Read Biatah Bidayuh JOHN 6 Bible Online

JOHN 6 - Biatah Bidayuh bible

JOHN 6

¹Ripas anŭ, Jesus mutas Danu Galilee (puan kah Danu Tiberias, dŭn-i anŭ ndi).

²Bara daya bagŭ tunda Ayŭh, sabab ngara mbŭh kiris pingandai nginga-I, adi pibua daya birandam.

³Jesus maad ndi sandah ka guru ngga bara murid-I.

⁵Jesus tingga bait tauh-I ka kiris bara daya bagŭ mandŭg tudu adŭp-I; Ayŭh siken Philip, “So ki ata bisa miris pinguman dang ngga paan bara daya ati?” (

⁶Ayŭh nang sakanŭ ngga suba Philip; sibandar adŭp-I puan ani re-I ndai.)

⁷Philip nam, “Duwŭh ratus kiping duit pirak,[11] dŭh-i re dang ngga miris ruti yŭn bara daya ati, sunggu bait kani barang naan kambat nisŭ.”

⁸Murid-I anŭ ndi, Andrew, adi jurud Simon Peter, nang,

⁹“Agi ndi anak dari digiti; ayŭh biyŭn rimŭh baru ruti jeri ka duwŭh iken. Pak anŭ manŭn-i dŭh re dang yŭn sopŭrŭg daya ati.”

¹⁰“Bada bara daya guru,” Jesus nang di ngara. (Diginŭ mbŭh agi bagŭ kupai.) Jadi sopŭrŭg daya guru; agi-i rimŭh ribu naan bara dari.

¹¹Jesus mbit ruti, ko-I nggen trima kaseh di Tapa, Ayŭh nggen-i di sopŭrŭg bara adi agi guru diginŭ. Simŭnŭ gŭh Ayŭh ngga iken anŭ, ka sopŭrŭg daya mbŭh kambat sikiang adi ngara raan.

¹²Kan sopŭrŭg mbŭh bisoh, Ayŭh nang di bara murid-I, “Sun tadŭh-i, isa mating dog saat.”

¹³Jadi ngara sun ka ngisi simŭng-duwŭh bakur ngga tadŭh tadŭh rimŭh baru ruti jeri adi bara daya ko man.

¹⁴Kiris pingandai-nginga ati adi Jesus ndai, bara daya rasu nang, “Sawŭ inŭh siati Nabi anŭ[12] adi dog kajŭn re mandŭg ka ong ati!”

¹⁵Jesus puan ngara re an tudu adŭp-I ka takan Ayŭh da jadi raja; jadi Ayŭh bu ka arong sandah sadi adŭp-I.

¹⁶Kan-i mbŭh singumi andu, bara murid Jesus mūn ka rawŭt,

¹⁷mŭrŭt ndi arud ka pari, mutas rawŭt nuju Capernaum. Andu mbŭh karŭm, pak Jesus gibabŭ dŭh mandŭg ka ngara.

¹⁸Di tika anŭ, sabak agi bana poh ka ndai girumbang.

¹⁹Bara murid mbŭh bikayuh kira ka mbŭh rimŭh puan kah nŭm kilomita di rawŭt kan ngara kiris Jesus panu di tunduh piin, mandŭg tudu arud. Ngara mbŭh tikaran.

²⁰“Dŭhnyah taru,” Jesus nang di ngara, “Aku ati!”

²¹Ngara angan Ayŭh ka bada Ayŭh mŭrŭt arud, ka nganŭ gŭh arud ngara mbŭh ndŭg deyŭh, tarun adi taŭn re ngara ka.

²²Andu anŭ ndi bara adi rŭŭ di pah mandi rawŭt anŭ ingat ndi adŭ arud adi agi diginŭ. Ngara puan Jesus dŭh mŭrŭt arud anŭ samah bara murid-I; murid-I taŭn mbŭh matak dŭh ayō Ayŭh.

²³Arud arud adi bŭkŭn, adi so Tiberias, agi mandŭg ka deyŭh sindŭk tarun yŭn bara daya ko man ruti ripas Jesus ko nggen trima kaseh.

²⁴Kan bara daya kiris Jesus mating diginŭ samŭn bara murid-I, ngara mŭrŭt arud arud anŭ ka matak ka Capernaum, di jiroh Jesus.

²⁵Kan ngara mbŭh dapŭd Jesus di pah mandi rawŭt, ngara nang di Ayŭh, “Gurū, sinde Kaam ndŭg ti?”

²⁶Jesus nam, “Aku kidaan di angān kayuh adi sawŭ: angān jiroh Aku sabab angān mbŭh bisoh man ruti, dŭh sabab angān mirati pingandai-nginga Ku.

²⁷Dŭhnyah gruwŭn pinguman adi bisa bangŭs, pak gruwŭn pinguman adi nggen udip adi sawŭ adi tan adu adu. Anŭ inŭh pinguman adi Anak Manusia nggen di angān, sabab Tapa adi Sama, mbŭh nggen di Ayŭh hak ngga ndai simŭnŭ.”

²⁸Jadi ngara siken Ayŭh, “Ani sibandar-i kayuh adi Tapa raan kieh ndai?”

²⁹Jesus nam, “Anŭ adi Tapa raan angān ndai inŭh sabah di sianŭ adi-I pait.”

³⁰Ngara nam, “Pingandai nginga ani meh bisa Mai ndai da kieh tingga isa kieh bisa sabah di Kaam? Ani re Mai ndai?

³¹ Tayung-babuk ami man manna di tarun tana-pajam; nimun adi dog nuris di Surat-kudus, ‘Ayŭh nggen di ngara ruti so shorga da ngara man.’ ”

³²“Aku kidaan di angān kayuh adi sawŭ,” Jesus nang. “Anŭ adi Moses nggen di angān dŭh-i[13] ruti so shorga; adŭp Sama Ku inŭh adi nggen di angān ruti adi sawŭ so shorga.

³³Amai ruti adi Tapa nggen inŭh sianŭ adi mūn so shorga adi nggen udip adi sawŭ di daya di ong.”

³⁴“Tuan,” ngara nang di Ayŭh, “ari nggen ruti anŭ di kieh.”

³⁵“Aku ati inŭh ruti adi nggen udip,” Jesus nang di ngara. “Daya adi mandŭg ka Aku dŭh re tia sibŭrŭk; daya adi sabah di Aku dŭh re tia badŭh asŭng.

³⁶Tong-i Aku nang di angān, angān kiris Aku pak angān dŭh sabah.

³⁷Sopŭrŭg daya adi Sama mbŭh nggen di Aku, re mandŭg ka Aku. Aku dŭh re kasig daya adi mandŭg ka Aku,

³⁸Amai Aku mbŭh mandŭg so shorga dŭh sabab an ndai kayuh nanyam pinyiraan adŭp Ku, pak an ndai kayuh nanyam pinyiraan-I adi pait Aku.

³⁹Ka-i mbŭh nanyam ka pinyiraan-I adi bada Aku mandŭg inŭh Aku dŭh siŭn kinanyap ngara adi-I mbŭh nggen di Aku, isa Aku bisa pakat ngara di andu sikasŭn.

⁴⁰Amai pinyiraan Sama Ku inŭh ngara adi kiris Anak ka sabah di Ayŭh patut dapŭd udip adi sawŭ adi tan adu adu. Ka Aku re pakat ngara di andu sikasŭn.”

⁴¹Bara daya rasu mingungut pasar Ayŭh, sabab Ayŭh nang, “Aku ati ruti adi mūn so shorga.”

⁴²Ngara nang, “Daya ati, Jesus anak Joseph, dŭh kah? Ata puan sindŭ sama-I. Ka simuki meh garang, Ayŭh nang adŭp-I mūn so shorga?”

⁴³Jesus nam, “Dŭhnyah mingungut dupan adŭp ngan.

⁴⁴Mating daya bisa mandŭg ka Aku kambŭi Sama adi bada Aku mandŭg dŭh bada ayŭh mandŭg ka Aku; Aku re pakat ayŭh di andu sikasŭn.

⁴⁵ Nabi ko nuris sakati, ‘Barang naan re dog ngajar Tapa.’ Daya adi dingah Sama ka birajar so Ayŭh, mandŭg ka Aku.

⁴⁶Dŭh sirati-i daya ko kiris Sama; Ayŭh adi mandŭg so Tapa adŭ adi ko kiris Sama.

⁴⁷Aku kidaan di angān kayuh adi sawŭ: ayŭh adi sabah biyŭn udip adi sawŭ adi tan adu adu.

⁴⁸Aku ati ruti adi nggen udip.

⁴⁹Tayung-babuk ngan man manna di tarun tana-pajam, pak ngara kabŭs.

⁵⁰Pak ruti adi mandŭg so shorga agi bŭkŭn; daya adi man-i dŭh re kabŭs.

⁵¹Aku ati ruti adi nggen udip adi mūn so shorga. Kambŭi angān man ruti ati, angān re udip adu adu. Ruti adi Aku nggen di angān inŭh pŭrŭng adŭp Ku; Aku nggen-i isa sopŭrŭg daya di ong dapŭd udip.”

⁵²Dingah sakanŭ, ngara piguru bikarit dupan adŭp-i. “Simuki daya ati bisa nggen pŭrŭng-I da ata man?” ngara siken.

⁵³Jesus nang di ngara, “Aku kidaan di angān kayuh adi sawŭ: kambŭi angān dŭh man pŭrŭng Anak Manusia ka nok deya-I, angān dŭh re biyŭn udip adi sawŭ darŭm adŭp ngan.

⁵⁴Daya adi man pŭrŭng Ku ka nok deya Ku biyŭn udip adi sawŭ adi tan adu adu, ka Aku re pakat ayŭh di andu sikasŭn.

⁵⁵Amai pŭrŭng Ku inŭh pinguman adi sawŭ, ka deya Ku inŭh nok adi sawŭ.

⁵⁶Daya adi man pŭrŭng Ku ka nok deya Ku agi udip darŭm Aku, ka Aku udip darŭm ayŭh.

⁵⁷Sama adi udip mbŭh pait Aku, ka sabab Ayŭh aku udip gŭh. Simŭnŭ gŭh daya adi man Aku re udip sabab Aku.

⁵⁸Ati inŭh ruti adi mūn so shorga; dŭh-i mun ruti anŭ adi tayung-babuk ngan man, ka ripas anŭ ngara kabŭs. Ayŭh adi man ruti ati re udip adu adu.”

⁵⁹Sopŭrŭg ati Jesus nang darŭm-I ngajar di ramin simayang-Jahudi, di Capernaum.

⁶⁰Bagŭ bara pinunda-I dingah Ayŭh nang sakanŭ, ka ngara nang, “Ajar ati raru tŭrŭp. Asi re tungang mirati-i?”

⁶¹Dŭh dog kidaan, Jesus puan ngara mbŭh mingungut pasar kayuh adi nang-I anŭ, jadi Ayŭh nang di ngara, “Agi kah pinganang Ku anŭ bada angān jimŭ?

⁶²Nyamtadar-i, munki kambŭi angān kiris Anak Manusia pari ka yŭn adi so-I mandŭg?

⁶³Anŭ adi nggen udip di manusia inŭh Roh Tapa; kuasa manusia dŭh tungang. Pinganang Ku tejah inŭh mandŭg so Roh Kudus adi nggen udip.

⁶⁴Pak agi so angān adi babŭ dŭh sabah.” (Jesus taŭn puan so sibungas-i asi ngara adi dŭh sabah ka asi so ngara adi re jua adŭp-I.)

⁶⁵Ka-I nang dinge, “Anŭ inŭh sabab Aku kidaan di angān, mating daya tungang mandŭg ka Aku kambŭi dŭh so pinyibada Sama.”

⁶⁶Sitagar anŭ, bagŭ pinunda Jesus bu ka dŭh tia tunda Ayŭh.

⁶⁷Jadi Ayŭh siken ngara adi simŭng-duwŭh naan murid-I, “Angān boh munki, re sua bu kah?”

⁶⁸ Simon Peter nam, “Tuhan, ka yŭn asi kieh re bu? Kaam biyŭn pinganang adi nggen udip adi sawŭ adi tan adu adu.

⁶⁹Kieh madin mbŭh sabah ka puan Kaam inŭh sianŭ adi Kudus adi mandŭg so Tapa.”

⁷⁰Jesus nam, “Aku ko mien angān adi simŭng-duwŭh naan, dŭh kah? Pak ndi so angān mbŭh umot!”

⁷¹Ayŭh minyu pasar Judas, anak Simon Iscariot. Amai Judas, sunggu ayŭh ndi so ngara adi simŭng-duwŭh naan murid Jesus, ayŭh inŭh adi re jua Jesus.