Read Biatah Bidayuh DITRONOMI 30 Bible Online

DITRONOMI 30 - Biatah Bidayuh bible

DITRONOMI 30

¹“Aku muko bada angān mien: berkat kah pangu. Kan sopŭrŭg kayuh ati mbŭh jadi di angān, ka angān mbŭh rŭŭ bigaur ngga bangsa bangsa adi yŭn TUHAN adi tapa ngan mbŭh bada angān papar sasah, angān re ingat aku ko bada angān ndai pimien ngan.

²Kambŭi angān ngga bara sesang ngan raan pari ka TUHAN ka ngga siabo abo atin ngan tunda pinyipesan-I adi aku nggen di angān andu ati,

³TUHAN adi Tapa ngan re masi di angān. Ayŭh re taban angān ngga pari so bangsa bangsa adi yŭn-I mbŭh bada angān papar sasah, ka Ayŭh re bada angān mujur dinge.

⁴Sunggu kambŭi angān papar sasah jeh ndŭg bŭngŭn ong, TUHAN adi Tapa ngan re nguruk angān ka taban angān ngga pari,

⁵isa angān bisa pari dapu tarun tana adi tayung-babuk ngan ko yŭn rŭŭ. Ka Ayŭh re bada angān jadi rabis mujur ka rabis bagŭ so tayung-babuk ngan jah.

⁶TUHAN adi Tapa ngan re nggen di angān ngga bara sesang ngan atin adi raan tunda pinganang-I, isa angān bisa rindu Ayŭh ngga siabo atin ngan, ka angān re gibabŭ rŭŭ di tarun tana anŭ.

⁷Ayŭh re marik sopŭrŭg pangu anŭ bada nyatŭk bara pinganyu ngan, adi ko tiru di angān ka kinanyuh angān,

⁸ka angān re tunda pinganang-I dinge ka sita sopŭrŭg pinyipesan-I adi aku nggen di angān andu ati.

⁹TUHAN re bada angān mujur di sopŭrŭg kayuh adi angān ndai; angān re biyŭn bagŭ anak ka bagŭ dāng kudip, ka ŭmŭh ŭmŭh ngan re piruah bagŭ buwa. Ayŭh re ngga sanang asŭng bada angān mujur nimun Ayŭh muko bada tayung-babuk ngan mujur,

¹⁰pak angān an tunda pinganang-I ka sita sopŭrŭg ukum adat-I adi mbŭh dog nuris di surat ati adi brisi ngga ajar-I. Angān an pari ka Ayŭh ngga siabo atin ngan.

¹¹“Pesan adi aku nggen di angān andu ati dŭh inŭh paŭh mbar dog tunda ka dŭh-i kayuh adi dŭh angān tungang nyapai.

¹² Pesan anŭ dŭh jeh di rangit. Angān dŭhsah siken, ‘Asi re di ka sambu ka taban-i mūn ka yŭn ta, isa ata dapŭd dingah-i ka tunda-i?’

¹³Pesan anŭ dŭh di pah mandi rawŭt. Angān dŭhsah siken, ‘Asi re di mutas rawŭt di tambit-i yŭn ta, isa ata tungang dingah-i ka tunda-i?’

¹⁴Pesan anŭ digiti, agi ngga angān. Angān tungang nyabŭt-i ngga baba ngan, angān tungang ingat-i ngga atin ngan, ngapŭi tunda nŭh meh pesan anŭ.

¹⁵“Andu ati aku bada angān mien: pinyikana kah arap, udip kah pinyikabŭs.

¹⁶Kambŭi angān tunda pesan TUHAN adi Tapa ngan, adi aku nggen di angān andu ati, kambŭi angān rindu Ayŭh, tunda pinganang-I, ka sita sopŭrŭg ukum adat-I, angān sawŭ re mujur ka jadi bangsa daya adi bagŭ. TUHAN adi Tapa ngan re nyiberkat angān di tarun tana adi angān re ngisi.

¹⁷Pak kambŭi angān nyibireu ka abah dingah, ka miriseu nyambah tapa adi bŭkŭn,

¹⁸angān re dog pirabur! Aku bakan angān digiti madin. Angān dŭh re tui udip di tarun tana di pah mandi Yang Jordan adi angān re ngisi.

¹⁹Aku madin bada angān mien: udip kah pinyikabŭs, berkat Tapa kah pangu Tapa, ka aku bagan rangit ngga tana bada nyaksi pimien ngan. Mien nŭh udip.

²⁰ Rindu TUHAN adi Tapa ngan, tunda ka tŭtŭd di Ayŭh, ka angān ngga bara sesang ngan re tui udip di tarun tana adi Ayŭh mbŭh bijanji an nggen di babuk ngan, Abraham, Isaac ngga Jacob.”