Read Biatah Bidayuh DITRONOMI 7 Bible Online

DITRONOMI 7 - Biatah Bidayuh bible

DITRONOMI 7

¹ “TUHAN adi Tapa ngan re taban angān mŭrŭt tarun tana adi angān re ngisi, ka Ayŭh re pibu bagŭ bangsa so dieh. Buang angān masang, Ayŭh re pibu ju bangsa adi bās dŭ ka bake dŭ so angān: bara daya Hitti, daya Girgash, daya Amor, daya Canaan, daya Periz, daya Hivi, ngga daya Jebus.

²Kan TUHAN adi Tapa ngan na bara daya anŭ ka darŭm kuasa ngan ka angān ngarah ngara, angān dŭh siŭn dŭh siŭ sopŭrŭg ngara. Dŭhnyah bipambit ngga ngara puan kah kiren masi di ngara.

³Dŭhnyah banan sawan ngga tadŭ tadŭ ngara anŭ, ka dŭhnyah gŭh bada anak anak ngan banan sawan ngga tadŭ tadŭ so anak ngara,

⁴sabab simŭnŭ ngara re bada bara anak ngan bu so TUHAN di nyambah tapa tapa bŭkŭn. Kambŭi kayuh jadi simŭnŭ, TUHAN re baji di angān ka rasu pirabur angān.

⁵ Ngapŭi meh, nyirubuh mija mija-sambah ngara, mapar bada randŭk uros uros-batuh pirapu' ngara, tabŭng tandā tandā pinatŭng tapa Asherah ka sigot tibudo tibudo ngara.

⁶ Ndai anŭ amai angān dog dapu TUHAN adi Tapa ngan. So sopŭrŭg daya adi di ong ati Ayŭh mbŭh mien angān adŭ bada jadi daya tah yŭn adŭp-I.

⁷“TUHAN rindu angān, ka mien angān dŭh sabab angān bagŭ dŭ so daya bangsa bŭkŭn; angān ko bangsa adi rabis sŭ di ong.

⁸Pak TUHAN rindu angān ka raan sita janji adi Ayŭh muko ndai ngga tayung-babuk ngan. Ngapŭi Ayŭh nyiramat angān ngga pinyibake-I adi bās ka pirupas angān so jadi urun raja Egypt.

⁹ Ingat nang TUHAN adi Tapa ngan adŭ adi Tapa ka Ayŭh taŭn tŭtŭd. Ayŭh re sita simanya-I ka kiren pinyirindu-I adi dŭh bisa birubah di siribu turap daya adi rindu Ayŭh ka tunda pinyipesan-I,

¹⁰pak Ayŭh dŭh re ngang ngukum sinadan daya adi tiru di Ayŭh.

¹¹Jadi meh, tunda kayuh adi muko dog ngajar di angān; tunda sopŭrŭg ukum-adat adi aku mbŭh nggen di angān andu ati.

¹² “Kambŭi angān dingah pesan ati ka tunda-i ngga atin tŭtŭd, taŭn TUHAN adi Tapa ngan re babŭ sita simanya-I ngga angān, ka re kiren pinyirindu-I adi dŭh bisa birubah, nimun adi Ayŭh mbŭh janji di tayung-babuk ngan.

¹³Ayŭh re rindu angān ka nyiberkat angān, isa angān bitambah bagŭ ka biyŭn bagŭ anak; Ayŭh re nyiberkat tana ngan, isa angān dapŭd bagŭ gandom, wain, ka inyo kanā; ka Ayŭh re nyiberkat angān ngga bagŭ sapi ka biri. Ayŭh re nggen di angān sopŭrŭg berkat ati di tarun tana adi Ayŭh muko bijanji di bara tayung-babuk ngan an nggen di angān.

¹⁴Mating bangsa daya di ong re raru biberkat mun angān. Mating so angān re jadi aboh, ka sopŭrŭg dāng kudip ngan re papah.

¹⁵TUHAN re grindung angān so sopŭrŭg andam, ka Ayŭh dŭh re bada nyatŭk angān tadŭ mun andam adi bisā adi muko angān kinyam di Egypt, pak Ayŭh re bada-i nyatŭk sopŭrŭg pinganyu ngan.

¹⁶Pirusak barang bangsa adi TUHAN adi Tapa ngan na di darŭm kuasa ngan, ka dŭhnyah kiren pinyirasi di ngara. Dŭhnyah nyambah tapa tapa ngara, amai anŭ kayuh adi bisa pirabur angān.

¹⁷“Dŭhnyah pikir nang bara daya anŭ bagŭ dŭ so adŭp ngan, ka angān dŭh tungang pibu ngara.

¹⁸Dŭhnyah taru ngara; ingat kayuh adi TUHAN adi Tapa ngan mbŭh ndai di tunduh raja Egypt ngga sopŭrŭg rayat-i.

¹⁹Ingat nŭh sesak-andam adi angān mbŭh kiris ngga batŭh adŭp ngan, pingandai-nginga, ngga pingandai saruh, ka kuasa bās ngga pinyibake adi ngga TUHAN adi Tapa ngan pirupas angān. Simŭnŭ Ayŭh pirabur daya Egypt, simŭnŭ gŭh Ayŭh re pirabur sopŭrŭg daya anŭ adi angān taru madin.

²⁰Ayŭh re bada ngara kandang-kandŭ taru[9] ka re pirabur sinadan ngara adi bu bisukan.

²¹Ngapŭi dŭhnyah taru bara daya anŭ. TUHAN adi Tapa ngan agi ngga angān; Ayŭh inŭh Tapa adi bās ka Ayŭh inŭh adi patut ata taru.

²²Ayŭh re birunyet pibu bangsa bangsa anŭ darŭm angān masang. Angān dŭh re tungang kubo siŭ sopŭrŭg ngara jam anŭ, amai, kambŭi angān ndai simŭnŭ, dāng dāng tarun re papah ka jadi pinyusah di angān.

²³TUHAN re na pinganyu ngan di darŭm kuasa ngan ka bada ngara kandang-kandŭ taru ndŭg ka ngara abo dog pirabur.

²⁴Ayŭh re na raja raja ngara ka darŭm kuasa ngan. Angān re siŭ ngara, ka ngara re dog kambŭt. Mating daya re tungang pirŭŭ angān; angān re pirabur barang naan ngara.

²⁵Sigot dudu tibudo ngara. Dŭhnyah ripong di pirak puan kah mas adi dog na di tibudo tibudo anŭ, ka dŭhnyah gŭh tambit-i yŭn adŭp ngan. Kambŭi angān ndai simŭnŭ, angān re dog nyatŭk pinyusah, amai TUHAN tiru di pingandai nyambah tibudo.

²⁶Dŭhnyah taban tadŭ tadŭ so tibudo anŭ ka darŭm ramin ngan, amai te pangu anŭ adi nyatŭk ngara nyatŭk gŭh angān rai-i. Angān dŭh siŭn dŭh tiru ka ngamun tibudo tibudo anŭ, amai-i mbŭh dog mangu TUHAN.