Read Biatah Bidayuh DITRONOMI 20 Bible Online

DITRONOMI 20 - Biatah Bidayuh bible

DITRONOMI 20

¹“Kan angān matak di biperang rawan pinganyu ngan ka kiris dudu krita kuda ngga dudu kuda ka bara soldadu adi bās dŭ so tung adŭp ngan, dŭhnyah taru ngara, TUHAN adi Tapa ngan adi piruah angān so Egypt re agi ngga angān.

²Diŭ so angān piguru biperang, ndi naan imam siŭn mandŭg di ka jawin ka nang di bara soldadu ngan,

³‘Bara daya Israel, dingah! Andu ati angān re biperang. Dŭhnyah taru di bara pinganyu ngan, bait ramah simangi, puan kah kandang-kandŭ taru.

⁴TUHAN adi Tapa ngan re matak ayō angān, ka Ayŭh re nggen di angān pimanang.’

⁵“Komŭnŭ bara pingubak soldadu re minyu ngga bara soldadu-i, nang, ‘Agi kah daya digiti adi muran ko pijog ramin-i, pak gibayuh man siramat ramin-i anŭ? Kambŭi agi, ayŭh siŭn mari. Amai sibia ayŭh kabŭs dog siŭ darŭm perang, daya bŭkŭn meh re man siramat ramin-i anŭ.

⁶Agi kah daya digiti adi muran ko ndai teya anggor-i, pak gibayuh tungang ngatŭm buwa-i? Kambŭi agi, ayŭh siŭn mari ka arŭn-i. Amai sibia ayŭh kabŭs darŭm perang, daya bŭkŭn meh re dapŭd utung so buwa anŭ.

⁷Agi kah daya digiti adi muko bitunang yŭn re sawan? Kambŭi agi, ayŭh siŭn maad ka arŭn-i. Amai sibia ayŭh kabŭs darŭm perang, daya bŭkŭn meh re sawŭn tunang-i.’

⁸“Bara pingubak gŭh re nang di bara soldadu-i, ‘Agi kah digiti daya adi mbŭh ramah simangi-i buang taru? Kambŭi agi, ayŭh siŭn maad ka arŭn-i. Amai kambŭi dŭh, ayŭh re bada bara adi bŭkŭn ramah simangi gŭh.’

⁹Kan bara pingubak muko minyu di bara soldadu, bara pinguru an dog mien gŭh yŭn barang tibaran.

¹⁰“Darŭm angān masang re nyerang kupo, angān siŭn diŭ nggen pluang di daya kupo anŭ bada nyerah adŭp-i.

¹¹Kambŭi ngara kuka tiban kupo ka nyerah adŭp-i, ngara sopŭrŭg re jadi urun ngan ka adi re angān takan da ndai kraja yŭn ngan.

¹²Pak kambŭi daya di kupo anŭ dŭh raan nyerah adŭp-i, ka raan dŭ birawan, kirurung kupo anŭ ngga bara soldadu ngan.

¹³Ka kan TUHAN adi Tapa ngan bada angān nyerang kupo anŭ, siŭ sopŭrŭg dari darŭm kupo anŭ.

¹⁴Angān siŭn tambit yŭn adŭp ngan bara dayung, anak-anya, dāng kudip, ka barang kayuh adi darŭm kupo anŭ. Angān siŭn pakai barang kayuh adi dog dapu pinganyu ngan. TUHAN mbŭh nggen-i di angān.

¹⁵Simŭnŭ inŭh angān patut ndai di kupo kupo anŭ adi jo so tarun tana adi re yŭn ngan rŭŭ.

¹⁶“Pak kan angān sirabut kupo kupo adi darŭm tarun tana adi TUHAN adi Tapa ngan nggen di angān, siŭ barang naan daya.

¹⁷Pirarap sopŭrŭg daya: daya Hitti, daya Amor, daya Canaan, daya Periz, daya Hivi, ka daya Jebus, nimun adi TUHAN mbŭh mritah angān bada ndai.

¹⁸Siŭ ngara, isa ngara dŭh bada angān bidosa rawan TUHAN, anŭ inŭh ngajar angān ndai sopŭrŭg kayuh adi sipŭ anŭ adi ngara ndai kan ngara nyambah tapa tapa ngara.

¹⁹“Kan angān suba sirabut kupo, dŭhnyah tabŭng tŭngŭn tŭngŭn pimuruh, sunggu bait kani angān raru tui nyikapung kupo anŭ. Man buwa-i, pak dŭhnyah pirusak tŭngŭn-i; tŭngŭn tŭngŭn pimuruh anŭ dŭh pinganyu ngan.

²⁰Angān siŭn tabŭng tŭngŭn tŭngŭn kayuh bŭkŭn ka pakai-i ngga nyikapung kupo anŭ ndŭg ka angān mbŭh dapŭd sirabut-i.