Read Biatah Bidayuh JOHN 19 Bible Online

JOHN 19 - Biatah Bidayuh bible

JOHN 19

¹Komŭnŭ Pilate tambit Jesus ka bada Ayŭh dog madŭs.

²Bara soldadu ndai makota so bakah reja ka na-i di ubak-I; komŭnŭ ngara bada Ayŭh nēn jipo-ambu adi bēng,

³ka matak mari tudu Ayŭh, ngara nang, “Tabi ka Kaam Raja daya Jahudi!” Komŭnŭ ngara napar Ayŭh.

⁴Pilate ruah dinge ka sapa ka nang di bara daya, “Tingga, Aku re taban Ayŭh ruah ka sapa, isa angān kiris aku dŭh tungang dapŭd sarah-I adi yŭn ku re bisa ngukum Ayŭh.”

⁵Jadi Jesus ruah, pakai makota reja buang nēn jipo-ambu adi bēng. Pilate nang di ngara, “Tingga, ta adŭp-I!”

⁶Kan bara pingubak imam ka bara adi tukang jaga Ramin Tuhan kiris Ayŭh, ngara nang ngga sirŭŭn bana, “Masak Ayŭh di rigang! Masak Ayŭh di rigang!” Pilate nang di ngara, “Tambit Ayŭh! Adŭp ngan masak Ayŭh di rigang. Adŭp ku dŭh tungang dapŭd sarah-I adi yŭn ku re bisa ngukum Ayŭh.”

⁷Bara daya bagŭ nam, “Nanyam ka ukum-adat ami Ayŭh patut dog siŭ, sabab Ayŭh nang adŭp-I Anak Tapa.”

⁸Kan Pilate dingah sakanŭ, ayŭh mbŭh jadi rabis taru.

⁹Ayŭh mŭrŭt ka darŭm istana ka siken Jesus, “So ki Kuu?” Pak Jesus dŭh nam.

¹⁰Pilate nang di Ayŭh, “Kuu dŭh an minyu ngga aku? Puan Mu, aku biyŭn kuasa ngga pirupas Kuu bait masak Kuu di rigang.”

¹¹Jesus nam, “Kuu dŭh biyŭn kuasa di tunduh Aku kambŭi Tapa dŭh nggen-i di kuu. Ka sianŭ adi nyerah Aku ka tangan mu mbŭh ndai dosa bās.”

¹²Kan Pilate dingah sakanŭ, ayŭh suba an pirupas Jesus. Pak bara daya ngga sirŭŭn bana nang, “Kambŭi kaam pirupas Ayŭh, rati-i, kaam dŭh dingan Caesar! Daya adi nang adŭp-i raja taŭn-i an rawan Caesar!”

¹³Kan Pilate dingah pinganang anŭ, ayŭh taban Jesus ka sapa ka guru di baku bisara di awah adi dog kadŭn “Awah Batuh.” (Darŭm piminyu Hebrew anŭ inŭh “Gabbatha.”)

¹⁴Nganŭ mbŭh sindŭk kumbeng di andu adi diŭ so Gawai Paska. Pilate nang di bara daya, “Ta, raja ngan!”

¹⁵Ngara nam ngga sirŭŭn bana, “Siŭ Ayŭh! Siŭ Ayŭh! Masak Ayŭh di rigang!” Pilate siken ngara, “An kah angān bada aku masak raja ngan di rigang?” Bara pingubak imam nam, “Raja adi kieh biyŭn kaŭs-i Caesar!”

¹⁶Komŭnŭ Pilate nyerah Jesus ka darŭm tangan ngara yŭn dog masak di rigang. Ngara tambit Jesus.

¹⁷Jesus ruah so kupo, gŭrŭng rigang-I, ka mandŭg ka tarun adi dog kadŭn “Tarun yŭn Tikurok.” (Darŭm piminyu Hebrew, tarun anŭ dog kadŭn “Golgotha.”)

¹⁸Diginŭ ngara masak Ayŭh di rigang, samŭn duwŭh naan daya bŭkŭn, ndi tura ka tauh ndi tura ka bait, ka Jesus di yun.

¹⁹Pilate nuris pinganang di supek papan ka bada daya pirakat-i di sambu rigang. “Jesus so Nazareth, Raja daya Jahudi,” inŭh kayuh adi-i nuris.

²⁰Bagŭ daya basa-i, sabab tarun adi yŭn Jesus dog masak di rigang dŭh jo so kupo. Pinganang anŭ agi dog nuris darŭm piminyu Hebrew, Latin, ka Greek.

²¹Bara pingubak imam nang di Pilate, “Dŭhnyah nuris ‘Raja daya Jahudi,’ pak nuris, ‘Daya ati nang, Aku ati Raja daya Jahudi.’ ”

²²Pilate nam, “Anŭ adi aku ko nuris dŭhnyah ngaso!”

²³Ripas bara soldadu muko masak Jesus, ngara tambit piraka-I ka kutung-i nyikupat, ndi naan ndi utung. Ngara tambit gŭh jipo ambu-I, adi bitanun so sambu ndŭg sagān-i, dŭh main tubu.

²⁴ Bara soldadu anŭ nang dupan adŭp-i, “Dŭhnyah ata nyiratak-i; ata pakai dadu ngga puan asi re dapu-i.” Ayŭh jadi simŭnŭ siŭn pinganang Surat-kudus jadi bitŭtŭk: “Ngara kutung piraka Ku dupan adŭp ngara ka di tunduh jipo-ambu Ku ngara taran dadu.” Ka anŭ inŭh kayuh adi bara soldadu ndai.

²⁵Mijog sindŭk rigang Jesus inŭh sindŭ-I, jurud sindŭ-I, Mary adi sawŭn Clopas, ka Mary Magdalene.

²⁶Jesus kiris sindŭ-I samŭn murid adi-I rindu mijog diginŭ; ka Ayŭh nang di sindŭ-I, “Ayŭh anak mai.”

²⁷Komŭnŭ Ayŭh nang di murid anŭ, “Ayŭh sindŭ mu.” So nganŭ murid anŭ taban ayŭh da rŭŭ di ramin adŭp-i.

²⁸ Jesus taŭn mbŭh puan nang di jam anŭ sopŭrŭg-i mbŭh kamas. Ka siŭn pinganang Surat-kudus jadi bitŭtŭk, Ayŭh nang, “Badŭh asŭng Ku.”

²⁹Diginŭ agi ndi makuk, puno ngga wain adi kurang brega. Ka rimut karang dog kurom di wain anŭ, dog na di tugu hyssop, ka dog ton ka bibis Jesus.

³⁰Jesus nyŭp wain anŭ ka nang, “Mbŭh kamas!” Ripas anŭ Ayŭh mutu ubak-I, ka asŭng-I patŭd.

³¹Komŭnŭ bara Pinguasa Jahudi mite Pilate nyibandar ngara mata kaja ngara adi dog masak, yŭn bisor tadang ngara so rigang. Ngara mite sabab andu anŭ mbŭh andu Rimŭh, ka dŭh raan tandah tadang di atuh rigang ndŭg andu Sabbath, amai andu Sabbath inŭh andu adi raru bās.

³²Jadi bara soldadu mandŭg ka mata kaja ngara duwŭh adi sua dog masak ngga Jesus.

³³Pak kan ndŭg Jesus, ngara kiris Ayŭh mbŭh kabŭs, ka dŭh jadi mata kaja-I.

³⁴Ndi naan so bara soldadu anŭ numbuk tigang Jesus ngga jarok, ka nganŭ gŭh deya ngga piin ruah. (

³⁵Sianŭ adi ko kiris kayuh ati muko minyu pasar-i, isa angān gŭh sua sabah.[35] Kayuh adi nang-i taŭn sawŭ, ka ayŭh puan nang adŭp-i nang kayuh adi sawŭ.)

³⁶ Kayuh ati jadi isa pinganang Surat-kudus jadi bitŭtŭk: “Ndi mating gŭh turang-I re dog mata.”

³⁷ Ka agi gŭh dinge pinganang Surat-kudus adi nang, “Daya re tingga Ayŭh adi ngara ko numbuk ngga jarok.”

³⁸Ripas anŭ, Joseph, adi so Arimathea, siken Pilate bisa kah dŭh ayŭh tambit tadang Jesus. (Joseph inŭh ndi so bara pinunda Jesus, pak darŭm bisukan, sabab-i taru bara Pinguasa Jahudi.) Pilate nyibandar Joseph tambit tadang Jesus, jadi ayŭh di tambit-I ngga bu.

³⁹ Nicodemus, adi ko tudu Jesus singarŭm, sua ngga Joseph, buang taban taruh puru kilogram rapah, myrrh bigaur ngga gaharu.

⁴⁰Ngara duwŭh marut tadang Jesus ngga banang linen ngga rapah nunda ka adat daya Jahudi sidia tadang yŭn kubur.

⁴¹Agi ndi teya di tarun anŭ adi yŭn Jesus dog ukum kabŭs, ka diginŭ agi ndi tibŭn kubur adi gibayuh daya dog kubur dieh.

⁴²Sabab kubur anŭ sindŭk buang andu Sabbath mbŭh re piguru, ngara na tadang Jesus dieh.