Read Biatah Bidayuh DITRONOMI 24 Bible Online

DITRONOMI 24 - Biatah Bidayuh bible

DITRONOMI 24

¹ “Nyamtadar-i ndi naan daya sawŭn ndi naan dayung, ka dŭh tui ripas anŭ ayŭh matŭd pikir-i dŭh raan dayung anŭ, sabab ayŭh mbŭh puan kayuh adi dŭh-i suka pasar dayung anŭ.[21] Jadi ayŭh nuris surat birakang ka nggen-i di dayung anŭ, ka pibu ayŭh so ramin-i.

²Ka nyamtadar-i, dayung anŭ banan, banŭh dari bŭkŭn,

³ka dari anŭ gŭh matŭd pikir-i dŭh raan ayŭh, ka nuris gŭh surat birakang, nggen di ayŭh ka pibu ayŭh so ramin-i. Ka nyamtadar-i gŭh banŭh-i adi numbor duwŭh kabŭs.

⁴Di so-duwŭh har anŭ, banŭh dayung anŭ adi sibungas dŭh siŭn sawŭn ayŭh dinge. Ayŭh siŭn nyirundeng dayung anŭ mbŭh sembar. Kambŭi ayŭh sawŭn ayŭh dinge, anŭ mbŭh kayuh adi nggen mangŭh di TUHAN. Angān dŭh siŭn ndai dosa adi sipŭ mun anŭ di tarun tana adi TUHAN adi Tapa ngan nggen di angān.

⁵“Kan dari gi-bauh ko sawan, ayŭh dŭh siŭn dog pibŭrŭt bada jadi soldadu, puan kah tadŭ tadŭ kraja daya ratus; ayŭh patut dog pirupas so ndai kraja sitian ndi sawa; isa-i bisa rŭŭ di arŭn ka pigaŭn sawŭn-i.[22]

⁶“Kan angān nginjam kayuh di daya, angān dŭh siŭn tambit kisar batuh-i adi ngga-i ngisar gandom-i ndu jamen. Amai kambŭi simŭnŭ, angān mbŭh tambit so rawang anŭ pimakai adi ngga ngara ndai pinguman adi ngga ngara kudip adŭp-i.

⁷ “Kambŭi angān nakap dingan ngan adi samah daya Israel bada jadi urun puan kah jua bada jadi urun, angān dŭh siŭn dŭh dog ukum kabŭs. Simŭnŭ inŭh angān taran arap adi mun anŭ.

⁸ “Kan angān naman andam kurit adi bisā, angān dŭh siŭn dŭh ndai nimun adi bara imam so asar Levi mbŭh kidaan di angān. Tunda atur adi aku mbŭh nggen di ngara.

⁹ Ingat kayuh adi TUHAN adi Tapa ngan ndai di Miriam darŭm angān mandŭg so Egypt.

¹⁰ “Kan angān nginjam kayuh ngan di daya, dŭhnyah mŭrŭt arŭn-i di tambit jipo adi-i re nggen di angān ndu jamen;

¹¹kajŭn di sapa ka tandah ayŭh taban-i ka yŭn ngan.

¹²Kambŭi ayŭh daya sirata, dŭhnyah nyikŭn-i ndŭg ripuan ngarŭm.

¹³Pari jipo anŭ barang ngumi, isa agi ngga-i sitabun bŭŭs singarŭm. Simŭnŭ ayŭh re raru sanang asŭng di angān, ka TUHAN adi Tapa ngan re munos asŭng-I di angān.

¹⁴ “Dŭhnyah ngakar daya-gaji adi sirata ka adi sutok bagŭ kayuh, bait-i daya Israel puan kah daya pinami adi rŭŭ darŭm ndi so dudu kupo ngan.

¹⁵Barang andu diŭ so batŭh andu simŭdŭp bayar gaji ngara yŭn kraja adi ngara ndai di andu anŭ; ngara biguna di duit anŭ ka taŭn mbŭh harap adŭp-i re trima-i. Kambŭi angān dŭh bayar ngara, ngara re sien ngadu angān ka TUHAN, ka angān meh re bidosa amai sarah ngan anŭ.

¹⁶ “Pimas daya dŭh siŭn dog ukum kabŭs sabab sarah adi dog ndai anak ngara; ka anak-anya dŭh siŭn dog ukum kabŭs sabab sarah adi dog ndai pimas ngara; daya siŭn dog ukum kabŭs adŭ-i yŭn sarah adi adŭp-i mbŭh ndai.

¹⁷ “Dŭhnyah sirapas hak daya pinami ngga hak bara anak tumang; ka dŭhnyah gŭh tambit piraka dayung uban ndu jamen duit adi-i nginjam.

¹⁸Ingat adŭp ngan muko jadi urun di Egypt ka TUHAN adi Tapa ngan mbŭh pirupas angān; anŭ sabab aku mbŭh nggen di angān pesan ati.

¹⁹ “Kan angān sun buwa buwa pimuruh ngan, ka kambŭt taban kada-i, dŭhnyah pari di tambit-i; tandah nŭh adŭ yŭn bara daya pinami, anak tumang, ngga dayung uban; isa TUHAN adi Tapa ngan nyiberkat angān di sopŭrŭg kayuh adi ndai ngan.

²⁰Kan angān muko ndi sidah ndu buwa kanā ngan, dŭhnyah pari di ndu tadŭh-i; anŭ mbŭh tah tung daya pinami, anak tumang ngga bara dayung uban.

²¹Kan angān muko ndi sidah ndu buwa anggor ngan, dŭhnyah pari ka teya anggor di sun buwa adi dog tingge; anŭ mbŭh tah tung daya pinami, anak tumang, ngga bara dayung uban.

²²Dŭhnyah kambŭt adŭp ngan muko jadi urun di Egypt; anŭ sabab aku nggen pesan anŭ di angān.