Read Biatah Bidayuh DITRONOMI 32 Bible Online

DITRONOMI 32 - Biatah Bidayuh bible

DITRONOMI 32

¹“Tana ngga rangit, dingah pinganang ku, dingah nakit nakit kayuh adi nang ku.

²Ajar ku re rabu mun sirah ujen ka jadi keya ka sipot-abun di tunduh tana. Pinganang ku re rabu mun ujen di tunduh anak anak kayuh-udip, mun ujen adi duduh di tunduh kupai adi dŭdŭt.

³Aku re muji adŭn TUHAN, ka daya-I re kibās Ayŭh di barang yŭn.

⁴“TUHAN inŭh pingibān ngan adi bikuasa, sukup kana ka tŭnggŭn darŭm sopŭrŭg kayuh, Tapa ngan inŭh tŭtŭd ngga sawŭ, Ayŭh ndai kayuh adi batur ngga patut.

⁵Pak angān dŭh tŭtŭd, dŭh tibirang jadi daya-I, bangsa adi bidosa buang pinipu.

⁶Simŭnŭ kah angān patut ngga TUHAN, angān adi budo, adi dŭh biyŭn pikir? Ayŭh anŭ Sama ngan, Pinapa ngan, Ayŭh ndai angān jadi ndi bangsa.

⁷“Ingat kayuh adi mbŭh ripas, di jaman jah; mite pimas pimas ngan kidaan kayuh adi mbŭh jadi; mite bara adi mbŭh minyamba kidaan kayuh adi mbŭh ripas.

⁸ Ayŭh adi di Sambu Sopŭrŭg pirutung tarun tana di sopŭrŭg bangsa, Ayŭh ngatur tarun adi yŭn ngara rŭŭ. Ayŭh tijuan yŭn barang bangsa malaikat adi jadi pinyigrindung,

⁹pak sesang Jacob Ayŭh mien yŭn adŭp-I.

¹⁰“Ayŭh dapŭd ngara bigandon di tarun tana-pajam, tarun adi maput, adi yŭn sabak marar poh. Tarun yŭn adi-I grindung ka kingat jaga, nimun Ayŭh grindung ka kingat jaga adŭp-I.

¹¹Keya ka manuk beuh ngajar anak-i mikabur, nakit nakap ngara ngga urad-i merarai, TUHAN kingat jaga Israel isa ngara dŭh rabu.

¹²TUHAN sadi adŭp-I nguru daya-I, dŭh ngga pinurung so tapa tapa bŭkŭn.

¹³“Ayŭh bada ngara mritah di tarun tana darŭd, ka ngara man kayuh adi timbu di ŭmŭh. Ngara dapŭd ju banyis tarun so apad apad batuh; tŭngŭn tŭngŭn kanā ngara raru mandis timbu di tana adi pibatuh.

¹⁴Ngara dapŭd bagŭ sisuh so sapi ngga kambing ngara; ngara biyŭn biri, kambing ngga sapi adi gamu, gandom adi siabo kana ngga wain adi raru sidi.

¹⁵“Daya TUHAN jadi kaya, pak raru an birawan; ngara gamu ka badŭg ngga pinguman. ngara tagan Tapa adi Pinapa ngara, ka tirawan pinyikudip ngara adi bikuasa.

¹⁶Ngara nyambah tibudo, ngga bada TUHAN jadi sina; arap adi ngara ndai bada Ayŭh baji.

¹⁷ Ngara bisadis ka tapa tapa adi dŭh sawŭ,[26] tapa tapa bauh adi tayung-babuk ngara bŭn puan, tapa tapa adi Israel bŭn bituan dieh.

¹⁸Ngara kambŭt Tapa adŭp ngara, pinyikudip ngara adi bikuasa, sianŭ adi bada ngara udip.

¹⁹“Kan TUHAN kiris kayuh anŭ, Ayŭh raru baji ka tirawan bara anak dari ngga anak dayung-I.

²⁰‘Aku dŭh re tia turung ngara,’ Ayŭh nang, ‘Aku an tingga ani re jadi di ngara, ngara anŭ daya adi baking ngga dŭh tŭtŭd.

²¹ Amai sabab tibudo ngara, ngara mbŭh bada Aku baji, Aku sina sabab tibudo adi ngara kadŭn tapa, tapa tapa adi dŭh sawŭ tapa. Jadi Aku re pakai bangsa adi dŭh sawŭ bangsa ngga bada ngara baji; Aku re bada ngara sina di bangsa adi budo.

²²Baji Ku re bijagu mun apui, ka sigot barang masam kayuh di tunduh tana. Baji Ku re ndŭg ong di sagān[27] ka nyau uat dudu darŭd.

²³“ ‘Aku re bada pinyirusag adi dŭh bisa abo nyatŭk ngara ka pakai sopŭrŭg reja-panah Ku rawan ngara.

²⁴Ngara re kabŭs amai sikirau ngga sungoh; ngara re kabŭs bada andam adi bisā. Aku re pait dāng tarun bada nyerang ngara, ka jippŭh jippŭh adi bisā bada nyingŭt ngara.

²⁵Perang re taban pinyikabŭs di aran aran raya; pinyitaru re nyatŭk ramin arŭn daya. Dari dayung adi babŭ mara re kabŭs; anak pira ngga nyamba nyamba dŭh re dog murau.

²⁶Sibatur-i Aku bisa pirarap ngara, isa mating daya re ingat rada ngara.

²⁷Pak Aku dŭh bisa bada pinganyu ngara mingangŭn ka nang adŭp ngara mbŭh ngarah daya Ku, amai pŭn ka adŭp Ku inŭh adi pirabur ngara.’

²⁸“Israel inŭh bangsa adi dŭh biyŭn atin; ngara manŭn dŭh biyŭn pinyibijak.

²⁹Ngara dŭh tungang rada ani sabab ngara dog ngarah; ngara dŭh tungang mirati ani mbŭh jadi.

³⁰Mani siribu naan daya tungang dog ngarah ndi naan daya, ka simŭng ribu dog ngarah duwŭh naan? TUHAN, adi Tapa ngara, mbŭh tagan ngara; Tapa ngara adi bikuasa mbŭh dŭh tia piduri ngara.

³¹Pinganyu ngara puan nang tapa adŭp ngara ramah, dŭh bikuasa mun Tapa Israel.

³²Pinganyu ngara arap mun Sodom ngga Gomorrah, keya ka tŭngŭn anggor adi buān buwa adi pa'it ngga birasun,

³³keya ka wain adi dog ndai so rasun jippŭh.

³⁴“TUHAN ingat kayuh adi pinganyu ngara mbŭh ndai; Ayŭh kajŭn tipuh adi batur ngga-I ngukum ngara.

³⁵ TUHAN re maras ka ngukum ngara; tipuh re mandŭg kan ngara re rabu; andu pinyirusag ngara mbŭh sindŭk.

³⁶ TUHAN re nyiramat daya-I kan Ayŭh kiris pinyibake ngara mbŭh mating; Ayŭh re biyŭn masi di ngara adi bituan di Ayŭh, kan Ayŭh kiris ngara mbŭh raru dŭh bigaya.

³⁷Komŭnŭ TUHAN re siken daya-I, ‘Diki dudu tapa anŭ adi bikuasa adi angān sabah?

³⁸Angān paan ngara ngga aŭn anŭ adi kana so dudu sadis ngan, ka jugan wain ka ngara da nok. Bada ngara mandŭg ka turung angān madin; bada ngara nyiramat angān.

³⁹“ ‘Aku, ka Aku sadi adŭ adi Tapa; mating tapa adi bŭkŭn adi sawŭ. Aku siŭ ka Aku kudip; Aku bada tawan ka Aku bada bua, ka mating daya bisa matah kayuh adi ndai Ku.

⁴⁰Siragi Aku ati Tapa adi udip, Aku pakat tangan Ku ka Aku bipayu

⁴¹Aku re ngasa pedang Ku adi mikirab ka nakit tingga bada pinyitŭnggŭn dog pimanu. Aku re maras bara pinganyu Ku ka ngukum ngara adi tiru di Aku.

⁴²Reja-panah Ku re bititeg ngga deya ngara, ka pedang Ku re siŭ sopŭrŭg adi rawan Aku. Aku dŭh re kidŭm daya adi birawan rawan Aku; daya adi mbŭh tawan ngga daya-takap sirabi ka re kabŭs.’

⁴³ “O bangsa bangsa, angān dŭh siŭn dŭh muji daya TUHAN. Ayŭh ngukum sopŭrŭg daya adi siŭ ngara; Ayŭh maras bara pinganyu-I ka apun dosa daya-I.”

⁴⁴Moses ngga Joshua nang nyidayŭh ragu anŭ, isa daya Israel bisa dingah-i.

⁴⁵Kan Moses muko nggen ajar Tapa ka daya bagŭ,

⁴⁶ayŭh nang, “Nakit ingat ka tunda sopŭrŭg pesan adi nggen ku di angān andu ati. Pesan anak anak ngan bada sita-i, isa ngara bisa ngga atin tŭtŭd tunda sopŭrŭg ajar Tapa.

⁴⁷Ajar ajar ati dŭh-i pinganang au-tarun, pak aŭn asŭng udip ngan. Tunda nŭh ka angān re tui udip di tarun tana adi di pah mandi Yang Jordan adi angān re ngisi.”

⁴⁸ Di andu anŭ gŭh TUHAN nang di Moses,

⁴⁹“Di ka Darŭd Abarim di tarun tana Moab bistatang ngga kupo Jericho; maad Darŭd Nebo ka tingga tarun tana Canaan adi Aku re nggen di daya Israel.

⁵⁰Kuu re kabŭs di darŭd anŭ nimun jurud mu Aaron kabŭs di Darŭd Hor,

⁵¹sabab so-duwŭh ngan dŭh tŭtŭd di Aku di sirung jawin daya Israel. Di tika angān sindŭk batŭh piin di Meribah, adi sindŭk kupo Kadesh di tarun tana-pajam Zin, angān dŭh nggen stabi di Aku di sirung jawin daya bagŭ.

⁵²Kuu re tingga tarun tana anŭ so jo, pak kuu dŭh re sua mŭrŭt tarun tana anŭ adi Aku re nggen di daya Israel.”