Read Biatah Bidayuh DITRONOMI 8 Bible Online

DITRONOMI 8 - Biatah Bidayuh bible

DITRONOMI 8

¹“Tunda ngga atin tŭtŭd sopŭrŭg ukum-adat adi aku mbŭh nggen di angān andu ati, isa angān udip, bitambah bagŭ ka ngisi tarun tana adi TUHAN ko janji di tayung-babuk ngan.

²Ingat simuki TUHAN adi Tapa ngan mbŭh nguru angān di pimanu adi raru jo mutas tarun tana-pajam pat puru sawa; bada angān jera ngga-I suba angān, yŭn-I an puan kayuh adi re ngan ndai, ka re ngan tunda kah dŭh pinyipesan-I.

³ Ayŭh bada angān sibŭrŭk, ka komŭnŭ Ayŭh nggen manna di angān bada man, pinguman adi angān ngga tayung-babuk ngan bŭn man diŭ so anŭ. Ayŭh ndai simŭnŭ ngga ngajar angān bada dŭhnyah bisangan di ruti adŭ ngga kudip adŭp ngan, pak di sopŭrŭg kayuh adi TUHAN nang.

⁴Sitadŭn pat puru sawa anŭ, piraka ngan dŭh bayu, kaja ngan dŭh gŭh bŭ.

⁵Ingat nŭh TUHAN adi Tapa ngan ngajar ka ngukum angān keya ka pimas daya ngajar ka ngukum bara anak ngara.

⁶Ngapŭi meh, ndai nimun TUHAN mbŭh pesan: udip nanyam ka ukum adat-I ka tunda pinganang-I.

⁷TUHAN adi Tapa ngan taban angān ngga mŭrŭt tarun tana adi damŭn, tarun tana adi agi bagŭ sungi ngga rubang piin, ka sungi sungi di ribo tana adi minapus di dau dau ka di dudu sandah,

⁸tarun tana adi piruah gandom ngga jeri, buwa anggor, buwa ara, buwa delima, buwa kanā ngga ju banyis.

⁹Diginŭ angān dŭh re sibŭrŭk puan kah biguna di ani ani. Batuh batuh-i agi basi dieh, ka so sandah sandah-i angān bisa dapŭd timaga.

¹⁰Angān re biyŭn sopŭrŭg adi raan ngan man, ka angān re nggen trima kaseh ka TUHAN adi Tapa ngan amai tana damŭn anŭ adi Ayŭh mbŭh nggen di angān.

¹¹ “Dŭhnyah angān ngapŭh kambŭt TUHAN adi Tapa ngan. Dŭhnyah dŭh tunda tadŭ tadŭ ukum adat-I adi aku nggen di angān andu ati.

¹²Kan angān mbŭh biyŭn sopŭrŭg adi raan ngan man ka mbŭh pijog ramin ramin adi kana yŭn rŭŭ,

¹³ka kan sapi ngga biri ngan, mas ngga pirak, ka sopŭrŭg buat-rata ngan adi bŭkŭn mbŭh bitambah,

¹⁴nakit ingat dŭhnyah angān jadi gambung ka kambŭt TUHAN adi Tapa ngan adi piruah angān so Egypt, adi yŭn ngan ko jadi urun.

¹⁵Ayŭh nguru angān mutas tarun tana-pajam adi bayah ka adi pitaru adi yŭn dudu jippŭh adi bisā ngga dudu rikara. Di tarun tana anŭ adi badŭh ka mating piin Ayŭh bada piin ruah aman so panggar batuh yŭn ngan.

¹⁶Di tarun tana-pajam Ayŭh nggen manna di angān bada man, pinguman adi tayung-babuk ngan bŭn man. Ayŭh bada pimudip ngan jera ngga-I suba angān, isa di pinŭbŭn-i Ayŭh bisa nyiberkat angān ngga kayuh kayuh adi kana.

¹⁷Ngapŭi meh, angān dŭh siŭn pikir adŭp ngan mbŭh jadi kaya so ka kuasa ngga pinyibake adŭp ngan.

¹⁸Ingat nŭh meh TUHAN adi Tapa ngan adi nggen kuasa di angān bada angān jadi kaya. Ayŭh ndai simŭnŭ amai Ayŭh gibabŭ tŭtŭd andu ati di simanya adi Ayŭh mbŭh ndai ngga bara tayung-babuk ngan.

¹⁹Dŭhnyah kambŭt TUHAN adi Tapa ngan puan kah nyambah ka bituan di tapa tapa adi bŭkŭn. Kambŭi angān ndai simŭnŭ, aku bakan angān andu ati, angān manŭn re dog pirabur.

²⁰Kambŭi angān dŭh tunda pinganang TUHAN, angān manŭn re dog pirabur keya ka dudu bangsa anŭ adi Ayŭh re pirabur darŭm angān masang.