Read Biatah Bidayuh JOHN 14 Bible Online

JOHN 14 - Biatah Bidayuh bible

JOHN 14

¹“Dŭhnyah susah,” Jesus nang di ngara. “Sabah[27] di Tapa ka sabah gŭh di Aku.

²Bagŭ birit di ramin Sama Ku, ka Aku re di sidia tarun yŭn ngan. Aku dŭh an kidaan kayuh ati di angān kambŭi-i dŭh sawŭ.[28]

³Ka ripas Aku ko di sidia tarun yŭn ngan, Aku re pari di tambit angān yŭn adŭp Ku, isa angān agi ngga Aku.

⁴Angān puan aran adi nuju tarun adi re Ku ka.”

⁵Thomas nang di Ayŭh, “Tuhan, kieh dŭh puan re kamaki Kaam; jadi simuki kieh re bisa puan aran ngga di kamanŭ?”

⁶Jesus nam ayŭh, “Aku inŭh aran ngga ngan bisa puan Tapa ka ngga dapŭd udip; mating daya tungang di ka Sama adŭ-i so Aku.

⁷Amai madin angān mbŭh puan Aku,” Ayŭh nang di ngara, “angān re puan[29] gŭh Sama Ku, ka so madin angān sawŭ puan Ayŭh ka mbŭh kiris Ayŭh.”

⁸Philip nang di Ayŭh, “Tuhan, kiren di kieh Sama, isa asŭng ami munos.”

⁹Jesus nam, “Mbŭh tian ti Aku agi ngga angān, ka gibayuh kah kuu puan Aku, Philip? Asi asi adi kiris Aku mbŭh kiris Sama. Simuki kuu bisa nang, ‘Kiren di kieh Sama’?

¹⁰Dŭh kah kuu sabah Aku agi darŭm Sama, ka Sama agi darŭm Aku? Pinganang Ku anŭ,” Jesus nang di bara murid-I, “dŭh inŭh so adŭp Ku. Sama, adi rŭŭ darŭm Aku, inŭh adi ndai kraja-I.

¹¹Sabah Aku kan Aku nang Aku agi darŭm Sama ka Sama agi darŭm Aku. Kambŭi dŭh, angān bisa sabah Aku sabab kayuh adi Aku ndai.

¹²Aku kidaan di angān kayuh adi sawŭ: daya adi sabah di Aku re ndai kayuh adi Aku ndai, ka pingandai adi rabis bās re ngara ndai gŭh, sabab Aku re di ka Sama.

¹³Ka Aku re ndai ani ani adi angān mite ngga adŭn Ku, isa Sama bisa dog kibās so Anak.

¹⁴Kambŭi angān mite so Aku[30] tadŭ tadŭ kayuh ngga adŭn Ku, Aku re nggen-i.

¹⁵“Kambŭi angān rindu Aku, angān tatu an sita Pinyipesan Ku.

¹⁶Aku re mite di Sama ka Ayŭh re nggen di angān adi bŭkŭn, Pinurung, adi re rŭŭ ngga angān adu adu.

¹⁷Ayŭh inŭh Roh Kudus adi pinandŭng kayuh adi sawŭ pasar Tapa. Ong dŭh tungang kambat Ayŭh, sabab-i dŭh kiris Ayŭh buang dŭh puan Ayŭh. Pak angān puan Ayŭh, sabab Ayŭh agi ngga angān ka mbŭh agi[31] darŭm angān.

¹⁸“Aku dŭh re tagan angān sadi mun anak tumang; Aku re mandŭg pari ka angān.

¹⁹Dŭm dŭh tui daya di ong ati re dŭh tungang kiris Aku tia, pak angān re kiris Aku; ka sabab Aku udip, angān re udip gŭh.

²⁰Kan andu anŭ mbŭh mandŭg, angān re puan Aku agi darŭm Sama ka angān agi darŭm Aku, nimun Aku agi darŭm angān.

²¹“Daya adi trima Pinyipesan Ku ka sita-i, ngara anŭ inŭh adi rindu Aku. Sama Ku re rindu ngara adi rindu Aku, ka Aku re rindu ngara ka pinandŭng adŭp Ku di ngara.”

²²Judas (dŭh Judas Iscariot) nang, “Tuhan, mani Kaam re pinandŭng adŭp Mai di kieh ka dŭh di ong?”

²³Jesus nam ayŭh, “Asi asi adi rindu Aku re tunda ajar Ku. Sama Ku re rindu ayŭh, ka Sama Ku ngga Aku re mandŭg ka rŭŭ darŭm ayŭh.

²⁴Asi asi adi dŭh rindu Aku, ayŭh dŭh tunda ajar Ku. Ka ajar adi angān dingah dŭh-i jaku, pak mandŭg so Sama adi bada Aku mandŭg.

²⁵“Kayuh ati Aku mbŭh kidaan di angān darŭm Aku babŭ ngga angān.

²⁶Pinurung, anŭ inŭh Roh Kudus, adi Sama re pait, re ngajar angān sopŭrŭg kayuh ka bada angān ingat sopŭrŭg kayuh adi Aku ko kidaan di angān.

²⁷“Damai inŭh adi Aku tingge di angān; damai adŭp Ku Aku nggen di angān. Dŭh mun damai adi ong nggen di angān. Dŭhnyah atin ngan susah ka taru.

²⁸Angān ko dingah Aku nang, ‘Aku re bu, pak re mandŭg pari ka angān.’ Kambŭi angān rindu Aku, angān gaŭn kiris Aku di ka Sama; amai Ayŭh agi bās dŭ so Aku.

²⁹Aku mbŭh kidaan di angān madin diŭ so-i tambus, isa kan-i mbŭh tambus, angān re sabah.

³⁰Aku dŭh bisa minyu tui ngga angān, sabab pinguasa ong ati mbŭh mandŭg. Ayŭh dŭh biyŭn kuasa di tunduh Aku,

³¹pak ong dŭh siŭn dŭh an puan Aku rindu Sama; ngapŭi Aku ndai sopŭrŭg kayuh nimun pinyipesan-I di Aku. Ja ata bu so ti.”