Read Biatah Bidayuh DITRONOMI 21 Bible Online

DITRONOMI 21 - Biatah Bidayuh bible

DITRONOMI 21

¹“Nyamtadar ndi naan daya dog dapŭd kabŭs dog siŭ di sapa tarun darŭm tana adi TUHAN adi Tapa ngan nggen di angān, ka angān dŭh puan asi siŭ ayŭh.

²Bara pinguru ngga akim akim ngan an ruah ka ngŭkŭd juan so yŭn tadang anŭ ngga barang kupo adi maning arong anŭ.

³Komŭnŭ, bara pinguru so kupo adi siabo sindŭk so tarun yŭn tadang anŭ dog dapŭd, an mien ndi anak sapi adi bŭn dog pakai da ndai kraja.

⁴Ngara an taban anak sapi anŭ ka ndi tarun yŭn sindŭk sungi adi dŭh bisa badŭh, ka di yŭn tana adi bŭn dog majak ka bŭn gŭh kayuh dog purun dieh, ka diginŭ ngara siŭn mata tungo dāng anŭ.

⁵Imam imam so asar Levi an sua di ka tarun anŭ, amai ngara anŭ inŭh adi ngatur har bisara adi bigagit ngga pinyiganas ngga pinyiŭ. TUHAN adi Tapa ngan mbŭh mien ngara da ndai kraja yŭn-I ka nyiberkat daya ngga adŭn-I.

⁶Komŭnŭ sopŭrŭg pinguru so kupo anŭ adi siabo sindŭk so tarun adi yŭn tadang daya anŭ dog dapŭd an ngu tangan ngara nyirungan sapi anŭ

⁷buang nang, ‘Kieh mating siŭ daya ati, ka kieh dŭh gŭh puan asi siŭ ayŭh.

⁸TUHAN, apun daya Mai Israel, adi Kaam mbŭh piruah so Egypt. Apun kieh ka dŭhnyah bada kieh dapu tanggong di pinyikabŭs daya adi dog siŭ dŭh biyŭn sarah.’

⁹Amai angān ndai nimun adi TUHAN raan, angān dŭh re dapu tanggong di pinyikabŭs daya anŭ adi dog siŭ.

¹⁰“Kan TUHAN adi Tapa ngan nggen di angān pimanang darŭm perang ka angān nakap pinganyu ngan,

¹¹ka kadŭ angān kiris dayung adi ramus adi angān suka ka raan tambit ayŭh ndu sawŭn.

¹²Taban ayŭh ka ramin ngan, di yŭn-i re gumbak ubok-i,[20] kapŭg siruh-i,

¹³ka nyambi piraka-i. Ayŭh an rŭŭ di arŭn ngan ka ngurid pimas pimas-i ndi buran; ripas anŭ angān siŭn sawŭn ayŭh.

¹⁴Komŭnŭ, kambŭi angān mbŭh dŭh tia siŭt ayŭh, angān bisa pirupas ayŭh. Amai angān mbŭh takan ayŭh da nyibŭŭs ngga adŭp ngan, angān dŭh siŭn bada ayŭh mun daya urun ka jua ayŭh.

¹⁵“Nyamtadar-i ndi naan daya biyŭn duwŭh sawŭn, ka so-duwŭh ngara biranak yŭn-i anak anak dari, pak anak pinuai dari dŭh so dayung adi-i rindu dŭ.

¹⁶Kan daya anŭ ndai pikir-i simuki ayŭh re kutung buat rata-i di dupan bara anak-i, ayŭh dŭh siŭn marad di pingatur-i di anak adi so sawŭn adi-i raru suka ka nggen di anak anŭ utung rata adi taŭn mbŭh tah anak pinuai.

¹⁷Ayŭh siŭn nggen duwŭh rupet utung di anak pinuai dari-i, saja ayŭh dŭh so sawŭn adi-i rindu dŭ. Daya anŭ dŭh siŭn dŭh an puan anŭ anak pinuai dari-i ka nggen di ayŭh utung adi taŭn mbŭh hak-i.

¹⁸“Nyamtadar ndi naan daya biyŭn ndi anak dari adi baking ka an birawan, anak adi an nyibireu piminyu pinganang pimas-i, pŭn ari dog kijera pimas-i.

¹⁹Pimas-i an taban ayŭh ka yŭn pinguru pinguru kupo di yŭn-i rŭŭ ka bada ayŭh dog bisara.

²⁰Ngara an nang di pinguru pinguru anŭ, ‘Anak ami baking, an birawan ka abah dingah pinganang ami; ayŭh nyiraba duit ka pimabuk.’

²¹Komŭnŭ bara dari so kupo anŭ siŭn manjan ayŭh ngga batuh ndŭg kabŭs, ngga simŭnŭ angān re tungang kadi arap adi mun anŭ. Barang naan daya di Israel re dingah kayuh adi mbŭh jadi ka re jadi taru.

²²“Kambŭi ndi naan daya dog nggen ukum kabŭs amai kraja pingandai adi raru sarah ka pŭrŭng-i dog kideng di tiang,

²³ tadang anŭ dŭh siŭn babŭ diginŭ ripuan ndi ngarŭm. Ayŭh dŭh siŭn dŭh dog kubur di andu anŭ gŭh, sabab tadang daya adi bikideng di tiang taban pangu Tapa di tarun tana anŭ. Kubur tadang daya anŭ isa angān dŭh nyembar tarun tana adi TUHAN nggen di angān.