Read Biatah Bidayuh JOHN 20 Bible Online

JOHN 20 - Biatah Bidayuh bible

JOHN 20

¹Awar isan isan andu minggu, darŭm-i gibabŭ karŭm, Mary Magdalene di ka kubur ka kiris batuh adi ko dog na di rubang kubur mbŭh dog kadi.

²Ayŭh bikaduh ka yŭn Simon Peter samŭn murid anŭ ndi, adi Jesus rindu, ka kidaan di ngara, “Daya mbŭh tambit Tuhan so kubur; kieh dŭh puan diki ngara na Ayŭh!”

³Jadi Peter ngga murid anŭ ndi di ka kubur.

⁴Ngara duwŭh bikaduh, pak murid anŭ ndi raju dŭ so Peter ka mbŭh diŭ ndŭg kubur.

⁵Ayŭh mutu ka kiris banang linen, pak dŭh-i mŭrŭt.

⁶Simon Peter mandŭg tunda ayŭh, ka radus mŭrŭt ka darŭm kubur ayŭh kiris banang linen diginŭ

⁷samŭn banang adi ngga marut ubak Jesus. Dŭh-i bigaur ngga banang linen anŭ pak tibarun sadi adŭp-i.

⁸Ka murid anŭ ndi, adi diŭ ndŭg kubur, sua mŭrŭt; ayŭh kiris ka sabah. (

⁹Ngara gibayuh mirati pinganang Surat-kudus adi nang Ayŭh dŭh siŭn dŭh makat so kabŭs.)

¹⁰Komŭnŭ murid murid anŭ maad.

¹¹Mary mijog sien di sapa kubur. Buang-i sien ayŭh mutu tingga ka darŭm kubur

¹²ka kiris duwŭh naan malaikat nēn piraka buda, guru di yŭn Jesus ko dog piguring, ndi tura ka ubak ka ndi tura ka kaja.

¹³“Dayung, mani kuu sien?” ngara siken ayŭh. Ayŭh nam, “Daya mbŭh tambit Tuhan ku; aku dŭh puan diki ngara na Ayŭh!”

¹⁴Ayŭh bigiring ka kiris Jesus mijog diginŭ; pak dŭh-i natŭng anŭ Jesus.

¹⁵“Dayung, mani kuu sien?” Jesus siken ayŭh. “Asi jiroh mu?” Pikir Ayŭh tukang-teya, ayŭh nang di Ayŭh, “Kambŭi kaam inŭh adi tambit Ayŭh, bai, kidaan di aku diki kaam na Ayŭh, isa aku di tambit Ayŭh.”

¹⁶Jesus nang di ayŭh, “Mary!” Ayŭh bigiring nura Jesus ka nang darŭm piminyu Hebrew, “Rabboni!” (Rati-i, “Gurū.”)

¹⁷“Dŭhnyah tama Aku,” Jesus nang di ayŭh, “sabab Aku gibayuh maad ka Sama. Pak di ka bara jurud Ku ka kidaan di ngara Aku re pari ka Ayŭh adi Sama Ku ka adi Sama ngara, Tapa Ku ka Tapa ngara.”

¹⁸Jadi Mary Magdalene panu di kidaan di bara murid nang adŭp-i agi kiris Tuhan ka kidaan di ngara kayuh adi-I ko kidaan di ayŭh.

¹⁹Di andu Minggu anŭ, kan-i mbŭh karŭm, bara murid Jesus tikuruk di ndi ramin buang sopŭrŭg tiban mbŭh birabŭt, sabab ngara taru bara Pinguasa Jahudi. Jesus mandŭg ka mijog di ruang ngara ka nang, “Damai ka angān.”

²⁰Ripas-I ko nang sakanŭ, Ayŭh kiren tangan-I samŭn tigang-I. Bara murid mbŭh raru gaŭn kiris Tuhan.

²¹Jesus nang di ngara dinge, “Damai ka angān. Nimun Sama mbŭh pait Aku, simŭnŭ gŭh Aku pait angān.”

²²Komŭnŭ Ayŭh ngasŭng di tunduh ngara ka nang, “Kambat Roh Kudus.

²³ Kambŭi angān apun dosa daya, dosa ngara dog apun; kambŭi angān dŭh apun dosa daya, dosa ngara dŭh dog apun.”

²⁴Ndi so ngara adi simŭng-duwŭh naan murid Jesus, dŭn Thomas (dog kadŭn anak-apid), mating sua ngga ngara kan Jesus mandŭg.

²⁵Jadi bara murid adi bŭkŭn kidaan di ayŭh, “Kieh agi kiris Tuhan!” Thomas nang di ngara, “Kambŭi gibayuh kiris arit pasak di tangan-I, ka tama arit anŭ samŭn arit jarok di tigang-I, aku manŭn dŭh re sabah.”

²⁶Ndi minggu ripas anŭ, bara murid tikuruk dinge darŭm arŭn, ka Thomas mbŭh agi ngga ngara. Sopŭrŭg tiban mbŭh birabŭt, pak Jesus mandŭg ka mijog di ruang ngara ka nang, “Damai ka angān.”

²⁷Komŭnŭ Ayŭh nang di Thomas, “Na trinju mu digiti, ka tingga tangan Ku; ton tangan mu ka na-i di tigang Ku. Dŭhnyah kurang sabah, pak sabah meh!”

²⁸Thomas nam Ayŭh, “Tuhan ku ka Tapa ku!”

²⁹Jesus nang di ayŭh, “Kuu sabah sabab kuu kiris Aku kah? Sanang inŭh ngara adi sabah pŭn-i dŭh kiris Aku!”

³⁰Di sirung jawin bara murid-I Jesus agi ndai bagŭ pingandai-nginga adi bŭkŭn adi mating dog nuris darŭm surat ati.

³¹Pak sopŭrŭg ati dog nuris siŭn angān bisa sabah[36] Jesus ati sawŭ Kristus, Anak Tapa, ka so ka pinyabah ngan angān bisa dapŭd udip adi sawŭ.