Read Biatah Bidayuh DITRONOMI 3 Bible Online

DITRONOMI 3 - Biatah Bidayuh bible

DITRONOMI 3

¹“Komŭnŭ, ata pijuu pimanu ta ka utara nuju tarun tana Bashan, ka Raja Og makat ngga bara soldadu-i di nyerang ata sindŭk kupo Edrei.

²Pak TUHAN nang di aku, ‘Dŭhnyah taru ayŭh. Aku re nggen ayŭh samŭn bara soldadu-i ngga sopŭrŭg tarun tana-i di angān. Ndai di ayŭh nimun adi angān mbŭh ndai di raja Sihon adi daya Amor adi mritah di Heshbon.’

³“Jadi TUHAN na gŭh Raja Og ngga bara daya-i ka darŭm kuasa ta, ka ata siŭ sopŭrŭg ngara.

⁴Di tipuh anŭ gŭh ata sirabut sopŭrŭg kupo-i; ndi mating gŭh adi ata dŭh sirabut. Prungun-i nŭm puru kupo adi mbŭh ata tambit -- ndi tarun tarun tana Argob, adi yŭn Raja Og so Bashan mritah.

⁵Sopŭrŭg kupo anŭ mbŭh dog nyindung ngga sindung kuta adi bigatung, tiban tiban-bās kupo ngga parang parang adi ngga ngabŭt tiban, ka bagŭ gŭh anak kupo adi dŭh biyŭn sindung.

⁶Ata pirabur sopŭrŭg kupo, ka siŭ sopŭrŭg dari ka dayung, samŭn anak-anya, nimun adi ata mbŭh ndai di kupo kupo adi dog dapu Raja Sihon so Heshbon.

⁷Ata tambit sopŭrŭg dāng kudip ka mirupak kupo kupo ngara.

⁸“Di tika anŭ gŭh ata tambit so so-duwŭh raja daya Amor anŭ tarun tana di tura ka timor Yang Jordan, so Yang Arnon ndŭg Darŭd Hermon. (

⁹Darŭd Hermon, dog kadŭn daya Sidon, inŭh Sirion, ka daya Amor kadŭn-i Senir.)

¹⁰Ata kubo tambit tarun tana Raja Og so Bashan: kupo kupo adi agi di tarun tana adi rata buang bayah bigatung, gadung tarun tana Gilead ngga Bashan ka jeh ndŭg kupo kupo di Selecah ngga Edrei di tura ka timor.” (

¹¹Raja Og inŭh adi sikasŭn so daya Rephaim. Arung-i,[2] dog ndai so batuh,[3] buka-i 2 mita ka anjong-i kurang rabis 4 mita, nanyam ka pingŭkŭd adi siraru dog pakai di jaman anŭ. Arung anŭ gibabŭ dapŭd dog kiris di Rabbah, kupo daya Ammon.)

¹²“Kan ata mbŭh tambit tarun tana anŭ, aku nggen di tibaran-asar Reuben ngga tibaran-asar Gad gadung tarun tana tura ka utara kupo Aroer sindŭk Yang Arnon, samŭn kada rais tarun tana sandah Gilead, samŭn kupo kupo adi agi dieh.

¹³Yŭn sitangah tibaran-asar Manasseh aku nggen tadŭh tarun tana Gilead samŭn sopŭrŭg tana Bashan adi yŭn Og ko mritah, anŭ inŭh ndi tarun tana Argob.” (Bashan mbŭh dog puan nang tarun tana daya Rephaim.

¹⁴Jair, so tibaran-asar Manasseh, tambit ndi tarun tana Argob, anŭ inŭh Bashan, jeh ndŭg baat Geshur ngga Maacah. Ayŭh kadŭn anak anak kupo anŭ tunda dŭn adŭp-i, ka gibabŭ dog kadŭn kupo kupo Jair.)

¹⁵“Aku nggen tarun tana Gilead ka manak Machir so tibaran-asar Manasseh.

¹⁶Ka di tibaran-asar Reuben ngga tibaran-asar Gad aku nggen tarun tana so Gilead ndŭg Yang Arnon. Jadi yun Yang Arnon inŭh baat ngara tura ka siratan, ka baat ngara tura ka utara inŭh Yang Jabbok, adi kada-i jadi baat daya Ammon.

¹⁷Di tura ka barat, buka tarun tana ngara jeh ndŭg Yang Jordan so Danu Galilee di tura ka utara mūn ka Rawŭt Pide tura ka siratan, ka ndŭg sigŭn Darŭd Pisgah tura ka timor.

¹⁸ “Di tipuh anŭ gŭh aku pitayan ngara: ‘TUHAN adi Tapa ta mbŭh nggen di angān tarun tana anŭ tura ka timor Yang Jordan, bada angān ngisi. Ngapŭi meh nggen sinyata di bara soldadu ngan ka mutas Yang Jordan diŭ so tibaran tibaran-asar Israel adi bŭkŭn, yŭn turung ngara ngisi tarun tana ngara.

¹⁹Adŭ-i bara sawŭn ngan, bara anak ngan, samŭn dāng kudip ngan -- aku puan angān biyŭn bagŭ dāng kudip -- bisa dog tingge di kupo kupo adi muko aku nggen di ngan.

²⁰Turung bara daya Israel adi bŭkŭn ndŭg ka ngara mbŭh ngisi tarun tana adi TUHAN nggen di ngara tura ka barat Yang Jordan, ka ndŭg ka TUHAN mbŭh bada ngara rŭŭ diginŭ ngga damai, nimun ka adi muko-I ndai yŭn ngan digiti. Ripas anŭ, angān bisa pari ka tarun tana ati adi aku mbŭh nggen di angān.’

²¹“Komŭnŭ Aku pitayan Joshua: ‘Kuu muko kiris sopŭrŭg kayuh adi TUHAN adi Tapa ngan muko ndai di tunduh duwŭh naan raja, Sihon ngga Og; ka Ayŭh re ndai simŭnŭ gŭh di barang naan daya adi dapu tarun tana adi angān nyerang.

²²Dŭhnyah taru ngara, amai TUHAN adi Tapa ngan re birawan yŭn ngan.’

²³ “Di tipuh anŭ aku mbŭh bandar bandar bidua,

²⁴‘TUHAN Raja, aku puan nang Kaam mbŭh kiren di aku batur-i puun sibungas pingandai Mai adi bās ngga saruh adi re Mai ndai. Mating tapa adi bŭkŭn di rangit puan kah di ong adi bisa ndai kayuh adi raru bās adi Kaam mbŭh ndai!

²⁵Bada aku mutas Yang Jordan, TUHAN, ka tingga tarun tana adi damŭn anŭ di parad mandi, rais tarun tana sandah adi sangŭn anŭ, ka Darŭd Darŭd Lebanon.’

²⁶“Pak sabab bara ngan, TUHAN mbŭh baji di aku, ka dŭh an nggen pimite ku. Ayŭh nang, ‘Mbŭh inŭh! Dŭh tia nang anŭ dinge!

²⁷Di ka tibung Darŭd Pisgah ka tingga tura ka utara ngga tura ka siratan, tura ka timor ngga tura ka barat. Nakit tingga kayuh adi kuu kiris, sabab kuu manŭn dŭh re mutas Yang Jordan.

²⁸Kidaan di Joshua kayuh adi dŭh siŭn dŭh ayŭh ndai, ka turung bada ayŭh bake buang birani, sabab ayŭh re nguru bara daya mutas ka pah mandi di ngisi tarun tana adi kuu kiris.’

²⁹“Jadi ata mbŭh babŭ di gadung rubān adi bistatang ngga kupo Bethpeor.”