Read Biatah Bidayuh DITRONOMI 31 Bible Online

DITRONOMI 31 - Biatah Bidayuh bible

DITRONOMI 31

¹Moses pijuu minyu di bara daya Israel,

² ka nang, “Umbur ku madin mbŭh siratus duwŭh puru sawa ka aku mbŭh dŭh tia re tungang jadi pinguru ngan. Ka dinge, TUHAN mbŭh kidaan di aku nang aku dŭh re mutas Yang Jordan.

³TUHAN adi Tapa ngan re panu diŭ di jawin ngan, ka re siŭ bangsa bangsa adi rŭŭ diginŭ, isa angān dapŭd ngisi tarun tana ngara; ka Joshua inŭh adi re jadi pinguru ngan nimun adi TUHAN ko kidaan.

⁴ TUHAN re siŭ ngara, nimun Ayŭh mbŭh ngarah Sihon ngga Og, raja raja daya Amor, ka pirabur rais ngara.

⁵TUHAN re bada angān manang rawan ngara, ka angān siŭn ndai di tunduh ngara nimun adi muko aku kidaan di angān.

⁶Angān dŭh siŭn dŭh birani ka dŭhnyah bada atin ngan arot. Dŭhnyah taru ngara. Tapa ngan, adi adŭp-I TUHAN, re agi ngga angān. Ayŭh dŭh re tandah angān puan kah tagan angān.”

⁷Komŭnŭ Moses bagan Joshua ka nang di ayŭh di sirung jawin sopŭrŭg daya Israel, “Kuu dŭh siŭn dŭh birani ka dŭhnyah bada atin mu arot; kuu inŭh adi re nguru bara daya ati di ngisi tarun tana anŭ adi TUHAN mbŭh bijanji an nggen di tayung-babuk ngara.

⁸ Adŭp TUHAN re nguru angān ka re agi ngga angān. Ayŭh dŭh re tandah angān puan kah tagan angān, jadi dŭhnyah jimŭ puan kah taru.”

⁹Jadi Moses nuris ukum-adat Tapa ka nggen-i di bara imam so asar Levi adi tukang jaga Pati Simanya TUHAN, ka di bara pinguru Israel.

¹⁰ Ayŭh pesan ngara, “Di tŭbŭn barang ju sawa, kan sawa adi ngga utang daya dog kinating mandŭg, basa ukum-adat ati bada bana di tipuh Gawai Bari-Dawŭn.

¹¹Basa-i di bara daya Israel kan ngara mandŭg di nyambah TUHAN adi Tapa ngan di tarun yŭn anŭ adi ndi adŭ yŭn bisambah.

¹²Bagan bada tikuruk sopŭrŭg dari dayung, bara anak-anya ngga bara pinami adi rŭŭ di kupo kupo ngan, isa barang pŭrŭng daya dapŭd dingah ka birajar stabi di TUHAN adi Tapa ngan ka tunda ajar-I ngga atin tŭtŭd.

¹³Ngga aran anŭ bara sesang ngan adi bŭn dingah Ukum-Adat TUHAN adi Tapa ngan, re dingah-i. Ka simŭnŭ inŭh ngara re birajar tunda pinganang-I sitŭkŭd ngara udip di tarun tana adi angān re ngisi di pah mandi Yang Jordan.”

¹⁴Komŭnŭ TUHAN nang di Moses, “Kuu dŭm dŭh tui re kabŭs. Bagan Joshua ka taban ayŭh ka Bari Ku, isa Aku bisa nggen pinganang di ayŭh.” Moses ngga Joshua di ka Bari TUHAN,

¹⁵ka TUHAN nandŭng di ngara diginŭ di darŭm tŭngŭn abun adi mijog sindŭk tiban Bari TUHAN.

¹⁶TUHAN nang di Moses, “Kuu dŭm dŭh tui re kabŭs, ka ripas pinyikabŭs mu bara daya re dŭh tia tŭtŭd di Aku ka miranggar simanya adi Aku muko ndai ngga ngara. Ngara re tagan Aku ka nyambah tapa tapa adi dog nyambah di tarun tana adi ngara re ngisi.

¹⁷Kan kayuh adi mun anŭ jadi Aku re baji di ngara; ka Aku re tagan ngara, ka ngara re rarap. Bagŭ mun pinyirusag re dog ngara, ka ngara re rada nang sopŭrŭg kayuh anŭ nyatŭk ngara sabab Aku, adi Tapa ngara, mbŭh dŭh tia ngga ngara.

¹⁸Aku re abah turung ngara, sabab ngara mbŭh ndai pingandai adi arap ka nyambah tapa tapa adi bŭkŭn.

¹⁹“Jadi madin, nuris ragu ati. Ngajar-i di daya Israel, isa-i jadi taksi Ku di ngara.

²⁰Aku re taban ngara ka tarun tana anŭ adi kaya ngga damŭn, nimun adi Aku muko janji di tayung-babuk ngara. Diginŭ ngara re biyŭn sopŭrŭg pinguman adi ngara raan, ka ngara re udip darŭm sanang. Pak ngara re nyipunok Aku ka nyambah tapa tapa adi bŭkŭn. Ngara re tirawan Aku ka miranggar simanya Ku,

²¹ka bagŭ mun pinyirusag adi raru arap re nyatŭk ngara. Pak ragu ati re babŭ dog nang, ka jadi taksi Ku di ngara. Ka madin gŭh, diŭ so Aku taban ngara mŭrŭt tarun tana adi Aku mbŭh bijanji an nggen di ngara, Aku mbŭh puan kayuh adi ngara pikir.”

²²Di andu anŭ gŭh Moses nuris ragu anŭ ka ngajar-i di bara daya Israel.

²³ Komŭnŭ TUHAN minyu di Joshua anak Nun ka nang di ayŭh, “Kuu dŭh siŭn bada atin mu arot pak birani. Kuu re nguru daya Israel ka tarun tana adi Aku mbŭh bijanji an nggen di ngara, ka Aku re agi ngga kuu.”

²⁴Moses nuris Ukum-adat Tapa ngga nakit so puun ndŭg tŭbŭn-i.

²⁵Kan mbŭh abo nuris-i, ayŭh nang di bara imam so asar Levi, adi tukang jaga Pati Simanya TUHAN,

²⁶“Tambit surat ati adi yŭn Ukum-adat Tapa dog nuris, ka na-i sindŭk Pati Simanya TUHAN adi Tapa ngan, isa-i babŭ diginŭ ndu taksi di daya-I.

²⁷Aku puan ngara anŭ baking buang an birawan. Ngara mbŭh rawan TUHAN sitadŭn aku udip, ka ngara re rabis an birawan kan aku mbŭh kabŭs.

²⁸Nguruk sopŭrŭg pinguru tibaran-asar ngan samŭn bara pinurung di sirung jawin ku, isa aku bisa kidaan di ngara sopŭrŭg kayuh ati; aku re bagan rangit ngga tana bada jadi saksi ku di ngara.

²⁹Aku puan nang kan aku mbŭh kabŭs bara daya re jadi ginaka ka tirawan kayuh adi aku muko ngajar di ngara. Ka di tipuh adi re mandŭg ngara re dog nyatŭk pinyirusag, sabab ngara re bada TUHAN baji ngga pingandai adi TUHAN mbŭh kijaman ngara ndai.”

³⁰Komŭnŭ Moses nang nyidayŭh ndi tŭngŭn ragu anŭ bada sopŭrŭg daya Israel dingah.