Read Biatah Bidayuh DITRONOMI 29 Bible Online

DITRONOMI 29 - Biatah Bidayuh bible

DITRONOMI 29

¹Ati inŭh gaya atur simanya adi TUHAN pesan di Moses bada ndai ngga daya Israel di tarun tana Moab; sopŭrŭg anŭ inŭh ngga nambah simanya anŭ adi TUHAN mbŭh ndai ngga ngara di Darŭd Sinai.

²Moses bagan bada tikuruk sopŭrŭg daya Israel, ka nang di ngara, “Adŭp ngan ko kiris kayuh adi TUHAN mbŭh ndai di raja Egypt, di bara pinurung-i, ka di ndi tarun tana rais-i.

³Angān mbŭh kiris sesak-andam, pingandai nginga ngga pingandai-bās adi TUHAN mbŭh ndai.

⁴Pak ndŭg ka andu ati Ayŭh dŭh bada angān mirati kayuh adi angān muko kinyam.

⁵Sitŭkŭd pat puru sawa TUHAN taban angān panu mutas tarun tana-pajam, ka piraka ngan dŭh tungang rutus, kasut ngan dŭh tungang rusak.

⁶Angān dŭh biyŭn ruti re ngan man, bait wain puan kah nok adi bisā re ngan nok, pak TUHAN mbŭh nggen di angān kayuh adi raan ngan ngga ngajar angān nang adŭp-I inŭh adi Tapa ngan.

⁷ Ka kan ata mbŭh ndŭg tarun ati, Raja Sihon so Heshbon ngga Raja Og so Bashan mandŭg di nyerang ata. Pak ata ngarah ngara,

⁸ tambit tarun tana ngara ka kutung-i di dupan tibaran-asar Reuben ngga tibaran-asar Gad, ka di sitangah tibaran-asar Manasseh.

⁹Tunda nakit gaya atur simanya ati, isa angān jadi mujur di barang kayuh adi angān ndai.

¹⁰“Andu ati angān mijog di sirung jawin TUHAN adi Tapa ngan, sopŭrŭg ngan -- bara pinguru ngan, bara pingubak ngan, bara dari ngan,

¹¹bara dayung ngan, bara anak-anya, ngga bara daya pinami adi rŭŭ di ruang ngan adi kapŭg uwang ka muat piin yŭn ngan.

¹²Angān tikuruk digiti andu ati di ngabŭt adŭp ngan ngga simanya adi TUHAN adi Tapa ngan ndai ngga angān ka bidigŭng tagap di gaya atur-i,

¹³isa madin TUHAN bisa natu angān jadi daya-I ka Ayŭh jadi Tapa ngan, nanyam adi-I muko bijanji ngga angān ngga tayung-babuk ngan, Abraham, Isaac ka Jacob.

¹⁴Dŭh-i ngga angān sadi adŭ TUHAN ndai simanya ati, ka samŭn gaya atur-i.

¹⁵Ayŭh ndai-i ngga sopŭrŭg ta adi agi digiti di sirung jawin-I andu ati, ka ngga sopŭrŭg sesang ta adi gibayuh dog biranak.

¹⁶“Angān ingat munki pimudip ngan di Egypt ka nyamki bigandon mutas tarun tana daya bangsa bŭkŭn.

¹⁷Angān mbŭh kiris tibudo tibudo ngara adi sipŭ anŭ, adi dog ndai so kayuh, batuh, pirak, ka mas.

¹⁸ Nakit ingat, dari, dayung, rawang puan kah tibaran-asar adi agi sua mijog digiti andu ati dŭh siŭn nyipunok TUHAN adi Tapa ta ka nyambah tapa tapa daya bangsa bŭkŭn. Anŭ re jadi keya ka uat anak kayuh-udip adi timbu jadi kayuh adi pa'it ka adi birasun.

¹⁹Nakit ingat, dŭh siŭn agi andu ati digiti daya adi dingah gaya atur anŭ, pak sabah nang adŭp-i dŭh re mani mani kambŭi ngga atin baking-i tunda aran adŭp-i sadi. Kraja adi mun anŭ re pirusak sopŭrŭg ngan, adi kana ngga adi arap.

²⁰TUHAN dŭh re apun daya adi mun anŭ; pak tanŭ ka baji TUHAN re bijagu nyatŭk ayŭh, ka sopŭrŭg pinyirusag adi dog nuris di surat ati re nyatŭk ayŭh, ndŭg ka TUHAN mbŭh kinating ayŭh.

²¹TUHAN re bada daya anŭ jadi suto di sopŭrŭg tibaran-asar Israel, ka re bada pinyirusag nyatŭk ayŭh nanyam ka sopŭrŭg pangu adi agi di simanya adi dog nuris di surat ati adi brisi ngga ajar TUHAN.

²²“Di bara turap adi re, sesang sesang ngan ngga bara pinami adi mandŭg so tarun tana adi jo re kiris pinyirusag ngga sangsara adi TUHAN mbŭh taban ka tarun tana ngan.

²³ Tana ŭmŭh ngan re matung, dog nutu mirirang ka garo; mating kayuh bisa dog purun, ndŭg ka uduh abah gŭh timbu dieh. Tarun tana ngan re keya ka kupo Sodom, kupo Gomorrah, kupo Admah ngga kupo Zeboiim, adi TUHAN ko pirabur kan-I mbŭh raru baji.

²⁴Jadi ndi ong ong re siken, ‘Mani kah TUHAN ndai kayuh adi mun anŭ di tarun tana ngara? Ani bada Ayŭh raru baji?’

²⁵Ka pinyinam-i re sakati, ‘Ayŭh raru baji sabab bara daya TUHAN tirawan simanya adi ngara muko ndai ngga Ayŭh adi Tapa tayung-babuk ngara, di tika Ayŭh taban ngara ruah so Egypt.

²⁶Ngara bituan di tapa tapa bŭkŭn adi ngara bŭn nyambah dawŭ-i; tapa adi TUHAN mbŭh nagah ngara nyambah.

²⁷Ngapŭi TUHAN baji di bara daya-I ka taban ka tarun tana ngara sopŭrŭg pinyirusag adi dog nuris di surat ati.

²⁸TUHAN mbŭh raru baji, ndŭg ka Ayŭh kadi ngara so tarun tana ngara ka taran ngara ka tarun tana tami, ka diginŭ inŭh ngara ndŭg andu ati.’

²⁹“Agi kayuh adi TUHAN adi Tapa ta sukan so ata; pak Ayŭh mbŭh kiren ukum adat-I, ka ata ngga bara sesang ta an tunda-i adu adu.