Read Biatah Bidayuh JOHN 1 Bible Online

JOHN 1 - Biatah Bidayuh bible

JOHN 1

¹Diŭ so ong dog napa, Pinganang taŭn mbŭh agi; Pinganang agi ngga Tapa, ka Pinganang mbŭh Tapa.

²So sibungas-i Pinganang taŭn mbŭh agi ngga Tapa.

³Ngga Ayŭh Tapa napa sopŭrŭg kayuh; mating katŭn kayuh adi dog napa bisa jadi kambŭi dŭh ngga Ayŭh.

⁴Pinganang inŭh adi atak udip,[1] ka udip anŭ taban jawa ka manusia.

⁵Jawa anŭ nyekar darŭm karŭm, ka karŭm dŭh tungang ngarah-i.

⁶ Tapa pait pinyisung-I, dŭn John,

⁷da kidaan di sopŭrŭg daya pasar jawa anŭ, isa sopŭrŭg daya dingah ka sabah.

⁸Adŭp-i dŭh jawa anŭ, pak-i mandŭg di kidaan pasar jawa anŭ.

⁹Ati inŭh jawa adi sawŭ, adi mandŭg ka ong ka nyekar sopŭrŭg manusia.

¹⁰Pinganang mbŭh agi darŭm ong, ka sunggu Tapa mbŭh napa ong ngga Ayŭh, ong dŭh natŭng Ayŭh.

¹¹Ayŭh di ka rais adŭp-I, pak daya rais adŭp-I dŭh trima Ayŭh.

¹²Pak di sopŭrŭg ngara adi trima ka sabah di Ayŭh, Ayŭh nggen hak da jadi bara anak Tapa.

¹³Ngara dŭh jadi anak Tapa mun gaya manusia jadi anak sama-i so tibiat manusia; adŭp Tapa inŭh Sama ngara.

¹⁴Pinganang jadi manusia ka, puno ngga pinyirasi-mandis ngga pinyawŭ, mbŭh rŭŭ di ruang ta. Ata mbŭh kiris bragah-I; bragah adi-I kambat jadi Anak tambŭ Sama-I.

¹⁵John mbŭh minyu pasar Ayŭh. Ayŭh nang, “Ayŭh inŭh sianŭ adi nang ku kan aku nang, ‘Ayŭh mandŭg sundis so aku, pak Ayŭh agi bās dŭ so aku, sabab Ayŭh taŭn mbŭh agi diŭ so aku dog biranak.’ ”

¹⁶So kaya pinyirasi mandis-I Ayŭh mbŭh adu adu nyiberkat sopŭrŭg ta.

¹⁷Tapa mbŭh nggen Ukum-adat so ka Moses, pak pinyirasi-mandis ngga pinyawŭ mandŭg so ka Jesus Kristus.

¹⁸Manusia dŭh tungang kiris Tapa. Anak adi tambŭ, adi samah ngga Tapa ka adi ngapid Sama, mbŭh nggen puan pasar Ayŭh.

¹⁹Bara Pinguasa Jahudi di Jerusalem pait kada imam ngga daya daya Levi ka John da siken ayŭh, “Asi kuu?”

²⁰John dŭh abah nam, pak ngga tarang ayŭh kidaan, “Aku dŭh Kristus.”

²¹ “Asi meh kuu, garang?” ngara siken. “Kuu Elijah kah?” “Dŭh,” John nam. “Kuu nabi anŭ[2] kah?” ngara siken. “Dŭh,” ayŭh nam.

²²“Kidaan di kieh asi kuu,” ngara nang. “Kieh re kidaan di ngara adi pait kieh. Ani nang mu pasar adŭp mu?”

²³ John nam pakai pinganang nabi Isaiah: “Aku ati ‘sirŭŭn daya adi bagan di tarun tana-pajam: Bada tŭnggŭn aran yŭn Tuhan panu!’ ”

²⁴Bara pinyisung anŭ, adi dog pait bara daya Pharisee[3]

²⁵siken John, “Kambŭi kuu dŭh Kristus, dŭh gŭh Elijah, dŭh gŭh Nabi; mani kuu baptisa daya?”

²⁶John nam, “Aku baptisa ngga piin, pak di ruang ngan agi sianŭ adi angān dŭh puan.

²⁷Sunggu Ayŭh mandŭg sundis so aku, aku dŭh sukup kana re kuka bŭŭng kasut-I.”

²⁸Sopŭrŭg kayuh ati mbŭh jadi di Bethany tura ka timor Yang Jordan, di yŭn John baptisa daya.

²⁹Andu anŭ ndi, John kiris Jesus mandŭg tudu adŭp-i, ka nang, “Jeh rah-I no, Anak Biri Tapa, adi taran dosa ong!

³⁰Ayŭh inŭh sianŭ adi nang ku kan aku nang, ‘Agi daya mandŭg sundis so aku. Ayŭh agi bās dŭ so aku, sabab Ayŭh taŭn mbŭh agi diŭ so aku dog biranak.’

³¹Dŭh aku natŭng Ayŭh, pak aku mandŭg baptisa daya ngga piin siŭn Ayŭh dog puan daya Israel.”

³²Jadi John bisaksi: “Aku kiris Roh Kudus mūn, mun manuk asang so rangit, ka mbap di tunduh-I.

³³Aku gi-dŭh natŭng nang anŭ Ayŭh, pak Tapa, adi pait aku da baptisa ngga piin, ko nang di aku, ‘Kuu re kiris Roh Kudus mūn so rangit ka mbap di ndi naan Daya; Ayŭh inŭh adi baptisa daya ngga Roh Kudus.’

³⁴Aku mbŭh kiris kayuh ati,” John nang, “ka aku kidaan di angān Ayŭh inŭh Anak Tapa.”

³⁵Andu anŭ ndi John agi mijog diginŭ dinge ngga duwŭh naan murid-I,

³⁶kan ayŭh kiris Jesus murah. “Jeh rah-I Anak Biri Tapa!” ayŭh nang.

³⁷Duwŭh naan murid anŭ dingah ayŭh nang sakanŭ rasu tunda Jesus.

³⁸Jesus bigiring, kiris ngara tunda adŭp-I, ka siken, “Ani jiroh ngan?” Ngara nam, “Diki Kaam rŭŭ, Rabbi?” (Rabbi, rati-i “Gurū.”)

³⁹“Ja tingga,” Ayŭh nam. (Nganŭ mbŭh arong pukor pat singumi andu.) Jadi ngara tunda Ayŭh ka kiris yŭn-I rŭŭ, ka rŭŭ diginŭ ngga Ayŭh ndi andu anŭ.

⁴⁰Ndi so ngara inŭh Andrew, jurud Simon Peter.

⁴¹Ayŭh rasu di dapŭd jurud-i Simon ka nang di ayŭh, “Kieh mbŭh dapŭd Messiah.” (‘Messiah’, rati-i ‘Kristus’).

⁴²Komŭnŭ ayŭh taban Simon ka Jesus. Jesus tingga ayŭh ka nang, “Dŭn mu Simon anak John, pak kuu re dog kadŭn Cephas.” (Anŭ inŭh Peter, rati-i “Batuh.”)

⁴³Andu anŭ ndi Jesus natu adŭp-I an di ka Galilee. Ayŭh dapŭd Philip ka nang di ayŭh, “Ja tunda Aku!” (

⁴⁴Philip daya so Bethsaida, kupo Andrew ngga Peter.)

⁴⁵Philip dapŭd Nathanael ka kidaan di ayŭh, “Kieh mbŭh dapŭd Ayŭh adi Moses nyabŭt darŭm surat Ukum-adat ka adi bara nabi ko nyabŭt gŭh. Ayŭh inŭh Jesus anak Joseph, so Nazareth.”

⁴⁶“Bisa kah kayuh kana mandŭg so Nazareth?” Nathanael siken. “Ja di tingga,” nam Philip.

⁴⁷Kan Jesus kiris Nathanael mandŭg tudu adŭp-I, Ayŭh nang pasar ayŭh, “Tingga, tigŭrŭ daya Israel; mating kayuh dŭh sawŭ pasar ayŭh!”

⁴⁸Nathanael siken Ayŭh, “Simuki Kaam puan aku?” Jesus nam, “Aku kiris kuu guru di ribo tŭngŭn ara diŭ so Philip bagan kuu.”

⁴⁹“Gurū,” Nathanael nam, “Kaam Anak Tapa! Kaam Raja Israel!”

⁵⁰Jesus nang, “Kuu sabah amai Aku nang Aku kiris kuu di ribo tŭngŭn ara kah? Kuu re kiris kayuh adi rabis bās so ati!”

⁵¹ Ka Ayŭh nang di ngara, “Aku kidaan di angān kayuh adi sawŭ: angān re granan kiris rangit tikuka ka bara malaikat Tapa mūn maad di tunduh Anak Manusia.”