Read Biatah Bidayuh JOHN 21 Bible Online

JOHN 21 - Biatah Bidayuh bible

JOHN 21

¹Ripas anŭ, Jesus pinandŭng adŭp-I dinge di bara murid-I di Rawŭt Tiberias. Ka simuti inŭh Ayŭh pinandŭng adŭp-I.

²Simon Peter, Thomas (adi dog kadŭn anak apid), Nathanael (sianŭ adi so Cana di Galilee), anak anak Zebedee, ka duwŭh naan murid Jesus adi bŭkŭn, agi tikuruk.

³ Simon Peter nang di ngara, “Aku re di nyijara iken.” “Kieh re sua,” ngara nang di ayŭh. Jadi ngara matak pakai arud, pak ndi ngarŭm ngarŭm anŭ ngara dŭh dapŭd ani ani.

⁴Darŭm batŭh andu makat, Jesus mijog di tabing, pak bara murid dŭh puan anŭ Jesus.

⁵Jesus siken ngara, “Dingan, agi kah dapŭd ngan?” “Mating,” ngara nam.

⁶ Ayŭh nang di ngara, “Kibar jara ngan tura ka tauh arud, ka angān re dapŭd iken.” Jadi ngara kibar jara, ka mbŭh rasu dŭh tungang tarik-i pari, sabab ngara mbŭh nakap raru bagŭ iken.

⁷Murid adi Jesus rindu nang di Peter, “Tuhan anŭ!” Kan Peter dingah anŭ Tuhan, ayŭh kasŭk jipo-i (adi-i kadi darŭm-i nyiraja) ka sitabung ka piin.

⁸Murid murid adi bŭkŭn di ka deyŭh ngga arud, buang tarik jara ngara adi mbŭh puno da iken. Ngara dŭh jo so deyŭh, agi kurang rabis siratus mita.

⁹Kan ngara mbŭh ndŭg tabing, ngara kiris iken dog badang di tunduh apui arang ka agi kada ruti diginŭ.

¹⁰Jesus nang di ngara, “Taban kada iken adi angān bauh ko nakap.”

¹¹Simon Peter mŭrŭt arud ka tarik jara puno ngga dudu tibande iken ka deyŭh; agi siratus rimŭh puru-taruh sopŭrŭg-i. Sunggu-i mbŭh raru bagŭ, jara dŭh tiratak.

¹²Jesus nang di ngara, “Ja, man.” Mating bara murid birani siken ayŭh, “Asi Kaam?” sabab ngara puan nang anŭ Tuhan.

¹³Jadi Jesus mbit ruti anŭ, ka nggen-i di ngara; simŭnŭ gŭh Ayŭh ngga iken anŭ.

¹⁴Ati mbŭh adi pitaruh saba Jesus pinandŭng adŭp-I di bara murid ripas Ayŭh dog pakat so kabŭs.

¹⁵Kan ngara muko man, Jesus nang di Peter, “Simon anak John, rabis dŭ kah pinyirindu mu di Aku so pinyirindu ngara ati di Aku?” “Rabis, Tuhan,” ayŭh nam, “Kaam puan aku rindu Kaam.” Jesus nang di ayŭh, “Sita bara anak biri Ku.”

¹⁶Jesus nang dinge di ayŭh, “Simon anak John, rindu mu kah Aku?” “Rindu ku Kaam, Tuhan,” ayŭh nam, “Kaam puan aku rindu Kaam.” Jesus nang di ayŭh, “Sita biri biri Ku”

¹⁷Jesus siken dinge, adi pitaruh saba, “Simon anak John, rindu mu kah Aku?” Peter mbŭh susah sabab Jesus mbŭh pitaruh kari siken ayŭh, “Rindu mu kah dŭh Aku?” Jadi ayŭh nang di Jesus, “Tuhan, Kaam puan sopŭrŭg kayuh; Kaam puan aku rindu Kaam!” Jesus nang di ayŭh, “Sita biri biri Ku.

¹⁸Aku kidaan di kuu kayuh adi sawŭ: di Andu kuu gibabŭ mara kuu taŭn sidia an panu kamaki maki mu raan; pak kan kuu mbŭh minyamba, kuu re ton tangan mu, ka daya bŭkŭn re mŭŭng kuu, ka taban kuu ka tarun adi dŭh kuu raan.” (

¹⁹Darŭm-I minyu sakanŭ, Jesus mbŭh kidaan munki pinyikabŭs Peter adi ngga-i re nyibragah Tapa.) Ka Jesus nang di ayŭh, “Tunda Aku!”

²⁰ Peter bigiring ka kiris di punok-i murid anŭ ndi, adi Jesus rindu; sianŭ adi ko guru ngapid Jesus di ngarŭm ngara man, adi nang, “Tuhan asi ayŭh adi re jua Kaam?”

²¹Kan Peter kiris ayŭh, Peter siken Jesus, “Tuhan, daya ati boh?”

²²Jesus nam ayŭh, “Kambŭi Aku raan ayŭh udip ndŭg ka Aku mandŭg dinge, ani meh anŭ di kuu? Tunda Aku!”

²³Jadi so pinganang anŭ, bara pinunda adi bŭkŭn samah nang murid anŭ dŭh re kabŭs. Pak Jesus mating nang ayŭh dŭh re kabŭs; Ayŭh batur nang, “Kambŭi Aku raan ayŭh udip ndŭg ka Aku mandŭg dinge, ani meh anŭ di kuu?”

²⁴Ayŭh inŭh murid adi kidaan sopŭrŭg kayuh ati. Ayŭh gŭh adi nuris-i, ka kieh puan ayŭh kidaan kayuh adi sawŭ.

²⁵Mbŭh bagŭ kayuh bŭkŭn adi Jesus ko ndai. Kambŭi sopŭrŭg-i dog nuris ndi ngga ndi, jaka ku ndi ong ong ati dŭh re tungang muat sopŭrŭg surat anŭ adi patut dog nuris.