Read Biatah Bidayuh JOHN 13 Bible Online

JOHN 13 - Biatah Bidayuh bible

JOHN 13

¹Dŭm ndi andu ngga-i mbŭh re Gawai Paska. Jesus puan jam adi ngga-I bu so ong ati pari ka Sama, mbŭh mandŭg. Ayŭh rindu ngara di ong, adi tung adŭp-I; ka rindu ngara ndŭg sikasŭn-i.

²Jesus ngga bara murid-I agi guru man. Siarap mbŭh na darŭm atin Judas, anak Simon Iscariot, pikir-kira an jua Jesus.[25]

³Jesus puan Sama mbŭh nggen di adŭp-I sukup kuasa; Ayŭh puan adŭp-I mandŭg so Tapa ka mbŭh re pari ka Tapa.

⁴Jadi Ayŭh makat so mija, ka kadi Jipo tabar-I; Ayŭh mŭŭng tawar di kupong-I.

⁵Komŭnŭ Ayŭh ren piin darŭm besen ka piguru ngu kaja bara murid-I, ka nyibadŭh-i ngga tawar adi dog mŭŭng di kupong-I.

⁶Kan mbŭh ndŭg Peter, Peter nang di Ayŭh, “Tuhan, Kaam re ngu kaja ku kah?”

⁷Jesus nam, nang-I, “Kuu dŭh mirati kayuh adi Aku ndai, pak sundis andu-i kuu re mirati.”

⁸Peter nang di Jesus, “Ngaŭn dŭh patut Kaam ngu kaja Ku!” “Kambŭi Aku dŭh ngu kaja mu,” Jesus nam, “Kuu dŭh re tia jadi murid Ku.”

⁹Simon Peter nam, “Tuhan, dŭhnyah ngu kaja ku adŭ, garang! Ngu tangan ku ka ubak ku ani!”

¹⁰Jesus nang, “Daya adi ko mamuh taŭn mbŭh sukup bisig; kaŭs ayŭh an ngu kaja adŭ.[26] Sopŭrŭg ngan inŭh bisig, adŭ-i ndi naan.” (

¹¹Jesus puan sianŭ adi re jua adŭp-I; ngapŭi Ayŭh nang, “Sopŭrŭg ngan inŭh bisig, adŭ-i ndi naan.”)

¹² Ripas Jesus ko ngu kaja ngara, Ayŭh kasŭk jipo tabar-i ka pari ka yŭn adŭp-I di mija. “Mirati ngan kah kayuh adi Aku bauh ko ndai di angān?” Ayŭh siken.

¹³“Angān bagan Aku Gurū ka Tuhan; batur, amai anŭ inŭh Aku ati.

¹⁴Aku, adi Tuhan ka Gurū ngan, mbŭh bauh ko ngu kaja ngan. Ngapŭi meh, angān patut ngu kaja dingan ngan.

¹⁵Aku mbŭh kiren suto di angān, isa angān ndai di dingan ngan nimun Aku ko ndai di angān.

¹⁶ Aku kidaan di angān kayuh adi sawŭ: mating urun re bās dŭ so tuan-i, ka mating gŭh pinyisung re bās dŭ so sianŭ adi pait ayŭh.

¹⁷Amai madin angān puan kayuh ati, munki masam sanang angān kambŭi angān ndai simŭnŭ!

¹⁸ “Dŭh-i pasar sopŭrŭg ngan Aku nang sakanŭ tejah. Aku puan daya adi Aku ko mien. Pak pinganang Surat-kudus dŭh siŭn dŭh an jadi bitŭtŭk, adi nang, ‘Daya adi samah man pinguman Ku mbŭh makat rawan Aku.’

¹⁹Aku kidaan kayuh ati di angān madin diŭ so-i jadi, isa kan-i mbŭh jadi, angān bisa sabah nang ‘Aku Ati inŭh Adŭp Ku.’

²⁰ Aku kidaan di angān kayuh adi sawŭ: daya adi kambat daya adi Aku pait agi kambat Aku; ka daya adi kambat Aku agi kambat Ayŭh adi pait Aku.”

²¹Ripas Jesus ko minyu sakanŭ, Ayŭh raru susah ka rasu kidaan di sopŭrŭg ngara, “Aku kidaan di angān kayuh adi sawŭ: ndi so angān re jua Aku.”

²²Bara murid gŭgŭh, sanuh kimat sanuh buang inga inga, asi meh daya anŭ.

²³Ndi so bara murid, adi Jesus rindu, agi guru ngapid Ayŭh.

²⁴Simon Peter kapai ayŭh ka nang, “Siken di Ayŭh asi daya anŭ adi nang-I.”

²⁵Jadi murid anŭ nyindŭk Jesus ka siken, “Asi daya anŭ, Tuhan?”

²⁶Jesus nam, “Aku re njug ruti ati darŭm pinggen ka nggen-i di adŭp-i; ayŭh inŭh adi re jua Aku.” Jadi Ayŭh mbit ndi kiping ruti, njug-i, ka nggen-i di Judas, anak Simon Iscariot.

²⁷Di jam anŭ gŭh Shetan mŭrŭt Judas. Jesus nang di ayŭh, “Di ndai rikas kayuh adi re mu ndai!”

²⁸Mating ngara adi guru di mija mirati mani Jesus minyu sakanŭ di ayŭh.

²⁹Amai Judas mbŭh daya tukang digŭng duit, kada murid pikir Jesus bada ayŭh di miris kayuh yŭn andu gawai, puan kah di nggen kayuh di daya sirata.

³⁰Judas mbit ruti anŭ ka rasu ruah. Nganŭ, andu mbŭh karŭm.

³¹Kan Judas mbŭh ruah, Jesus nang, “Madin bragah Anak Manusia dog pinandŭng; madin Bragah Tapa dog pinandŭng so Ayŭh.

³²Kambŭi bragah Tapa dog pinandŭng so Ayŭh, Tapa taŭn re pinandŭng gŭh bragah Anak Manusia so adŭp-I, ka Ayŭh taŭn re rasu ndai simŭnŭ.

³³ Angān adi bara anak Ku, Aku dŭh re tui ngga angān. Angān re jiroh Aku; pak Aku kidaan di angān madin kayuh adi ko Ku kidaan di bara Pinguasa Jahudi, ‘Angān dŭh bisa di ka tarun yŭn adi re Ku ka.’

³⁴ Madin Aku nggen di angān Pinyipesan adi bauh: rindu dingan ngan. Nimun Aku mbŭh rindu angān, simŭnŭ gŭh angān rindu dingan ngan.

³⁵Kambŭi angān biyŭn pinyirindu dupan adŭp ngan, daya bisa puan angān mbŭh murid Ku.”

³⁶“Tuhan, Re kamaki Kaam?” Simon Peter siken Ayŭh. “Kamaki Aku panu madin kuu dŭh dapŭd tunda,” Jesus nam; “pak andu bŭkŭn kuu bisa tunda Aku.”

³⁷“Tuhan, mani aku dŭh bisa tunda Kaam madin?” Peter siken. “Aku mbŭh sidia an taran asŭng ku yŭn Mai!”

³⁸Jesus nam, “Sawŭ kah kuu an taran asŭng mu yŭn Ku? Aku kidaan di kuu kayuh adi sawŭ: diŭ so babang kukok kuu re pitaruh kari nang adŭp mu dŭh puan Aku.