Read Biatah Bidayuh DITRONOMI 4 Bible Online

DITRONOMI 4 - Biatah Bidayuh bible

DITRONOMI 4

¹Komŭnŭ Moses nang di bara daya, “Sita sopŭrŭg ukum-adat adi aku ko ngajar di angān, ka angān re udip ka ngisi tarun tana adi TUHAN, adi Tapa tayung-babuk ngan, nggen di angān.

² Dŭhnyah nambah di kayuh adi aku ko pesan di angān, ka dŭhnyah kadi ani ani so dieh. Tunda pesan TUHAN adi Tapa ngan, adi aku muko nggen di angān.

³ Adŭp ngan muko kiris kayuh adi TUHAN mbŭh ndai di Darŭd Peor. Ayŭh pirarap barang naan daya adi nyambah Baal diginŭ,

⁴pak sinadan angān adi tŭtŭd di TUHAN adi Tapa ngan, gibabŭ udip ndŭg andu ati.

⁵“Aku mbŭh ngajar sopŭrŭg ukum-adat di angān, nimun adi TUHAN adi Tapa ku muko bada. Sita-i di tarun tana adi angān re nyerang ka ngisi.

⁶Sita-i ngga atin tŭtŭd, ka simŭnŭ angān re kiren di bangsa bangsa bŭkŭn munki masam bijak angān. Kan ngara dingah sopŭrŭg ukum-adat anŭ, ngara re nang, ‘Sawŭ bijak ngga mirati bangsa adi bās anŭ!’

⁷“Mating bangsa bŭkŭn adi raru bās bait kani, biyŭn tapa adi raru sindŭk di tipuh ngara biguna dieh mun TUHAN adi Tapa ta ngga ata. Ayŭh nam ata kan ata mite turung.

⁸Mating bangsa bŭkŭn, adi raru bās bait kani, biyŭn ukum-adat adi raru tŭnggŭn mun anŭ adi aku mbŭh ngajar di angān andu ati.

⁹Ari bijaga! Ingat batur batur ka dŭhnyah kambŭt, sitŭkŭd udip ngan, kayuh adi angān muko kiris ngga batuh adŭp ngan. Kidaan di bara anak ngan ngga di bara anak sukuh ngan,

¹⁰pasar andu adi ngga angān mijog di sirung jawin TUHAN adi Tapa ngan di Darŭd Sinai,[4] di tika Ayŭh nang di aku, ‘Nguruk bara daya. Aku raan ngara dingah kayuh adi re Ku nang, isa ngara bisa birajar dingah pinganang Ku sitŭkŭd ngara udip, ka isa ngara ngajar bara anak ngara bada ndai simŭnŭ gŭh.’

¹¹ “Kidaan di bara anak ngan simuki angān di ka mijog di sigŭn darŭd anŭ adi dog nutu asuh tabar adi singŭt ngga apui adi bijagu ndŭg rangit.

¹²Kidaan di ngara simuki TUHAN mbŭh minyu ngga angān so apui anŭ, simuki angān dingah Ayŭh minyu pak dŭh tungang kiris Ayŭh darŭm raŭn gayŭn-I.

¹³ Ayŭh mbŭh kidaan di angān ani kayuh adi angān dŭh siŭn dŭh ndai ngga sita simanya adi muko-I ndai ngga angān -- angān dŭh siŭn dŭh tunda sopŭrŭg Simŭng Pinyipesan, adi Ayŭh mbŭh nuris di duwŭh kiping batuh.

¹⁴ TUHAN mbŭh bada aku ngajar sopŭrŭg ukum-adat adi angān dŭh siŭn dŭh tunda di tarun tana adi angān mbŭh re nyerang ka ngisi.

¹⁵“Kan TUHAN minyu ngga angān so apui di Darŭd Sinai, angān mating kiris raŭn gayŭn kayuh. Yŭn kana adŭp ngan, nakit ingat

¹⁶ dŭhnyah angān ndai dosa, anŭ inŭh ndai yŭn adŭp ngan tibudo darŭm tadŭ mun gayŭn, bait-i mun dari puan kah dayung,

¹⁷ mun dāng puan kah manuk,

¹⁸dāng adi bigawang, puan kah iken.

¹⁹Dŭhnyah dog pinyisuba an nyambah ka bituan di kayuh adi angān kiris di rangit -- batŭh andu, buran ngga bitang bitang. TUHAN adi Tapa ngan mbŭh nggen kayuh kayuh anŭ ka sopŭrŭg daya bŭkŭn, bada ngara nyambah.

²⁰ Pak angān inŭh daya adi Ayŭh mbŭh piruah so Egypt, buwang apui adi bijagu anŭ. Ayŭh taban angān ruah, yŭn bada angān jadi daya adŭp-I, mun angān madin.

²¹ Sitagar angān, TUHAN adi Tapa ngan mbŭh baji di aku, ka mbŭh bipayu nang aku dŭh re mutas Yang Jordan ka mŭrŭt tarun tana damŭn anŭ adi nggen-I di angān.

²²Aku re kabŭs di tarun tana ati ka ruro dŭh re mutas Yang anŭ, pak angān aŭn re mutas ka ngisi tarun tana damŭn anŭ.

²³Ingat batur batur dŭhnyah angān kambŭt simanya adi TUHAN adi Tapa ngan mbŭh ndai ngga angān. Tunda pinyipesan-I dŭh ndai yŭn adŭp ngan tadŭ masam tibudo.

²⁴ Sabab TUHAN adi Tapa ngan agi keya ka jireb apui adi bijagu; Ayŭh dŭh raan dog nyambah bigaur ngga tapa tapa adi bŭkŭn.

²⁵“Kan angān mbŭh tui rŭŭ di tarun tana anŭ ka mbŭh biyŭn bagŭ anak ngga sukuh, dŭhnyah bidosa ndai tadŭ masam tibudo. Anŭ inŭh sarah di batŭh TUHAN ka re bada Ayŭh baji.

²⁶Aku bagan rangit ngga tana jadi saksi rawan angān andu ati nang, kambŭi angān nyibireu aku, angān re miyap so tarun tana anŭ. Angān dŭh re tui rŭŭ di tarun tana di pah mandi Yang Jordan adi angān re ngisi. Angān re abo dog pirabur.

²⁷ TUHAN re bada angān papar sasah di dupan bangsa bangsa bŭkŭn, ka raru nisŭ adŭ bara ngan re udip.

²⁸Diginŭ angān re bituan di masam masam tapa adi dog ndai ngga tangan manusia, tapa adi dog ndai so kayuh ngga batuh, tapa adi dŭh kiris tarun puan kah dŭh dingah ani ani, dŭh man puan kah dŭh kadŭk kayuh.

²⁹ Diginŭ angān re jiroh TUHAN adi Tapa ngan, ka kambŭi angān jiroh Ayŭh ngga siabo atin ngan, angān re dapŭd ayŭh.

³⁰Kan angān dog pinyusah ka sopŭrŭg anŭ dog angān, nŭ ka angān re rango pari ka TUHAN ka dingah pinganang-I.

³¹Ayŭh inŭh Tapa adi masi. Ayŭh dŭh re tagan angān puan kah pirabur angān, ka Ayŭh dŭh re kambŭt simanya adi adŭp-I muko ndai ngga tayung-babuk ngan.

³²“Pari ingat kayuh adi jah, jaman adi ngga angān gibayuh dog biranak, ndŭg ka jaman Tapa napa manusia di ong. Di ndi ong ong, mbŭh kah kayuh adi raru grua mun ati jadi? Mbŭh kah daya dingah kayuh adi mun ati?

³³Mbŭh kah daya gibabŭ udip ripas muko dingah tapa minyu ngga ngara so jireb apui, nimun ka angān gibabŭ udip?

³⁴Agi kah tapa adi pagan tambit daya so bangsa bŭkŭn ka bada ngara jadi daya adŭp-i, nimun adi TUHAN adi Tapa ngan mbŭh ndai yŭn ngan di Egypt? Angān mbŭh kiris ngga batŭh adŭp ngan Ayŭh pakai kuasa bās-I ngga pinyibake-I. Ayŭh nimbur sesak-andam ngga perang. Ayŭh ndai pingandai-nginga ngga pingandai saruh, ka bada kayuh adi bisā timbur.

³⁵ TUHAN mbŭh kiren di angān kayuh anŭ, ngga kiren di angān nang adŭp-I sadi adŭ Tapa, mating adi bŭkŭn.

³⁶Ayŭh bada angān dingah sirŭŭn-I so rangit isa Ayŭh bisa pitayan angān, ka digiti di ong Ayŭh bada angān kiris apui-I adi kudus adi so-I minyu ngga angān.

³⁷Sabab Ayŭh rindu tayung-babuk ngan, Ayŭh mien angān, ka ngga kuasa-I adi bās Ayŭh mbŭh taban angān ngga ruah so Egypt.

³⁸Darŭm angān masang panu, Ayŭh pibu bangsa bangsa adi bās dŭ ka bake dŭ so angān, isa Ayŭh bisa taban angān ngga mŭrŭt tarun tana ngara, ka nggen di angān tarun tana ngara, tana adi angān babŭ dapu madin.

³⁹Jadi ingat andu ati ka dŭhnyah kambŭt: TUHAN inŭh Tapa di rangit ngga di ong. Mating tapa adi bŭkŭn.

⁴⁰Tunda sopŭrŭg ukum adat-I adi muko aku nggen di angān andu ati, isa angān ngga bara sesang ngan dapŭd sanang. Angān re babŭ rŭŭ di tarun tana adi TUHAN adi Tapa ngan nggen di angān, bada angān adu adu dapu.”

⁴¹ Komŭnŭ Moses nitah taruh kupo tura ka timor Yang Jordan

⁴²yŭn daya bu bisukan ka siramat kambŭi ayŭh ko siŭ daya ngga dŭh singaja, daya adi dŭh gŭh pinganyu-i. Ayŭh siŭn bu bisukan di ndi so taruh kupo anŭ di yŭn-i dŭh dog siŭ.

⁴³Yŭn tibaran-asar Reuben kupo adi mun anŭ agi di Bezer, di gadung tarun tana-pajam adi rata buang bayah bigatung; yŭn tibaran-asar Gad inŭh Ramoth, di tarun tana Gilead; ka tah yŭn tibaran-asar Manasseh inŭh Golan, di tarun tana Bashan.

⁴⁴Moses nggen ukum-adat ka ajar Tapa di daya Israel.

⁴⁵Anŭ inŭh ripas ngara mbŭh ruah so Egypt ka mbŭh di rubān tura ka timor Yang Jordan, bistatang ngga kupo Bethpeor, adi ngga-i nggen di ngara ukum-adat anŭ. Anŭ inŭh tarun tana adi dawŭ-i dog dapu Raja Sihon adi daya Amor, adi mritah di kupo Heshbon. Moses ngga daya Israel ngarah ayŭh di tika ngara ruah so Egypt.

⁴⁶

⁴⁷Ngara ngisi tarun tana-i samŭn tarun tana Raja Og so Bashan, adi daya Amor ka raja anŭ ndi adi rŭŭ di timor Yang Jordan.

⁴⁸Tarun tana anŭ bayah-i so kupo Aroer di bŭngŭn Yang Arnon jeh ka utara ndŭg Darŭd Sirion,[5] anŭ inŭh Darŭd Hermon.

⁴⁹Anŭ mbŭh samŭn sopŭrŭg gadung tarun tana di timor Yang Jordan, jeh ka siratan ndŭg Rawŭt Pide, ka tura ka timor sigŭn Darŭd Pisgah.