Read Biatah Bidayuh JOHN 2 Bible Online

JOHN 2 - Biatah Bidayuh bible

JOHN 2

¹Duwŭh andu ripas anŭ, agi gawai sawan di kupo Cana di Galilee. Sindŭ Jesus agi diginŭ,

²ka Jesus samŭn bara murid-I mbŭh dog bagan gŭh ka gawai sawan anŭ.

³Kan wain mbŭh abo, sindŭ Jesus nang di Ayŭh, “Mbŭh abo wain ngara.”

⁴“Dŭhsah kidaan di Aku ani re Ku ndai,” Jesus nam. “Tipuh Ku gibayuh mandŭg.”

⁵Sindŭ Jesus rasu kidaan di daya daya-gaji, “Angān ndai ani ani adi-I bada angān ndai.”

⁶Diginŭ agi nŭm tibande tipayan batuh, adi daya Jahudi pakai ngga sita adat pibisig. Tiap tipayan anŭ tungang muat kurang rabis siratus lita piin.

⁷Jesus nang di daya daya-gaji, “Ngisi sopŭrŭg tipayan ati ngga piin.” Ngara ngisi-i ndŭg puno,

⁸ka Ayŭh nang di ngara, “Nyauk meh kada-i ka nggen di daya adi tukang ngatur gawai.” Ngara nyauk ka nggen di daya anŭ piin anŭ,

⁹adi mbŭh marui jadi wain, ka ayŭh kija-i. Ayŭh dŭh puan so ki wain anŭ (kaŭs-i daya daya-gaji adi nyauk-i adŭ puan); jadi ayŭh bagan pingaten dari

¹⁰ka nang di ayŭh, “Siraru-i daya diŭ ngidang wain adi kana dŭ, ka ripas bara pingabang mbŭh puas nok, ayŭh ngidang anŭ adi kurang kana. Pak kuu mbŭh nyikŭn wain adi kana dŭ ndŭg tong-i!”

¹¹Anŭ inŭh sibungas pingandai-nginga adi Jesus ndai, di Cana di tarun tana Galilee. Diginŭ Ayŭh kiren bragah-I, ka bara murid-I sabah di Ayŭh.

¹² Ripas anŭ, Jesus ngga sindŭ-I, bara jurud-I, ka bara murid-I matak ka Capernaum ka rŭŭ diginŭ duwŭh taruh andu.

¹³ Dŭm dŭh tui ngga-i mbŭh re Gawai Paska, jadi Jesus matak ka Jerusalem.

¹⁴Diginŭ di Ramin Tuhan Ayŭh dapŭd daya jua sapi, biri, ka manuk asang, ka bara adi yŭn daya nyambi duit agi gŭh diginŭ.

¹⁵Ayŭh ndai pasut so taris ka kasig sopŭrŭg ngara, samŭn biri biri ka sapi sapi so Ramin Tuhan; Ayŭh kureb mija ngara adi tukang nyambi duit, ka duit ngara Ayŭh kambur;

¹⁶ka-I nang di ngara adi jua manuk asang, “Taban-i bu so ti! Dŭh tia bada ramin Sama Ku jadi ramin yŭn bidagang!”

¹⁷ Ka bara murid-I ingat pinganang Surat-kudus adi nang, “Pinyirindu Ku di ramin Mai, O Tapa, mbŭh bijagu darŭm Aku keya ka apui.”

¹⁸Bara Pinguasa Jahudi tudu Jesus ka siken, “Ani pingandai-nginga adi bisa Mai ndai ngga kiren adŭp Mai biyŭn hak ndai kayuh ati?”

¹⁹ Jesus nam, “Nyirubuh Ramin Tuhan ati; darŭm taruh andu Aku re pijog-i dinge.”

²⁰“Kuu re pijog-i darŭm taruh andu?” ngara siken Ayŭh. “Pat puru-nŭm sawa daya pijog Ramin Tuhan ati!”

²¹Pak Ramin Tuhan adi Jesus nang inŭh pŭrŭng adŭp-I.

²²Ngapŭi kan Jesus dog pakat so kabŭs, bara murid-I ingat Ayŭh ko nang sakanŭ, ka ngara sabah Surat-kudus samŭn kayuh adi Jesus ko nang.

²³Sitadŭn Jesus agi di Jerusalem, di tika Gawai Paska, bagŭ daya mbŭh sabah di Ayŭh kan ngara kiris pingandai-nginga adi-I ndai.

²⁴Pak Jesus dŭh sabah ngara, sabab Ayŭh puan atin manusia.

²⁵Dŭhsah daya kidaan di Ayŭh pasar tadŭ tadŭ daya, amai Ayŭh mbŭh puan isi atin manusia.