Read Biatah Bidayuh JOHN 17 Bible Online

JOHN 17 - Biatah Bidayuh bible

JOHN 17

¹Ripas Jesus ko nang sakanŭ, Ayŭh nyigura ka rangit ka nang, “Sama, tipuh-i mbŭh mandŭg. Nggen bragah di Anak Mai, isa Anak bisa nggen bragah di Kaam.

²Kaam mbŭh nggen kuasa tunduh sopŭrŭg bangsa manusia di Ayŭh, isa Ayŭh nggen udip adi sawŭ adi tan adu adu di sopŭrŭg ngara adi Kaam ko nggen di Ayŭh.

³Ka udip adi sawŭ adi tan adu adu rati-i puan Kaam sadi adŭ adi Tapa, ka puan Jesus Kristus adi Kaam mbŭh bada mandŭg.

⁴Aku mbŭh kiren bragah Mai darŭm ong, darŭm Aku ngamas kraja adi Kaam bada Aku ndai.

⁵Sama! Nyibragah Aku madin ngga bragah anŭ adi Aku ko biyŭn ngga Kaam sibayuh ong dog napa.

⁶“Aku mbŭh kidaan pasar Kaam di sopŭrŭg daya so ong ati adi Kaam mbŭh nggen di Aku. Ngara mbŭh tung jamai, ka Kaam mbŭh nggen ngara di Aku. Ngara mbŭh tunda pinganang Mai,

⁷ka madin ngara mbŭh puan nang sopŭrŭg kayuh adi Kaam mbŭh nggen di Aku agi mandŭg so Kaam.

⁸Agah adi Kaam ko nggen di Aku, Aku ko nggen di ngara, ka ngara mbŭh kambat-i. Ngara puan Aku sawŭ mandŭg so Kaam, ka ngara sabah Kaam sawŭ adi bada Aku mandŭg.

⁹“Aku simayang yŭn ngara. Aku dŭh simayang yŭn ong pak yŭn ngara adi Kaam mbŭh nggen di Aku, amai ngara mbŭh tung jamai.

¹⁰Sopŭrŭg adi Aku dapu inŭh jamai, ka sopŭrŭg adi Kaam dapu inŭh jaku; ka bragah Ku dog kiren so ngara.

¹¹Ka madin Aku mandŭg ka Kaam, ka dŭh tia di ong, pak ngara babŭ di ong. Sama adi kudus, kingat ngara ngga kuasa adŭn Mai, adŭn adi Kaam mbŭh nggen di Aku,[33] isa ngara bisa jadi ndi nimun Kaam ngga Aku agi ndi.

¹² Sitadŭn Aku agi ngga ngara, Aku kingat ngara ngga kuasa adŭn Mai, adŭn adi Kaam mbŭh nggen di Aku.[34] Aku mbŭh grindung ngara, ka ndi so ngara mating gŭh manyap, adŭ-i sianŭ adi taŭn re manyap. Ayŭh mbŭh simŭnŭ, isa pinganang Surat-kudus jadi bitŭtŭk.

¹³Madin Aku mandŭg ka Kaam. Ka Aku nang kayuh kayuh ati darŭm Aku gibabŭ darŭm ong, isa ngara bisa biyŭn pinyigaŭn Ku ngga sipuno-i.

¹⁴Aku mbŭh nggen pinganang Mai di ngara, ka ong tiru di ngara, sabab ngara dŭh tung ong, nimun Aku dŭh tung ong.

¹⁵Aku dŭh mite Kaam tambit ngara so ong, pak mite Kaam grindung ngara so Siarap.

¹⁶Nimun Aku dŭh tung ong, ngara dŭh tung ong.

¹⁷Bada ngara jadi jamai ngga pinganang Mai adi sawŭ; pinganang Mai inŭh sawŭ.

¹⁸Aku pait ngara di ong, nimun Kaam mbŭh pait Aku ka ong.

¹⁹Yŭn kana ngara Aku jugan adŭp Ku yŭn bituan di Kaam, siŭn ngara gŭh bisa jugan adŭp-i yŭn bituan di Kaam.

²⁰“Aku simayang dŭh yŭn ngara adŭ, pak yŭn sopŭrŭg daya adi sabah di Aku sabab kayuh adi bara murid Ku ko piagah.

²¹Aku simayang isa ngara jadi ndi. Sama! Aku mite ngara jadi ndi darŭm Ata, nimun Kaam agi darŭm Aku ka Aku agi darŭm Kaam. Aku mite ngara jadi ndi, isa ong bisa sabah nang Kaam sawŭ mbŭh pait Aku.

²²Aku mbŭh nggen di ngara bragah anŭ adi Kaam mbŭh nggen di Aku, isa ngara bisa jadi ndi, nimun Kaam ngga Aku agi ndi:

²³Aku darŭm ngara ka Kaam darŭm Aku, isa ngara bisa batur jadi ndi, ka isa ong bisa puan nang Kaam mbŭh pait Aku ka puan nang Kaam rindu bara pinunda Ku nimun Kaam rindu Aku.

²⁴“Sama! Kaam mbŭh nggen ngara di Aku, ka Aku raan ngara agi ngga Aku di yŭn Ku rŭŭ, isa ngara bisa kiris bragah Ku, bragah adi Kaam mbŭh nggen di Aku; amai Kaam mbŭh rindu Aku sibayuh ong jadi.

²⁵Sama adi tŭnggŭn! Ong dŭh puan Kaam, pak Aku puan Kaam, ka ngara ati puan Kaam mbŭh pait Aku.

²⁶Aku mbŭh piagah adŭn Mai di ngara, ka re adu adu ndai simŭnŭ, siŭn pinyirindu Mai di Aku bisa gŭh agi darŭm ngara, ka isa Aku bisa gŭh agi darŭm ngara.”