Pak kambŭi agi kayuh kika di pŭrŭng dāng anŭ, bait-i bajang, puan kah karak, puan kah agi arap-i adi bŭkŭn adi mbŭh raru, dŭhnyah angān nyadis-i ka TUHAN adi Tapa ngan.

²²Angān siŭn man dāng dāng adi mun anŭ di arŭn ngan. Sopŭrŭg ngan bait-i adi bisig puan kah adi kais nanyam ka adat, bisa man dāng dāng anŭ nimun angān man peyu puan kah jerak.

²³ Pak dŭhnyah deya-i angān ndu pinguman; basen deya anŭ di tana mun angān basen piin.