Read Biatah Bidayuh JOHN 3 Bible Online

JOHN 3 - Biatah Bidayuh bible

JOHN 3

¹Agi ndi naan pinguru daya Jahudi, dŭn Nicodemus, adi so tibaran daya Pharisee.

²Singarŭm ayŭh mandŭg tudu Jesus ka nang, “Rabbi, kieh puan Kaam gurū adi kana mandŭg so Tapa. Mating daya tungang ndai pingandai-nginga adi Kaam ndai adŭ-i kambŭi Tapa agi ngga ayŭh.”

³Jesus nam, “Aku kidaan di kuu kayuh adi sawŭ: mating daya tungang kinyam Pinyipritah Tapa,[4] kambŭi ayŭh dŭh dog biranak bauh.”[5]

⁴“Simuki daya adi mbŭh minyamba bisa dog biranak bauh?” Nicodemus siken. “Ayŭh manŭn dŭh bisa mŭrŭt ka darŭm tain sindŭ-i ka dog biranak bauh!”

⁵“Aku kidaan di kuu kayuh adi sawŭ,” Jesus nam, “mating daya tungang kinyam Pinyipritah Tapa kambŭi ayŭh dŭh dog biranak bauh ngga piin ka ngga Roh Kudus.

⁶Ayŭh adi dog biranak so isin taŭn-i isin, pak ayŭh adi dog biranak so Roh Kudus taŭn-i roh.

⁷Dŭhnyah gŭgŭh sabab Aku nang angān dŭh siŭn dŭh dog biranak bauh.

⁸Sabak poh ka barang yŭn-i raan; kuu dingah jawŭn-i, pak kuu dŭh puan so ki-i mandŭg puan kah kamaki-i re. Simŭnŭ inŭh daya adi dog biranak so Roh Kudus.”

⁹“Simuki-i re bisa jadi?” Nicodemus siken.

¹⁰Jesus nam, “Kuu gurū adi bās di Israel, ka kuu dŭh puan kayuh ati?

¹¹Aku kidaan di kuu kayuh adi sawŭ: kieh minyu pasar kayuh adi kieh puan ka kidaan kayuh adi kieh mbŭh kiris, pak angān dŭh an trima kayuh adi nang ami.

¹²Kuu dŭh sabah kambŭi Aku kidaan di kuu kayuh ong; simuki meh garang kuu re sabah Aku kambŭi Aku kidaan di kuu kayuh shorga?

¹³Mating daya ko maad ka shorga, adŭ-i Anak Manusia, adi mandŭg so shorga.”

¹⁴ Nimun Moses ko pijog jippŭh timaga di tiang kayuh di tarun tana-pajam, simŭnŭ gŭh Anak Manusia dŭh siŭn dŭh dog pijog,

¹⁵isa sopŭrŭg adi sabah di Ayŭh bisa dapŭd udip adi sawŭ adi tan adu adu.

¹⁶Tapa ruai rindu ong ndŭg ka mbŭh nggen Anak tambŭ-I, isa barang naan adi sabah di Ayŭh dŭh re kabŭs pak dapŭd udip adi sawŭ adi tan adu adu.

¹⁷Amai Tapa dŭh pait Anak-I ka ong da ngukum daya; Ayŭh pait Anak-I da jadi Pinyikudip ngara.

¹⁸Ngara adi sabah di Anak dŭh re dog ukum; pak ngara adi dŭh sabah taŭn mbŭh tui dog ukum, sabab ngara dŭh sabah di Anak tambŭ Tapa.

¹⁹Simuti inŭh ukum dog pimanu: jawa mbŭh mandŭg ka ong, pak daya dŭh rindu jawa; daya rindu karŭm, amai kraja pingandai ngara arap.

²⁰Ngara adi ndai pingandai arap tiru di jawa ka dŭh-i an mandŭg ka jawa, sabab ngara dŭh raan pingandai ngara tatŭng di jawa.

²¹Pak ngara adi ndai pinyiraan Tapa mandŭg ka jawa isa jawa kiren pingandai-i agi nanyam ka pinyiraan Tapa.

²²Ripas anŭ, Jesus ngga bara murid-I di ka utung rais Judea; di yŭn-I rŭŭ ngga ngara mua tian-i ka baptisa daya.

²³ John gŭh baptisa daya di Aenon, dŭh jo so Salim, sabab diginŭ bagŭ piin. Bara daya mandŭg tudu ayŭh, ka ayŭh baptisa ngara. (Di tika anŭ John gibayuh mŭrŭt jer.)

²⁵Kada murid John piguru bikarit ngga ndi naan daya Jahudi[6] pasar adat pibisig.

²⁶Komŭnŭ ngara di ka John ka nang di ayŭh, “Gurū, ingat mai kah daya adi agi ngga kaam di pah mandi tura ka timor Yang Jordan? Agi kaam minyu pasar Ayŭh. Ayŭh baptisa daya madin, ka sopŭrŭg daya mandŭg tudu Ayŭh!”

²⁷John nam, “Mating daya bisa biyŭn kayuh, kambŭi Tapa dŭh nggen.

²⁸ Adŭp ngan puan aku ko nang, ‘Aku dŭh Kristus, pak mbŭh dog pait diŭ so Ayŭh.’

²⁹Pingaten dari inŭh adi dapu pingaten dayung; pak jerā pingaten dari, mijog nguan ka dingah, adi gaŭn kan-i dingah sirŭŭn pingaten dari. Simŭnŭ inŭh pinyigaŭn ku jadi gŭgŭp.

³⁰Ayŭh dŭh siŭn dŭh jadi rabis biguna darŭm aku jadi kurang biguna.”

³¹Ayŭh adi mandŭg so sambu agi bās dŭ so sopŭrŭg daya. Ayŭh adi mandŭg so ong mbŭh tung ong, ka minyu pasar kayuh ong. Pak Ayŭh adi mandŭg so shorga mbŭh rabis bigatung so adi bŭkŭn.

³²Ayŭh kidaan kayuh adi-I mbŭh kiris ka dingah, pak mating daya an dingah kayuh adi-I nang.

³³Pak daya adi sabah pinganang-I mbŭh natu so dieh nang Tapa agi sawŭ.

³⁴Ayŭh adi Tapa pait minyu pinganang so Tapa, sabab Tapa mbŭh nggen Roh-I di Ayŭh ngga sipuno-i.

³⁵ Sama rindu Anak-I ka mbŭh na sopŭrŭg kayuh di ribo kuasa-I.

³⁶Daya adi sabah di Anak dapŭd udip adi sawŭ adi tan adu adu, pak daya adi nyibireu pinganang Anak dŭh-i re dapŭd udip anŭ; ayŭh re ruro di ribo ukum Tapa.