Read Biatah Bidayuh DITRONOMI 2 Bible Online

DITRONOMI 2 - Biatah Bidayuh bible

DITRONOMI 2

¹ Pinŭbŭn-i ata matak ka panu pari ka tarun tana-pajam kadŭg aran adi nuju Tanjung Aqaba, nimun adi TUHAN ko pesan, ka raru tui ata bigandon di rais tarun tana sandah Edom.

²“Komŭnŭ TUHAN kidaan di aku,

³nang ata mbŭh sukup tui bigandon di sandah sandah anŭ ka ata mbŭh patut matak nuju utara.

⁴ Ayŭh kidaan di aku da nggen di angān atur ati: ‘Angān mbŭh re panu mutas rais tarun tana sandah Edom, tarun tana madis-jo ngan adi bara sesang Esau. Ngara re taru di angān,

⁵pak angān dŭhnyah biperang ngga ngara, sabab Aku dŭh re nggen di angān tana ngara, ndi mita misagi dŭh gŭh. Aku mbŭh nggen Edom di bara sesang Esau.

⁶Angān bisa miris pinguman ka piin so ngara.’

⁷“Ingat munki TUHAN adi Tapa ngan mbŭh nyiberkat angān darŭm sopŭrŭg kayuh adi angān ndai. Ayŭh mbŭh kingat angān sitadŭn angān bigandon di tarun tana-pajam ati adi raru bayah. Ayŭh agi ngga angān sitadŭn pat puru sawa, ka angān mbŭh biyŭn sopŭrŭg kayuh adi angān biguna.

⁸“Jadi ata pijuu pimanu ta ka tingge aran adi so kupo kupo Elath ngga Eziongeber di ka Rawŭt Pide, ka biruit ka utara-timor nuju Moab.

⁹ TUHAN nang di aku, ‘Dŭhnyah mito daya Moab adi sesang Lot, puan kah biperang rawan ngara. Aku mbŭh nggen di ngara kupo Ar, ka Aku dŭh re nggen di angān tadŭ tadŭ so tana ngara.’ ” (

¹⁰Agi ndi bangsa grigasi adi raru bake dŭn Emim ko dawŭ-i rŭŭ di kupo Ar. Ngara anŭ bigatung mun daya Anak, bangsa grigasi gŭh.

¹¹Mun daya Anak ngara dog kadŭn Rephaim gŭh; pak bara daya Moab kadŭn ngara daya Emim.

¹²Bara daya Hori ko dawŭ-i rŭŭ di Edom, pak bara sesang Esau pibu ngara, pirabur bangsa ngara, ka rŭŭ diginŭ, mun bara daya Israel ripas anŭ pibu bara pinganyu ngara so tarun tana adi TUHAN mbŭh nggen di ngara.)

¹³“Komŭnŭ ata mutas Yang Zered nanyam adi TUHAN ko kidaan di ata.

¹⁴ Nganŭ mbŭh 38 sawa ripas ata bu tingge Kadesh Barnea. Sopŭrŭg dari adi tungang biperang so turap anŭ mbŭh kabŭs, nimun adi TUHAN ko diŭ nang.

¹⁵TUHAN uris uris rawan ngara ndŭg ka Ayŭh mbŭh kubo pirarap ngara.

¹⁶“Ripas ngara mbŭh abo kabŭs,

¹⁷TUHAN nang di ata,

¹⁸‘Andu ati angān re mutas tarun tana Moab so ka Ar.

¹⁹ Angān re sindŭk tarun tana daya Ammon, adi bara sesang Lot. Dŭhnyah mito ngara bait biperang rawan ngara, sabab Aku dŭh re nggen di angān tadŭ tadŭ tana adi Aku ko nggen di ngara.’ ” (

²⁰Abong tarun tana anŭ dog kadŭn gŭh tarun tana daya Rephaim, nunda dŭn bara daya adi ko rŭŭ diginŭ; bara daya Ammon kadŭn ngara daya Zamzummim.

²¹Ngara bigatung mun daya Anakim. Ngara bagŭ, ka ngara bangsa adi bake. Pak TUHAN pirarap ngara, isa bara daya Ammon tambit tana ngara ka rŭŭ dieh.

²²TUHAN mbŭh ndai simŭnŭ gŭh yŭn daya Edom, adi sesang Esau, adi rŭŭ di rais tarun tana sandah Edom. TUHAN pirarap daya Hor, isa daya Edom bisa tambit tarun tana ngara ka rŭŭ diginŭ ndŭg andu ati.

²³Tarun tana adi di bŭngŭn Rawŭt Mediterranean mbŭh dog ngisi daya so purau Crete. Ngara muko pirarap daya Awim adi tibirik daya-asar tarun tana anŭ, ka mbŭh tambit tarun tana ngara ndŭg kupo Gaza jeh di siratan.)

²⁴“Ripas ata ko mutas Moab, TUHAN kidaan di ata, ‘Madin, matak meh di mutas Yang Arnon. Aku na di ribo kuasa ngan Sihon daya Amor adi raja so Heshbon samŭn tarun tana-i. Nyerang ayŭh, ka piguru ngisi tarun tana-i.

²⁵Piguru so andu ati, Aku re bada daya di barang yŭn-i taru di angān. Barang naan daya re kimŭtŭr taru kan dŭn ngan dog nyabŭt.’

²⁶“Komŭnŭ aku pait bara pinyisung so tarun tana-pajam Kedemoth ka yŭn Raja Sihon di Heshbon ngga pinganang ngaja bidamai:

²⁷‘Nyibandar kieh mutas rais mu. Kieh re panu radus adŭ ka dŭh re miriseu so aran raya.

²⁸Kieh re bayar pinguman adi kieh man, ka piin adi kieh nok. Kaŭs kayuh adi kieh raan inŭh mutas rais mu,

²⁹ndŭg ka kieh mutas Yang Jordan ka mŭrŭt tarun tana adi TUHAN adi Tapa ami nggen di kieh. Bara sesang Esau adi rŭŭ di Edom, ngga daya daya Moab adi rŭŭ di Ar, mbŭh nyibandar kieh panu mutas tarun tana ngara.’

³⁰“Pak Raja Sihon abah bada ata mutas rais-i. TUHAN adi Tapa ngan mbŭh bada ayŭh baking buang abah dingah pinganang, isa ata tungang ngarah ayŭh ka tambit tarun tana-i, adi ata taŭn babŭ ngisi.

³¹“Komŭnŭ TUHAN nang di aku, ‘Tingga, Aku mbŭh na Raja Sihon ngga tarun tana-i ka darŭm kuasa ngan; tambit tana-i ka ngisi-i.’

³²Sihon ruah ngga sopŭrŭg bara soldadu-i di rawan ata sindŭk kupo Jahaz,

³³pak TUHAN adi Tapa ta na ayŭh di ribo kuasa ta, ka ata siŭ ayŭh, bara anak dari-i, ka sopŭrŭg soldadu-i.

³⁴Nganŭ gŭh ata sirabut ka pirabur barang kupo ka siŭ barang naan daya, dari dayung samŭn anak-anya. Ndi naan mating gŭh ata kidŭm.

³⁵Ata tambit dāng dāng kudip ngara ka mirupak kupo kupo ngara.

³⁶TUHAN adi Tapa ta bada ata nyerang ka tambit sopŭrŭg kupo piguru so Aroer di bŭngŭn Rubān Arnon, ngga kupo anŭ adi di yun rubān anŭ, jeh ndŭg Gilead. Mating kupo adi biyŭn sindung adi dŭh ata tungang pirusak.

³⁷Pak ata dŭh di nyindŭk tarun tana daya Ammon, puan kah ka tabing Yang Jabbok, puan kah ka kupo kupo di rais tarun tana sandah, puan kah ka tadŭ tadŭ tarun bŭkŭn adi TUHAN adi Tapa ta dŭh pesan ata bada di.