Read Biatah Bidayuh JOHN 7 Bible Online

JOHN 7 - Biatah Bidayuh bible

JOHN 7

¹Ripas anŭ, Jesus panu ka barang yŭn di tarun tana Galilee; Ayŭh abah panu di tarun tana Judea, sabab bara Pinguasa Jahudi diginŭ an siŭ Ayŭh.

² Gawai Bari-Dawŭn mbŭh sindŭk,

³jadi bara jurud Jesus nang di Ayŭh, “Tingge tarun ati ka bu ka tarun tana Judea, isa bara pinunda Mu bisa kiris kayuh adi Kuu ndai.

⁴Mating daya ndai kayuh darŭm bisukan, kambŭi an bada daya puan adŭp-i. Amai Kuu mbŭh ndai kayuh ati, bada meh adŭp Mu dog puan ndi ong ong!” (

⁵Bara Jurud adŭp-I dŭh gŭh sabah di Ayŭh.)

⁶Jesus nang di ngara, “Tipuh Ku gibayuh ndŭg. Di angān bisa tadŭ nga-i.

⁷Ong dŭh bisa tiru di angān, pak-i tiru di Aku, sabab Aku siraru nyarah pingandai arap-i.

⁸Panu angān di ka gawai anŭ. Aku dŭh di[14] ka gawai anŭ, sabab tipuh Ku gibayuh.”

⁹Ayŭh nang sakanŭ, ka pijuu rŭŭ di Galilee.

¹⁰Ripas bara jurud-I mbŭh panu di ka gawai, Jesus tunda, pak darŭm bisukan.

¹¹Bara Pinguasa Jahudi jiroh Ayŭh di gawai. “Diki Ayŭh?” ngara siken.

¹²Bara daya bagŭ samah sigayas pasar Ayŭh. “Ayŭh daya adi kana,” kada daya nang. “Dŭh,” adi bŭkŭn nang, “Ayŭh kinanyap daya.”

¹³Pak mating daya birani sibarang minyu pasar Ayŭh, sabab ngara taru bara Pinguasa Jahudi.

¹⁴Kan-i mbŭh rapŭt gawai, Jesus di ka Ramin Tuhan ka piguru ngajar.

¹⁵Bara Pinguasa Jahudi mbŭh inga inga ka nang, “So ki pimandai daya ati, Ayŭh adi bŭn birajar jadi gurū Ukum-adat Jahudi?”

¹⁶Jesus nam, “Anŭ adi Aku ngajar, dŭh-i tung jaku, pak mandŭg so Tapa adi bada Aku mandŭg.

¹⁷Asi asi adi raan ndai pinyiraan Tapa re puan so ki kayuh adi Aku ngajar mandŭg, so Tapa kah so kuasa adŭp Ku.

¹⁸Daya adi minyu ngga kuasa adŭp-i taŭn suba an kibās adŭp-i; pak Ayŭh adi an kibās sianŭ adi bada Ayŭh mandŭg taŭn-I tŭnggŭn, ka mating kayuh kadong pasar Ayŭh.

¹⁹Moses nggen di angān Ukum-adat, dŭh kah? Pak ndi so angān mating gŭh sita Ukum-adat anŭ. Mani angān an siŭ Aku?”

²⁰“Kaam pirumot!” bara daya nam. “Asi an siŭ Kaam?”

²¹Jesus nam, “Aku ndai pingandai-nginga, ka sopŭrŭg ngan mbŭh inga inga.

²² Moses pesan angān da nyunat bara anak dari ngan (sunggu-i dŭh Moses pak tayung-babuk ngan adi piguru-i), ka sawŭ meh angān nyunat anak dari di andu Sabbath.

²³ Kambŭi anak dari dog nyunat di andu Sabbath ngga sita Ukum-adat Moses, mani angān baji kiris Aku bada daya sukup bua di andu Sabbath?

²⁴Dŭh tia tingga arap kana daya so ka ayong daya, pak tingga arap kana daya pakai itong adi tŭnggŭn.”

²⁵Agi kada daya Jerusalem nang, “Dŭh kah siati adi Pinguasa Jahudi an siŭ?

²⁶Tingga no! Ayŭh minyu di sirung jawin daya bagŭ, ka mating daya nyakar Ayŭh! Manyah-i ngara mbŭh puan Ayŭh sawŭ Kristus?

²⁷Pak kan Kristus mandŭg, mating daya re puan so ki Ayŭh mandŭg. Pak sopŭrŭg ta puan so ki daya ati mandŭg.”

²⁸Darŭm Jesus ngajar di Ramin Tuhan, Ayŭh nang ngga sirŭŭn bana, “Angān puan Aku, ka so ki Aku mandŭg? Aku dŭh mandŭg ngga pinyiraan adŭp Ku. Ayŭh adi bada Aku mandŭg inŭh sawŭ, ka angān dŭh puan Ayŭh.

²⁹Aku puan Ayŭh, sabab Aku mandŭg so Ayŭh, ka Ayŭh inŭh adi bada Aku mandŭg.”

³⁰Jadi ngara suba an nakap Ayŭh, pak mating daya na tangan di Ayŭh, sabab tipuh-I gibayuh mandŭg.

³¹Pak di uruk daya bagŭ anŭ, mbŭh bagŭ adi mbŭh sabah di Ayŭh. Ngara nang, “Kan Kristus mandŭg, re bagŭ dŭ kah pingandai-nginga dog ndai-I, so tung siati?”

³²Bara daya Pharisee dingah daya bagŭ sigayas kayuh anŭ pasar Jesus; jadi ngara samŭn bara pingubak imam pait bara adi jaga Ramin Tuhan da di nakap Ayŭh.

³³Jesus nang, “Aku dŭh re tui agi ngga angān, ko anŭ Aku re pari ka Ayŭh adi bada Aku mandŭg.

³⁴Angān re jiroh Aku, pak angān dŭh re dapŭd Aku, sabab angān dŭh re tungang di ka tarun yŭn adi re Ku ka.”

³⁵Bara Pinguasa Jahudi nang dupan adŭp-i, “Kamaki Ayŭh re di, isa ata dŭh tungang dapŭd Ayŭh? Ayŭh re di ka rais adi jo kah, di yŭn daya bangsa ta agi rŭŭ bigaur ngga daya bangsa Greek, ka ngajar ngara?

³⁶Ayŭh nang ata re jiroh Ayŭh, pak dŭh re tungang dapŭd Ayŭh, ka ata dŭh re tungang di ka tarun yŭn adi re-I ka. Ani rati pinganang-I anŭ?”

³⁷ Di sikasŭn andu gawai, andu adi rabis biguna darŭm tipuh gawai anŭ, Jesus mijog ka nang ngga sirŭŭn bana, “Asi asi adi badŭh asŭng-i patut mandŭg ka Aku di nok.

³⁸ Sak adi nang Surat-kudus, ‘Asi asi adi sabah di Aku, piin adi nggen udip re aman so atin-i.’ ”[15]

³⁹Jesus nang sakanŭ pasar Roh Kudus, adi ngara adi sabah di Ayŭh re kambat. Di Tipuh anŭ, Roh Kudus gibayuh dog nggen, sabab Jesus gibayuh dog paad ka darŭm bragah.

⁴⁰Agi kada daya di dupan bara daya bagŭ dingah Ayŭh nang sakanŭ ka nang, “Daya ati sawŭ Nabi anŭ!”[16]

⁴¹Adi bŭkŭn nang, “Ayŭh inŭh Kristus!” Pak agi gŭh nang, “Kristus dŭh bisa mandŭg so Galilee!

⁴² Surat-kudus agi nang Kristus re mandŭg so sesang Raja David ka re dog biranak di Bethlehem, kupo adŭp David.”

⁴³Pinŭbŭn-i, bara daya pape jadi duwŭh tibaran nanyam ka pinyidapŭd ngara pasar Jesus.

⁴⁴Agi adi an nakap Ayŭh, pak ndi naan mating gŭh na tangan-i di Ayŭh.

⁴⁵Kan bara adi jaga Ramin Tuhan mbŭh pari, bara pingubak imam samŭn bara daya Pharisee siken ngara, “Mani dŭh taban Ayŭh?”

⁴⁶Ngara nam, “Gi-mating daya minyu mun Ayŭh!”

⁴⁷“Angān mbŭh dog nyibudo-I gŭh, kah?” bara daya Pharisee siken.

⁴⁸“Agi kah angān dingah Pinguasa Jahudi puan kah daya Pharisee sabah di Ayŭh?

⁴⁹Bara daya bagŭ anŭ dŭh puan Ukum-adat Moses; ngapŭi ngara mbŭh dog pangu Tapa!”

⁵⁰ Ndi so bara daya Pharisee anŭ inŭh Nicodemus, sianŭ adi ko bidapŭd ngga Jesus. Ayŭh nang di ngara,

⁵¹“Nunda Ukum-adat, ata dŭh bisa ngukum daya kambŭi gibayuh dingah adŭp-i puan kah nakit tingga kayuh adi-i ko ndai.”

⁵²Ngara nang di ayŭh, “Kuu ndi so ngara adi so Galilee kah? Nakit birajar Surat-kudus ka kuu re puan nang nabi bŭn mandŭg[17] so Galilee.”