Read Biatah Bidayuh JOHN 16 Bible Online

JOHN 16 - Biatah Bidayuh bible

JOHN 16

¹“Aku mbŭh kidaan di angān sopŭrŭg ati isa pinyabah ngan di Aku dŭh jimŭ.

²Angān re dog taran so ramin simayang-Jahudi, ka tipuh-i re mandŭg adi ngga daya adi siŭ angān re pikir adŭp-i ndai kraja Tapa.

³Daya re ndai simŭnŭ di angān sabab ngara dŭh puan Sama bait Anak.

⁴Aku kidaan ati di angān isa di andu daya ndai simŭnŭ, angān bisa ingat kayuh adi Aku ko kidaan di angān. “Aku mating kidaan kayuh ati di angān di sibungas-i, amai Aku agi ngga angān.

⁵Pak madin Aku re di ka yŭn-I adi bada Aku mandŭg, pak mating angān siken kamaki Aku di.

⁶Madin atin ngan mbŭh susah amai Aku ko kidaan di angān.

⁷Pak Aku kidaan di angān kayuh adi sawŭ: mbŭh kana di angān inŭh Aku bu, sabab kambŭi Aku dŭh bu, Pinurung dŭh re mandŭg ka angān. Pak kambŭi Aku bu, Aku re pait Ayŭh ka angān.

⁸Jadi kan Ayŭh mbŭh mandŭg, Ayŭh re kiren di bara daya di ong nang ngara mbŭh sarah pasar dosa, pasar kayuh adi batur, ka pasar ukum Tapa.

⁹Ngara mbŭh sarah di pinyipuan pasar dosa, sabab ngara dŭh sabah di Aku;

¹⁰ngara mbŭh sarah di pinyipuan pasar kayuh adi batur, sabab Aku di ka Sama ka angān re dŭh tia kiris Aku;

¹¹ka ngara mbŭh sarah di pinyipuan pasar ukum, sabab pinguasa ong ati mbŭh dog ukum.

¹²“Bagŭ kayuh adi bŭkŭn an Ku kidaan di angān, pak madin angān gibayuh tungang mirati-i.

¹³Pak sunggu mŭnŭ, kan Roh anŭ mandŭg, adi pinandŭng kayuh adi sawŭ pasar Tapa, Ayŭh re nyiruton angān di sopŭrŭg kayuh adi sawŭ anŭ. Ayŭh dŭh re minyu so ka pinyiraan adŭp-I, pak re minyu pasar kayuh adi-I dingah ka re kidaan di angān kayuh kayuh adi re.

¹⁴Roh anŭ re nyibragah Aku, sabab Ayŭh re kidaan di angān kayuh adi-I dingah so Aku.

¹⁵Sopŭrŭg adi Sama Ku dapu mbŭh tung jaku; anŭ inŭh sabab Aku nang Roh re dingah kayuh adi Aku nang di Ayŭh ka re kidaan-i di angān.

¹⁶“Dŭm dŭh tui angān re dŭh kiris Aku, ka dŭm dŭh tui ripas anŭ angān re kiris Aku.”

¹⁷Agi kada bara murid-I siken dupan adŭp ngara, “Ani rati kayuh anŭ adi-I nang di ata? Ayŭh nang dŭm dŭh tui ata re dŭh kiris Ayŭh, ka dŭm dŭh tui ripas anŭ ata re kiris Ayŭh. Ka Ayŭh gŭh nang, ‘Kayuh anŭ simŭnŭ sabab Aku re di ka Sama.’

¹⁸Ani rati ‘dŭm dŭh tui’ anŭ? Dŭh ata puan ani anŭ nang-I!”

¹⁹Jesus puan ngara raru an siken adŭp-I, jadi Ayŭh nang di ngara, “Aku nang, ‘Dŭm dŭh tui angān re dŭh kiris Aku, ka dŭm dŭh tui ripas anŭ angān re kiris Aku.’ Anŭ kah kayuh adi angān siken dupan adŭp ngan?

²⁰Aku kidaan di angān kayuh adi sawŭ: angān re sien ka muās, pak ong re gaŭn; angān re susah, pak atin susah ngan re marui jadi pinyigaŭn.

²¹Kan dayung re biranak, ayŭh susah sabab tika sarang andam re biranak mbŭh mandŭg; pak kan anak-i mbŭh dog ruwan, ayŭh kambŭt sarang-i, sabab ayŭh gaŭn kiris anak pira mbŭh dog biranak di ong.

²²Simŭnŭ gŭh angān: madin angān susah, pak Aku re dapŭd angān dinge, ka atin ngan re puno ngga pinyigaŭn, pinyigaŭn adi mating daya bisa tambit so angān.

²³“Kan andu anŭ mandŭg, angān dŭh re siken kayuh di Aku. Aku kidaan di angān kayuh adi sawŭ: Sama re nggen di angān tadŭ kayuh adi angān mite ngga adŭn Ku.[32]

²⁴Ndŭg madin angān gi-bŭn mite kayuh ngga adŭn Ku; mite meh ka angān re kambat, isa pinyigaŭn ngan jadi gŭgŭp.

²⁵“Aku mbŭh minyu di angān pasar kayuh ati darŭm upama. Pak tipuh re mandŭg kan Aku dŭh tia minyu di angān darŭm upama, pak re minyu di angān ngga tarang pasar Sama.

²⁶Di tipuh anŭ, angān re mite di Tapa ngga adŭn Ku; dŭh Aku nang Aku re sah mite yŭn ngan,

²⁷amai adŭp Sama mbŭh rindu angān. Ayŭh rindu angān sabab angān rindu Aku ka mbŭh sabah Aku taŭn mandŭg so Tapa.

²⁸Aku sawŭ mandŭg so Sama, ka Aku mbŭh mandŭg ka ong; ka madin Aku re bu so ong di ka Sama.”

²⁹Jadi bara murid-I nang di Ayŭh, “Tong-i Kaam minyu ngga tarang, dŭh darŭm upama.

³⁰Madin kieh puan nang Kaam sawŭ puan sopŭrŭg kayuh, ka kieh dŭhsah tia siken kayuh di Kaam. Sabab anŭ, kieh sabah Kaam sawŭ mandŭg so Tapa.”

³¹Jesus nam ngara, “Angān mbŭh sabah kah madin?

³²Tipuh-i re mandŭg, ka mbŭh mandŭg, kan sopŭrŭg ngan re pambar, barang naan ka ramin adŭp-i, tingge Aku sadi. Pak Aku sawŭ dŭh sadi, sabab Sama agi ngga Aku.

³³Aku nang sopŭrŭg ati isa angān biyŭn damai darŭm Aku. Ong re bada angān jera. Pak pagan meh! Aku mbŭh ngarah ong!”