Read Biatah Bidayuh DITRONOMI 9 Bible Online

DITRONOMI 9 - Biatah Bidayuh bible

DITRONOMI 9

¹“Dingah, bara daya Israel! Madin angān mbŭh re mutas Yang Jordan ka ngisi tarun tana anŭ adi dog dapu bangsa bangsa adi rabis bās ka rabis bake so angān. Kupo kupo ngara bayah ka biyŭn sindung sindung adi bigatung ndŭg rangit.

²Bara ngara anŭ bigatung buang bake; ngara anŭ mun grigasi, ka angān mbŭh dingah gŭh nang mating daya tungang rawan ngara.

³Pak madin adŭp ngan re kiris TUHAN adi Tapa ngan re panu diŭ so angān mun apui adi bijagu. Ayŭh re ngarah ngara buang angān masang, isa angān pibu ngara ka rikas pirabur ngara, nanyam janji-I.

⁴“Ripas TUHAN adi Tapa ngan muko pibu ngara yŭn ngan, mba ngapŭh minyu dupan adŭp ngan nang Ayŭh mbŭh taban angān mŭrŭt ka tarun tana anŭ yŭn dapu-i amai angān daya adi patut dapu-i. Dŭh-i simŭnŭ, TUHAN re pibu ngara anŭ yŭn ngan sabab ngara anŭ arap.

⁵Dŭh inŭh sabab angān kana ka ndai kayuh adi batur TUHAN re bada angān dapu tarun tana ngara. Ayŭh re pibu ngara anŭ sabab ngara anŭ arap, ka sabab Ayŭh raan ingat janji adi ko-I ndai ngga babuk ngan Abraham, Isaac ka Jacob.

⁶Angān bisa natu nang TUHAN taŭn dŭh nggen di angān tarun tana anŭ adi damŭn sabab angān patut dapu-i. Dŭh, angān ati daya adi baking.

⁷“Dŭhnyah kambŭt munki angān bada TUHAN adi Tapa ngan baji, di tarun tana-pajam. So andu adi ngga angān ruah so Egypt ndŭg ka andu adi ngga angān ndŭg tarun ati, angān mbŭh rawan Ayŭh.

⁸Di Darŭd Sinai gŭh angān bada TUHAN baji, raru baji adi ngga-I pirabur angān.

⁹ Aku maad ka sambu darŭd di kambat duwŭh kiping batuh; duwŭh kiping batuh anŭ inŭh tandā simanya adi TUHAN mbŭh ndai ngga angān. Aku rŭŭ diginŭ pat puru andu ngga pat puru ngarŭm, ka dŭh man dŭh nok ani ani.

¹⁰Nganŭ TUHAN nggen di aku duwŭh kiping batuh adi yŭn-I mbŭh nuris ngga tangan adŭp-I kayuh adi mbŭh-I nang di angān so jireb apui di andu angān tikuruk di sigŭn darŭd anŭ.

¹¹Sawŭ, ripas pat puru andu ngga pat puru ngarŭm anŭ, TUHAN nggen di aku duwŭh kiping batuh anŭ, adi tandā simanya.

¹²“Komŭnŭ, TUHAN nang di aku, ‘Rikas mūn ka sigŭn darŭd, sabab bara daya mu, adi kuu mbŭh taban ngga ruah so Egypt, mbŭh pirusak adŭp ngara ka ndai kayuh adi arap. Ngara mbŭh nyibireu kayuh adi Aku pesan ngara da ndai, ka mbŭh ndai tibudo yŭn adŭp ngara.’

¹³“TUHAN nang gŭh di aku, ‘Aku puan nang munki raru baking-i ngara ati.

¹⁴Dŭhnyah suba pirŭŭ Aku. Aku taŭn an pirabur ngara, isa mating daya re tia ingat ngara. Komŭnŭ Aku re bada kuu jadi sama yŭn bangsa adi rabis bagŭ daya-i ka adi rabis bake so ngara.’

¹⁵“Komŭnŭ Aku mūn darŭd anŭ taban duwŭh kiping batuh anŭ di yŭn simanya dog nuris. Jireb apui ruah so darŭd.

¹⁶Aku kiris angān mbŭh nyibireu pesan TUHAN adi Tapa ngan mbŭh nggen di angān, ka angān mbŭh bidosa rawan Ayŭh amai angān mbŭh ndai yŭn adŭp ngan ndi tibudo so basi, darŭm gayŭn anak sapi.

¹⁷Ngapŭi di sirung jawin ngan, aku taran ka mape kiping batuh anŭ bada randŭk.

¹⁸Komŭnŭ ndi sidah dinge aku nyipŭŭb di sirung jawin TUHAN sitian pat puru andu pat puru ngarŭm ka dŭh man bait nok. Aku ndai simŭnŭ sabab angān mbŭh bidosa rawan TUHAN ka mbŭh bada Ayŭh baji.

¹⁹ Aku taru kiris baji TUHAN adi bisā, sabab Ayŭh mbŭh sukup baji an pirabur angān; pak sikari anŭ dinge TUHAN babŭ dingah aku.

²⁰TUHAN mbŭh sukup baji gŭh di Aaron ka an siŭ ayŭh, jadi aku bidua yŭn Aaron di tipuh anŭ gŭh.

²¹Aku tambit kayuh anŭ adi pingandai dosa ngan, anŭ inŭh tibudo anak sapi basi anŭ, ka taran-i ka darŭm apui. Komŭnŭ aku mape-i bada randŭk ka mupu-i bada jadi dabu, ka taran dabu-i ka sungi adi aman so darŭd.

²² “Angān bada gŭh TUHAN adi Tapa ngan baji di tika angān di Taberah, Massah, ka di Kibroth Hattaavah.

²³ Kan Ayŭh bada angān makat so Kadesh Barnea ngga pinganang bada angān tambit tarun tana adi Ayŭh nggen di angān, angān rawan Ayŭh; angān dŭh harap di Ayŭh ka angān nyibireu Ayŭh.

²⁴So sibungas aku puan angān, angān taŭn ari an rawan TUHAN.

²⁵“Jadi aku nyipŭŭb di sirung jawin TUHAN, pat puru andu ngga pat puru ngarŭm anŭ, sabab aku puan nang TUHAN taŭn mbŭh bigŭtŭ an pirabur angān.

²⁶Jadi aku bidua, ‘TUHAN Raja, dŭhnyah pirabur daya adŭp Mai, daya adi Kaam mbŭh piruah so Egypt pakai pinyibake ngga kuasa Mai adi bās.

²⁷Ingat urun urun Mai Abraham, Isaac ka Jacob, ka dŭhnyah mbit piduri di pinyibaking, urah ginaka ka dosa bara daya ati.

²⁸Amai te ka daya Egypt nang Kaam mbŭh dŭh tungang nguru bara daya Mai di ka tarun tana adi Kaam mbŭh bijanji an nggen di ngara rai-i. Ngara re nang Kaam taban daya Mai ka tarun tana-pajam an siŭ ngara, sabab Kaam tiru di ngara.

²⁹Amai mŭnŭ, ngara ati inŭh adi Kaam mbŭh mien bada jadi daya adŭp Mai, ka adi Kaam mbŭh taban ngga ruah so Egypt pakai kuasa ngga pinyibake Mai adi bās.’