Read Biatah Bidayuh JOHN 10 Bible Online

JOHN 10 - Biatah Bidayuh bible

JOHN 10

¹Jesus nang, “Aku kidaan di angān kayuh adi sawŭ: daya adi dŭh mŭrŭt kandang biri so tiban pak jakŭh so tarun bŭkŭn, ayŭh anŭ pinaku ka pirupak.

²Daya adi mŭrŭt so tiban inŭh pingingat-biri.

³Sianŭ adi jaga tiban kuka tiban yŭn-i; biri dingah sirŭŭn-i kan ayŭh bagan jangi biri ngga dŭn, ka nguru ngara ruah.

⁴Kan-i mbŭh taban sopŭrŭg biri ka sapa, ayŭh panu diŭ so bara biri; ka bara biri tunda ayŭh, sabab ngara natŭng sirŭŭn-i.

⁵Ngara dŭh tunda daya saruh; bikaduh bu kidŭ-i, amai ngara dŭh natŭng sirŭŭn-i.”

⁶Upama ati Jesus nang di ngara, pak ngara dŭh mirati kayuh adi nang-I.

⁷Jadi Jesus nang dinge, “Aku kidaan di angān kayuh adi sawŭ: Aku ati tiban yŭn kaban biri.

⁸Sopŭrŭg adi mandŭg diŭ so Aku inŭh bara pinaku ka pirupak, ka bara biri dŭh dingah sirŭŭn ngara.

⁹Aku inŭh tiban. Sopŭrŭg adi mŭrŭt so Aku re dog nyiramat. So Aku ngara re ruah mŭrŭt jiroh pinguman.

¹⁰Pinaku mandŭg amai an naku, siŭ, ka pirusak. Aku mandŭg isa angān bisa dapŭd udip, ka biyŭn-i ngga sipuno-i.

¹¹“Aku ati pingingat-biri adi kana, adi sanggup kabŭs yŭn kaban biri.

¹²Kan kuri adi nguan biri, adi dŭh pingingat-biri, kiris kasong tarun mandŭg, ayŭh bikaduh bu tingge kaban biri. Kasong tarun nakap biri ka bada-i pambar.

¹³Kuri anŭ bikaduh bu sabab ayŭh kuri adŭ ka dŭh nyibara biri.

¹⁴ Aku ati pingingat-biri adi kana. Nimun Sama puan Aku ka Aku puan Sama, simŭnŭ gŭh Aku puan jaku biri, ka biri Ku puan Aku. Ka Aku sanggup kabŭs yŭn ngara.

¹⁶Agi gŭh biri adi bŭkŭn adi Aku dapu, adi dŭh so kandang ati. Aku dŭh siŭn dŭh nguru ngara gŭh; ngara raan dingah sirŭŭn Ku, ka ngara raan jadi[22] ndi kaban biri adi biyŭn ndi pingingat.

¹⁷“Sama rindu Aku sabab Aku sanggup nggen asŭng Ku, isa Aku bisa dapŭd-i pari.

¹⁸Mating daya bisa tambit asŭng Ku. Aku nggen-i so ka pinyiraan adŭp Ku. Aku biyŭn hak nggen-i, ka Aku biyŭn gŭh hak tambit-i pari. Ati inŭh kayuh adi Sama Ku ko pesan di Aku da ndai.”

¹⁹Ka bara daya rasu pape jadi duwŭh tibaran sitagar pinganang anŭ.

²⁰Bagŭ ngara nang, “Ayŭh dog mŭrŭt umot! Ayŭh gira! Mani angān sah dingah Ayŭh?”

²¹Pak adi bŭkŭn nang, “Daya adi dog mŭrŭt umot dŭh dapŭd minyu sakanŭ! Simuki umot re bisa bada daya karak kiris?”

²²Nganŭ mbŭh tipuh madud, ka Gawai Nyikudus Ramin Tuhan agi dog ndai di Jerusalem.

²³Jesus agi aŭn panu di Awah-Solomon di Ramin Tuhan,

²⁴kan bara daya mandŭg ka tikuruk maning Ayŭh. Ngara siken, “Ndŭg sinde meh Kaam re bada kieh agŭng agŭng kajŭn? Kidaan di kieh ngga sawŭ-i: Kaam Kristus kah?”

²⁵Jesus nam, “Aku muko kidaan di angān, pak angān abah sabah Aku. Kayuh adi Aku ndai ngga kuasa Sama Ku mbŭh kidaan asi Aku;

²⁶pak angān dŭh an sabah, amai angān dŭh biri Ku.

²⁷Biri Ku dingah sirŭŭn Ku; Aku puan ngara, ka ngara tunda Aku.

²⁸Aku nggen di ngara udip adi sawŭ adi tan adu adu, ka ngara ngaŭn dŭh re kabŭs. Mating daya re bisa sirabut ngara so tangan Ku.

²⁹Kayuh adi Sama Ku mbŭh nggen di Aku agi bās dŭ[23] so sopŭrŭg kayuh, ka mating daya bisa sirabut ngara so tangan Sama.

³⁰Aku ngga Sama agi ndi.”

³¹Bara daya mbit batuh dinge an manjan Ayŭh.

³²Jesus nang di ngara, “Aku mbŭh ndai bagŭ kayuh kana di ruang ngan, kayuh adi Sama ko bada Aku ndai. Sitagar pingandai aki meh angān an manjan Aku?”

³³ Ngara nam, “Kieh dŭh an manjan Kaam sitagar pingandai kana, pak sitagar pinganang ujat Mai! Kaam daya biasa, pak Kaam bada adŭp Mai mun Tapa!”

³⁴ Jesus nam, “Mbŭh agi dog nuris darŭm Ukum-adat ngan Tapa nang, ‘Angān inŭh tapa.’

³⁵Ata puan nang pinganang Surat-kudus dŭh re aset; ka Tapa kadŭn ngara tapa, daya adi yŭn Tapa ko pait pinganang-I.

³⁶Ka Aku ati, Sama ko mien ka mbŭh pait ka ong. Simuki meh garang, angān bisa nang Aku ngujat kan Aku nang adŭp Ku Anak Tapa?

³⁷Dŭhnyah sabah Aku, kambŭi Aku dŭh ndai anŭ adi Sama Ku bada Aku ndai.

³⁸Pak kambŭi Aku ndai-i, sunggu angān dŭh sabah Aku, angān patut sikurang kurang-i sabah pingandai Ku, siŭn angān bisa rada ka puan nang Sama agi darŭm Aku ka Aku agi darŭm Sama.”

³⁹Ngara suba dinge an nakap Ayŭh, pak Ayŭh pirupas adŭp-I so tangan ngara.

⁴⁰ Ka Jesus pari dinge mutas Yang Jordan ka tarun adi yŭn John ko baptisa daya, ka-I rŭŭ diginŭ.

⁴¹Bagŭ daya mandŭg tudu Ayŭh. “John bŭn ndai pingandai-nginga,” ngara nang, “pak sopŭrŭg kayuh adi-i nang pasar daya ati agi sawŭ.”

⁴²Ka bagŭ meh daya diginŭ sabah di Ayŭh.