Read Biatah Bidayuh DITRONOMI 5 Bible Online

DITRONOMI 5 - Biatah Bidayuh bible

DITRONOMI 5

¹Moses bagan bada mandŭg tikuruk sopŭrŭg daya Israel ka nang di ngara, “Angān daya Israel, dingah sopŭrŭg ukum-adat adi aku nggen di angān andu ati. Birajar nŭh ka nakit ingat adŭp nŭh tunda-i.

²Di Darŭd Sinai TUHAN adi Tapa ta ndai simanya,

³dŭh ngga tayung-babuk ta adŭ, pak ngga sopŭrŭg ta adi udip andu ati.

⁴Di sambu darŭd anŭ TUHAN minyu di angān situra jawin so darŭm apui.

⁵Nganŭ aku mijog di asah angān ngga TUHAN, kidaan di angān kayuh adi nang-I, amai angān taru di apui anŭ ka dŭh raan maad ka sambu darŭd anŭ. “TUHAN nang,

⁶‘Aku ati TUHAN adi Tapa ngan, adi pirupas angān so Egypt, adi yŭn ngan ko jadi urun.

⁷“ ‘Dŭhnyah nyambah tapa bŭkŭn, adŭ-i Aku.

⁸ “ ‘Dŭhnyah ndai tibudo yŭn adŭp ngan tunda gayŭn tadŭ tadŭ kayuh di rangit bait di ong, puan kah di piin di ribo tana.

⁹ Dŭhnyah mutu ubak ngan ka tadŭ tadŭ tibudo puan kah nyambah-i, sabab Aku ati TUHAN adi Tapa ngan ka Aku dŭh raan angān biyŭn tapa adi bŭkŭn. Aku ngukum daya adi tiru di Aku samŭn sesang sesang ngara ndŭg turap adi taruh ngga turap adi pat.

¹⁰Pak Aku kiren pinyirindu Ku di biribu ribu turap[6] manusia adi rindu di Aku ka tunda ukum-adat Ku.

¹¹ “ ‘Dŭhnyah pakai adŭn Ku yŭn kayuh adi arap, amai Aku, TUHAN adi Tapa ngan, re ngukum tadŭ tadŭ daya adi nyiraba Adŭn Ku.

¹² “ ‘Sita andu Sabbath ka bada-i jadi kudus, amai Aku, TUHAN adi Tapa ngan, mbŭh pesan angān.

¹³ Angān biyŭn nŭm andu adi ngga angān ndai kraja ngan,

¹⁴pak andu adi ju inŭh andu rŭŭ so kraja adi dog nitah ka Aku. Di andu anŭ mating daya siŭn nyiraja, bait-i adŭp ngan, anak ngan, urun ngan, dāng ngan, puan kah daya pinami adi rŭŭ di rais ngan.

¹⁵Ingat adŭp ngan ko jadi urun di Egypt, ka Aku, TUHAN adi Tapa ngan mbŭh piruah angān ngga kuasa bās ka pinyibake Ku. Anŭ sabab Aku pesan angān bada sita andu Sabbath.

¹⁶ “ ‘Stabi di sindŭ sama ngan, nimun Aku, TUHAN adi Tapa ngan, pesan angān, isa angān sanang ka isa angān tui udip di tarun tana adi Aku nggen di angān.

¹⁷ “ ‘Dŭhnyah siŭ daya.

¹⁸ “ ‘Dŭhnyah tanggah.

¹⁹ “ ‘Dŭhnyah naku.

²⁰ “ ‘Dŭhnyah nggen taksi kadong pasar tadŭ daya.

²¹ “ ‘Dŭhnyah ripong di sawŭn daya; dŭhnyah ripong di ramin-i, tana-i, urun-i, sapi sapi-i, kaldi-i, puan kah tadŭ tadŭ kayuh bŭkŭn adi ayŭh dapu.’

²² “Anŭ inŭh Pinyipesan adi TUHAN mbŭh nggen di sopŭrŭg ngan di tika angān tikuruk di darŭd anŭ. Kan Ayŭh minyu ngga sirŭŭn adi bana so darŭm apui ka so abun adi tabar, Ayŭh nggen Pinyipesan anŭ ka mating adi bŭkŭn. Muko anŭ Ayŭh nuris-i di duwŭh kiping batuh ka nggen-i di aku.

²³“Kan apui sakŭt di ndi darŭd darŭd anŭ ka angān dingah sirŭŭn so yŭn karŭm anŭ, bara pinguru ngga bara pingubak tibaran tibaran-asar ngan mandŭg ka yŭn ku

²⁴ka nang, ‘TUHAN adi Tapa ta mbŭh kiren di ata kuasa ngga bragah-I kan ata dingah Ayŭh minyu so darŭm apui! Andu ati ata mbŭh kiris nang daya tatu bisa gibabŭ udip, sunggu Tapa muko minyu ngga ngara.

²⁵Pak mani ata birani ton apŭg asŭng ta dinge? Apui adi bās anŭ re pirabur ata. Ata manŭn re kabŭs kan ata dingah TUHAN adi Tapa ta minyu dinge.

²⁶Mbŭh kah tadŭ tadŭ manusia gibabŭ udip ripas muko dingah Tapa adi udip minyu so darŭm apui?

²⁷Di pari, Moses, ka nyiringa sopŭrŭg kayuh adi TUHAN adi Tapa ta nang. Muko anŭ, pari ka kidaan di kieh kayuh adi nang-I di kuu. Kieh an dingah ka tunda-i.’

²⁸“Kan TUHAN dingah anŭ, Ayŭh nang di aku, ‘Aku mbŭh dingah kayuh adi nang ngara, ka pinganang ngara agi batur.

²⁹Kasi kah kambŭi ngara ari mun anŭ! Kasi kah kambŭi ngara ari stabi di Aku ka tunda sopŭrŭg pesan Ku, isa ngara ngga bara sesang ngara adu adu sanang.

³⁰Di kidaan di ngara bada pari ka bari ngara.

³¹Pak kuu, Moses, rŭŭ digiti ngga Aku, ka Aku re nggen di kuu sopŭrŭg ukum-adat ngga pesan Ku. Ngajar sopŭrŭg-i di ngara isa ngara tunda-i di tarun tana adi Aku nggen di ngara.’

³²“Angān daya Israel, ingat nakit angān dŭh siŭn dŭh ndai sopŭrŭg kayuh adi TUHAN adi Tapa ngan mbŭh pesan di angān. Dŭhnyah nyibireu tadŭ tadŭ ukum adat-I.

³³Tunda sopŭrŭg-i, isa angān sanang ka isa angān tui udip di tarun tana adi angān re ngisi.