Read Biatah Bidayuh DITRONOMI 19 Bible Online

DITRONOMI 19 - Biatah Bidayuh bible

DITRONOMI 19

¹ “Ripas TUHAN adi Tapa ngan mbŭh pirabur bangsa daya adi dapu tarun tana adi-I nggen di angān, ka ripas angān mbŭh tambit kupo kupo ngga ramin ramin ngara ka mbŭh bituku rŭŭ diginŭ,

²kutung nyitaruh tarun tana anŭ, ka barang utung an biyŭn ndi kupo adi udah dog tudu. Jadi daya adi ko siŭ daya bisa bu bisukan di tadŭ tadŭ kupo anŭ yŭn dapŭd pinyigrindung.

⁴Kambŭi angān tipasu siŭ daya adi dŭh pinganyu ngan, angān siŭn bu di bisukan di tadŭ tadŭ kupo anŭ di yŭn angān re siramat.

⁵Nyamtadar-i, kambŭi angān duwŭh naan biayo di ka tarun, ndu kayuh, ka darŭm ndi naan so angān aŭn bitabŭng ka ubak kapak rudos ka siŭ dingan ngan, angān siŭn bu di bisukan di ndi so kupo kupo anŭ taruh di yŭn angān re siramat.

⁶Kambŭi ndi adŭ kupo anŭ, ka kadŭ juan-i paŭh jo, ka madis sianŭ adi mbŭh kabŭs an maras dendam nyandat angān, ka darŭm baji tuas-i siŭ angān adi dŭh sarah. Amai sawŭ ngga dŭh singaja angān siŭ daya adi dŭh pinganyu ngan.

⁷Anŭ inŭh sabab aku bada angān nitah taruh kupo.

⁸“Kan TUHAN adi Tapa ngan nambah tarun tana ngan bada bayah, nimun adi-I mbŭh kidaan di tayung-babuk ngan, ka nggen gŭh di angān sopŭrŭg tarun tana anŭ adi Ayŭh mbŭh bijanji,

⁹angān an mien taruh kupo dinge. (Ayŭh taŭn an nggen tarun tana anŭ kambŭi angān ndai sopŭrŭg kayuh adi aku pesan di angān andu ati, ka kambŭi angān rindu TUHAN adi Tapa ngan ka udip nanyam ka ajar-I.)

¹⁰Ndai simŭnŭ, isa daya adi dŭh sarah dŭh kabŭs, ka isa angān dŭh gŭh sarah sitagar daya dog siŭ darŭm tarun tana adi TUHAN nggen di angān.

¹¹“Pak nyamtadar-i, angān singaja siŭ daya ngga baji tuas, ka rasu bu bisukan di tadŭ tadŭ kupo anŭ yŭn dog grindung.

¹²Di har anŭ, pinguru pinguru kupo adŭp ngan siŭn bada angān dog tambit ka dog nyerah ka bara madis sianŭ adi angān ko siŭ, siŭn ngara maras dendam. Simŭnŭ angān dog ukum kabŭs.

¹³Re mating pinyirasi di angān. Israel dŭh siŭn dŭh dog pibisig so bara pinyiŭ, isa angān udip darŭm sanang.

¹⁴ “Dŭhnyah sigen tandā baat tana dingan ngan, adi mbŭh tui muko dog ngŭtŭ di tarun tana adi TUHAN adi Tapa ngan nggen di angān.

¹⁵ “Ndi naan saksi dŭh-i sadang ngga natu daya sawŭ sarah; an sikurang kurang-i duwŭh naan saksi adi bisa natu daya sawŭ sarah.

¹⁶Kambŭi agi daya amai an kandam dingan-i ka napŭ dingan-i,

¹⁷ngara duwŭh dŭh siŭn dŭh di ka tarun yŭn anŭ adi ndi adŭ yŭn bisambah ka diginŭ bisara di sirung jawin imam puan kah akim adi aŭn kŭkŭn kraja-i di tipuh anŭ.

¹⁸Bara akim re nakit nyuki ka pirasa har ngara; ka kambŭi sianŭ dog dapŭd napŭ dingan-i,

¹⁹ayŭh siŭn kambat ukum sianŭ adi dog napŭ sarah. Simŭnŭ inŭh bangsa ngan bisa taran arap adi mun anŭ.

²⁰Barang naan daya re dingah kayuh adi mbŭh jadi, ka re jadi taru, ka mating daya re tia birani ndai arap adi mun anŭ.

²¹ Di har adi mun anŭ dŭhnyah kiren masi; ukum anŭ inŭh asŭng gati asŭng, batŭh gati batŭh, jipŭh gati jipŭh, tangan gati tangan, ka kaja gati kaja.”