Read Biatah Bidayuh DITRONOMI 28 Bible Online

DITRONOMI 28 - Biatah Bidayuh bible

DITRONOMI 28

¹ “Kambŭi angān tunda pinganang TUHAN adi Tapa ngan buang tŭtŭd sita sopŭrŭg pinyipesan-I adi aku nggen di angān andu ati, Ayŭh re bada angān rabis bās so tadŭ tadŭ bangsa adi bŭkŭn adi di ong ati.

²Tunda pinganang TUHAN adi Tapa ngan ka sopŭrŭg berkat ati re jadi tung jangān:

³“TUHAN re nyiberkat kupo ngga ŭmŭh ngan.

⁴“TUHAN re nyiberkat angān bada biyŭn bagŭ anak, bada buwa pimuruh ngan bagŭ, ka bada sapi ngga biri ngan bagŭ.

⁵“TUHAN re nyiberkat buwa gandom ngan samŭn pinguman adi angān ndai so gandom anŭ.

⁶“TUHAN re nyiberkat sopŭrŭg kayuh adi angān ndai.

⁷“TUHAN re ngarah bara pinganyu ngan kan ngara nyerang angān. Ngara re nyerang angān so ndi parad, pak ngara re bu so barang parad.

⁸“TUHAN adi Tapa ngan re nyiberkat sopŭrŭg kraja pingandai ngan, ka ngisi panggau ngan ngga gandom. Ayŭh re nyiberkat angān di tarun tana adi Ayŭh nggen di angān.

⁹“Kambŭi angān tunda pinganang TUHAN adi Tapa ngan ka ndai sopŭrŭg kayuh adi Ayŭh pesan, Ayŭh re bada angān jadi daya adŭp-I nanyam ka adi-I muko janji:

¹⁰Komŭnŭ sopŭrŭg bangsa di ong re kiris angān mbŭh dog mien TUHAN bada jadi daya adŭp-I ka ngara re taru di angān.

¹¹TUHAN re bada angān biyŭn bagŭ anak, bagŭ dāng kudip, ka bagŭ buwa pimuruh di tana adi mbŭh-I bijanji ngga tayung-babuk ngan an nggen di angān.

¹²Ayŭh re pait ujen di tipuh-i so yŭn pinyirikŭn-I di rangit ka nyiberkat sopŭrŭg kraja pingandai ngan, isa angān dapŭd nginjam ka bagŭ bangsa, pak angān dŭhsah nginjam so tadŭ tadŭ ngara.

¹³TUHAN adi Tapa ngan re bada angān jadi pinguru di dupan sopŭrŭg bangsa, ka dŭh jadi pinunda; angān re ari mujur ka bŭn re rabu kambŭi angān tŭtŭd tunda sopŭrŭg pinyipesan-I adi aku nggen di angān andu ati.

¹⁴Pak angān sikari kari dŭhnyah nyibireu sopŭrŭg pinyipesan-I, puan kah nyambah ka bituan di tapa tapa adi bŭkŭn.

¹⁵“Pak kambŭi angān nyibireu TUHAN adi Tapa ngan ka dŭh tŭtŭd sita sopŭrŭg pesan ngga ukum adat-I adi aku nggen di angān andu ati, sopŭrŭg kayuh arap ati re nyatŭk angān.

¹⁶“TUHAN re mangu kupo kupo ngan ngga ŭmŭh ngan.

¹⁷“TUHAN re mangu buwa buwa gandom ngan, ngga pinguman adi ndai ngan so gandom anŭ.

¹⁸“TUHAN re mangu angān bada dŭh biyŭn bagŭ anak, dŭh biyŭn bagŭ buwa pimuruh, ka dŭh biyŭn bagŭ sapi ngga biri.

¹⁹“TUHAN re mangu barang kayuh adi angān ndai.

²⁰“Kambŭi angān ndai kayuh adi arap ka nyipunok TUHAN, Ayŭh re taban ka angān pinyirusag, pinyiriruk, ngga pinyusah di barang kayuh adi angān ndai, ndŭg ka angān rasu rarap dog pirabur.

²¹Ayŭh re pait andam bigati gati ka angān ndŭg ka ndi naan mating gŭh angān re dŭm di tarun tana anŭ adi angān re ngisi.

²²TUHAN re ngukum angān ngga andam adi bisa sawit, ngga andam bakak ngga sungoh; Ayŭh re pait raga ngga sabak adi paras da pirusak anŭ adi angān purun di ŭmŭh ngan. Pinyirusag anŭ re nyatŭk angān ndŭg ka angān kabŭs.

²³Ujen re mating, ka tana ngan re riang mun basi.

²⁴Ngga gati ujen TUHAN re pait sabak ribut dabu ngga sabak ribut sumat, ndŭg ka angān abo dog pirabur.

²⁵“TUHAN re bada pinganyu ngan manang rawan angān. Angān re nyerang pinganyu ngan so ndi parad pak angān re bu mangān ngara so barang parad, ka sopŭrŭg bangsa di ndi ong ong re kimŭtŭr taru kan ngara kiris kayuh adi jadi di angān.

²⁶Kan angān kabŭs manuk manuk ngga dāng tarun re mandŭg di man tadang ngan; ka ndi naan mating gŭh daya re kasig ngara.

²⁷TUHAN re pait pirakis ka angān nimun adi muko-I ndai di tunduh daya Egypt. Ayŭh re bada pŭrŭng ganan ngan puno da bakang buang bibagi adi tii, ka re dŭh tungang dog nguri.

²⁸TUHAN re bada angān mapung braŭg; Ayŭh re bada angān karak ka angān re jadi riruk.

²⁹Angān re kāp tarun darŭm jawa sandu, mun daya karak, ka angān taŭn dŭh re tungang dapŭd aran ngan. Angān dŭh re mujur di tadŭ tadŭ kayuh adi angān ndai. Angān re ari dog kinanyuh ka dog mirupak, ka mating daya re mandŭg di turung angān.

³⁰“Angān re bitunang ngga dayung adi mara, pak daya bŭkŭn re sawŭn ayŭh. Angān re pijog ramin, pak re rangun dŭh rŭŭ dieh. Angān re ndai teya anggor pak re rangun dŭh man buwa-i.

³¹Sapi ngan re dog simareh di sirung jawin ngan, pak angān dŭh re tungang man dagin-i. Kaldi ngan re dog tarik ngga bu di sirung jawin ngan, ka-i dŭh re dog nggen pari ka angān. Biri ngan re dog nggen di pinganyu ngan, ka ndi naan mating gŭh daya re turung angān.

³²Anak anak dari ngga anak anak dayung ngan re dog nggen bada jadi urun di daya pinami di sirung jawin ngan. Barang andu angān re tingga ndŭg ka batŭh ngan mandam, asa asa kajŭn bara anak ngan pari.

³³Bangsa tami re tambit sopŭrŭg buwa pimuruh ngan adi angān ko bandar bandar nyiraja sita-i, ka adŭp ngan dŭh trima ani ani adŭ-i dog kinanyuh ka dog pijera.

³⁴Udip sangsara ngan re bada pikir ngan manyap.

³⁵TUHAN re bada kaja ngan puno da bakang adi majot ka adi dŭh tikuri; pŭrŭng ganan ngan re puno ngga pirakis so ubak ndŭg kaja ngan.

³⁶“TUHAN re taban angān ngga raja ngan ngga bu ka tarun tana tami, adi taŭn gi-bŭn angān ngga tayung-babuk ngan yŭn rŭŭ dawŭ-i; diginŭ angān re bituan di tapa tapa adi dog ndai so kayuh ngga batuh.

³⁷Di rais adi yŭn TUHAN re bada angān papar sasah, bara daya re gŭgŭh kiris kayuh adi mbŭh jadi di angān; ngara re napat angān ka tawŭh angān.

³⁸“Angān re nabur bagŭ bine, pak nisŭ adŭ re angān ngatŭm, sabab dudu kadis re di man buwa buwa pimuruh ngan.

³⁹Angān re ndai teya anggor ka nakit kingat jaga-i pak angān dŭh re sun buwa-i puan kah nok wain so buwa-i, amai ŭrŭd re man tŭngŭn-i.

⁴⁰Tŭngŭn kanā re timbu di barang yŭn-i di tarun tana ngan pak angān dŭh tungang re biyŭn inyo kanā, amai buwa kanā anŭ re abo ruruh.

⁴¹Angān re biyŭn bagŭ anak dari ngga anak dayung pak ngara re mating, amai ngara re dog taban ngga bu jadi daya-takap.

⁴²Sopŭrŭg tŭngŭn kayuh adi angān purun ngga buwa buwa pimuruh ngan re dog man kadis.

⁴³“Bara daya pinami adi rŭŭ di tarun tana ngan re dŭ dŭ bikuasa, darŭm angān re dŭ dŭ dŭh bikuasa.

⁴⁴Ngara re biyŭn duit bisa ngara nginjam di angān, pak angān re dŭh biyŭn ani ani re angān nginjam di ngara. Pinŭbŭn-i ngara re jadi pinguasa ngan.

⁴⁵“Sopŭrŭg pinyirusag anŭ re mandŭg ka angān, ka re nyatŭk angān ndŭg ka angān mbŭh rarap, sabab angān nyibireu TUHAN adi Tapa ngan ka dŭh gŭh sita ukum-adat adi Ayŭh mbŭh nggen di angān.

⁴⁶Anŭ re jadi tandā ukum Tapa di tunduh ngan ngga di bara sesang ngan ndŭg situi tui.

⁴⁷TUHAN mbŭh nyiberkat angān di barang ka mun aran pimudip ngan, pak angān dŭh an bituan di Ayŭh ngga sanang asŭng ka ngga atin pawŭn.

⁴⁸Jadi meh, angān re bituan di bara pinganyu ngan adi TUHAN re pait da rawan angān. Angān re sibŭrŭk, badŭh asŭng ka sitabet sitagor -- jadi daya sirata. TUHAN[24] re bandar bandar kinanyuh angān ndŭg ka angān rarap.

⁴⁹TUHAN re taban ndi bangsa so bŭngŭn ong da rawan angān, bangsa adi dŭh angān puan piminyu-i. Ngara re nyambar angān mun beuh nyambar nakap dangah-i.

⁵⁰Ngara re raru garang ka dŭh biyŭn masi di tadŭ tadŭ daya, adi mara bait adi minyamba.

⁵¹Ngara re man dāng kudip ngan samŭn buwa buwa pimuruh ngan, ka angān re kabŭs sikirau. Ngara dŭh re kidŭm yŭn ngan gandom, wain, inyo kanā, sapi puan kah biri, ka angān re kabŭs.

⁵²Ngara re nyerang barang kupo adi agi di tarun tana adi TUHAN adi Tapa ngan nggen di angān, ka sindung sindung kuta adi bigatung adi angān harap dŭh re rubuh, re rubuh.

⁵³“Kan bara pinganyu ngan nyikapung kupo kupo ngan, angān re ruai sibŭrŭk ndŭg ka angān man anak anak ngan adi TUHAN adi Tapa ngan mbŭh nggen di angān.

⁵⁴Dari adi siabo duduh di tipuh dog nyikapung, re man gŭh kada anak adŭp-i sabab ayŭh dŭh biyŭn pinguman. Ayŭh dŭh kutung ngga bara jurud madis-i, bait sawŭn adi-i rindu, puan kah anak anak-i adi babŭ udip.

⁵⁵

⁵⁶ Dayung adi siabo duduh ani, adi ko raru kaya ndŭg ka bŭn panu kaja ka barang yŭn, re ndai simŭnŭ gŭh. Kan pinganyu nyikapung kupo-i, ayŭh re darŭm raru sibŭrŭk re naku man anak adi bauh-i ko ruwan, samŭn pasid-i. Ayŭh dŭh samah-i ngga banŭh adi-i rindu bait ngga tadŭ tadŭ anak-i adi bŭkŭn.

⁵⁷

⁵⁸“Kambŭi angān dŭh tŭtŭd tunda sopŭrŭg ajar Tapa adi dog nuris di surat ati, ka kambŭi angān dŭh stabi di Adŭn TUHAN adi Tapa ngan adi raru biragah ngga adi dog taru,

⁵⁹Ayŭh re pait ka angān, ngga sesang ngan, barang masam andam adi dŭh tikuri ngga sesak-andam adi dŭh bisa dog pirŭŭ.

⁶⁰Ayŭh re taban ka angān dinge sopŭrŭg andam adi bisā adi angān ko taru ka kiris di Egypt, ka angān dŭh re tungang bua.

⁶¹Ayŭh re pait gŭh barang masam andam ngga sesak-andam adi dŭh dog nyabŭt darŭm surat Tapa ati adi brisi ngga ukum-adat ngga ajar-I, ka angān re dog pirabur.

⁶²Sunggu angān mbŭh raru bagŭ keya ka dudu bitang di rangit, kada so angān adŭ adi re babŭ udip, sabab angān nyibireu TUHAN adi Tapa ngan.

⁶³Nimun ka TUHAN ngga sanang asŭng-I bada angān mujur, ka bada gŭh angān papah bagŭ, simŭnŭ gŭh Ayŭh re ngga sanang asŭng-I pirabur angān ndŭg ka rŭpŭg. Angān re dog dimbut so tarun tana adi angān re ngisi.

⁶⁴“TUHAN re bada angān papar sasah di ruang sopŭrŭg bangsa di ndi ong ong, ka diginŭ angān re bituan di tapa tapa adi dog ndai so kayuh ngga batuh, tapa tapa adi angān ngga tayung-babuk ngan bŭn nyambah dawŭ-i.

⁶⁵Re mating damai yŭn ngan di tadŭ tadŭ yŭn-i, ka mating tarun adi re angān kadŭn tung adŭp ngan; TUHAN re batur batur pijera angān ngga pinyigapang, ngga mating pingarap, ka ngga pinyusah.

⁶⁶Pimudip ngan re ari an dog pinyusah. Sandu singarŭm angān re taru, ka angān re adu adu taru pinyikabŭs darŭm angān udip.

⁶⁷Atin ngan re simabog da taru di barang ka mun kayuh adi angān kiris. Barang isan angān re gruwŭn singumi andu; barang singumi andu angān re gruwŭn isan isan.

⁶⁸TUHAN re bada angān pari ka Egypt pakai kapar, sunggu Ayŭh[25] muko nang angān taŭn dŭh tia re pari kamanŭ. Diginŭ angān re suba jua adŭp ngan jadi urun di pinganyu ngan, pak mating daya re raan miris angān.”