Read Biatah Bidayuh DITRONOMI 33 Bible Online

DITRONOMI 33 - Biatah Bidayuh bible

DITRONOMI 33

¹Ati inŭh berkat adi Moses, urun Tapa, nggen di daya Israel diŭ so ayŭh kabŭs.

²TUHAN mandŭg so Darŭd Sinai; Ayŭh makat mun batŭh andu nyirungan Edom, ka nyekar di tunduh daya-I so Darŭd Paran. Simŭng ribu naan malaikat agi ngga Ayŭh; jireb apui di tangan tauh-I.

³TUHAN rindu daya-I[28] ka grindung ngara adi-I dapu. Sabab anŭ meh ata sidikang di kaja-I ka tunda pinyipesan-I.

⁴Ata tunda Ukum-adat adi Moses nggen di ata, bisaka bās bangsa ta.

⁵TUHAN jadi raja daya-I Israel, kan tibaran tibaran-asar ngga bara pinguru ngara tikuruk.

⁶Pasar tibaran-asar Reuben, Moses nang: “Isa-i Reuben dŭh rarap, Sunggu daya ngara nisŭ.”

⁷Pasar tibaran-asar Judah, ayŭh nang: “TUHAN, dingah sirŭŭn ngara mite turung; pari nyindi ngara ngga tibaran tibaran-asar adi bŭkŭn. Birawan yŭn ngara, TUHAN, ka turung ngara rawan pinganyu ngara.”[29]

⁸ Pasar tibaran-asar Levi, ayŭh nang: “Kaam, TUHAN, kiren pinyiraan Mai so kuasa Urim ngga Thummim[30] so ka urun Mai daya Levi adi tŭtŭd; Kaam mbŭh suba ngara di Massah ka di piin Meribah Kaam mbŭh natu ngara sawŭ.

⁹Ngara mbŭh kiren pinyitŭtŭd-i adi bās di Kaam so di pimas, jurud ngga di bara anak ngara. Ngara tunda pesan Mai. Ka tŭtŭd di simanya Mai.

¹⁰Ngara re ngajar daya Mai bada tunda Ukum-adat Mai; ngara re jugan sadis di mija-sambah Mai.

¹¹TUHAN, turung tibaran-asar ngara bada bitambah bake; bada munos asŭng Mai di kraja pingandai ngara. Pirandŭk sopŭrŭg pinganyu ngara; bada ngara dŭh tia makat.”

¹²Pasar tibaran-asar Benjamin, ayŭh nang: “Ati inŭh tibaran-asar adi TUHAN rindu ka grindung; Ayŭh kingat jaga ngara sitian tian-i. Ka Ayŭh rŭŭ di ruang ngara.”[31]

¹³Pasar tibaran-asar Joseph, ayŭh nang: “Isa-i TUHAN nyiberkat tana ngara ngga ujen ka ngga piin so ribo tana.

¹⁴Isa-i tana ngara dog nyiberkat ngga buwa buwa adi masak da sura, kaya ngga buwa buwa adi siabo kana di barang tipuh jajak.

¹⁵Isa-i sandah tibawang amba ngara puno ngga buwa buwa adi siabo kana.

¹⁶Isa-i tana ngara brisi ngga sopŭrŭg kayuh adi kana, dog nyiberkat ngga mandis TUHAN, adi muko minyu so anak tŭngŭn kayuh adi bijagu apui dieh. Isa-i sopŭrŭg berkat ati mandŭg ka tibaran-asar Joseph, sabab ayŭh mbŭh jadi pinguru di dupan adŭp ngara adi bijurud.

¹⁷Joseph biyŭn pinyibake dari sapi, ka biyŭn tanduk dari sapi tarun, tanduk-i inŭh sesang manasseh adi biribu ribu, ka sesang Ephraim bipuru ribu. Ngga ngara Ayŭh nanduk bagŭ bangsa daya, ka turak ngara ndŭg bŭngŭn ong.”

¹⁸Pasar tibaran-asar Zebulum ngga Issachar, ayŭh nang: “Isa-i Zebulum mujur di dagang ngara di rais tami, ka isa-i pinyikaya Issachar bitambah bagŭ darŭm rais adŭp-i.

¹⁹Ngara bagan daya pinami bada mandŭg ka darŭd ngara; diginŭ ngara jugan sadis adi batur. Ngara dapŭd pinyikaya ngara so rawŭt ka so sumat adi di tabing rawŭt.”

²⁰Pasar tibaran-asar Gad, ayŭh nang: “Puji ka TUHAN, adi bada tarun tana ngara bayah. Gad kajŭn mun singah an nyiratak tangan bait nyirigat kurit ubak.

²¹Ngara tambit yŭn adŭp-i tarun tana adi siabo kana; tah utung bara pinguru dog nggen di ngara. Ngara tunda pesan ngga ukum-adat TUHAN kan bara pinguru Israel mbŭh mandŭg tikuruk.”[32]

²²Pasar tibaran-asar Dan, ayŭh nang: “Dan inŭh singah adi gibabŭ mara; ayŭh mirupat ruah so Bashan.”

²³Pasar tibaran-asar Naphtali, ayŭh nang: “Naphtali mbŭh raru biberkat bada mandis TUHAN; bayah tarun tana ngara inŭh so Danu Galilee ndŭg siratan.”

²⁴Pasar tibaran-asar Asher, ayŭh nang: “Asher mbŭh dog nyiberkat rabis dŭ so tibaran-asar adi bŭkŭn. Isa-i ayŭh dog nyirot bara jurud-i, ka isa-i tung jangi tana puno ngga risŭn kanā.

²⁵Isa-i tung jangi kupo dog grindung ngga tiban buwang basi, ka isa-i ayŭh ari udip ngga siramat.”

²⁶Angān daya Israel, mating tapa bŭkŭn re mun Tapa ngan, panu darŭm bragah mutas rangit, panu tambus abun di turung angān.

²⁷Tapa taŭn siraru jadi pinyigrindung ngan; Tangan-I adu adu jadi pinyibatu ngan. Ayŭh pibu pinganyu ngan darŭm angān masang, ka kidaan di angān bada siŭ ngara.

²⁸Jadi bara sesang Jacob udip darŭm damai, pagŭng di tarun tana adi puno ngga gandom ka wain, ka tana anŭ dog misa sipot-abun so rangit.

²⁹O Israel, mbŭh raru gaŭn inŭh angān! Mating daya bŭkŭn mun angān, bangsa adi dog nyiramat TUHAN. Adŭp TUHAN inŭh pinangin ngga pedang ngan, adi grindung ka nggen pimanang di angān. Pinganyu ngan re mandŭg mite masi, ka angān re bidigang di tunduh ngara.