Read Biatah Bidayuh PINGANDAI 10 Bible Online

PINGANDAI 10 - Biatah Bidayuh bible

PINGANDAI 10

¹Agi ndi naan daya di Caesarea dŭn Cornelius, adi pingubak tibaran soldadu daya Rome adi dog kadŭn “Rejimen Italy.”

²Ayŭh daya adi biyŭn atin taru di Tapa; ayŭh ngga sopŭrŭg manak-i nyambah Tapa. Ka mbŭh bagŭ gŭh kayuh adi ko-i ndai ngga turung daya sirata, buang siraru bidua ka Tapa.

³Ndi sidah ngga arong pukor taruh ripas kumbeng, ayŭh kiris keya ka darŭm pŭmŭh malaikat Tapa mandŭg ka nang di ayŭh, “Cornelius!”

⁴Ayŭh nakit tingga malaikat anŭ buang taru; ayŭh nang, “Ani, tuan?” Malaikat anŭ nam, “Tapa mbŭh munos asŭng-I di dua ngga di pingandai kana mu, ka mbŭh ingat kuu.

⁵Ka madin pait daya ka Joppa da jiroh ndi naan daya dŭn Simon Peter.

⁶Ayŭh nyandong ramin tukang nyamŭk anyit, dŭn Simon, adi piramin di tabing rawŭt.”

⁷Kan malaikat anŭ mbŭh bu, ayŭh bagan duwŭh naan daya gaji-i samŭn ndi naan soldadu adi biyŭn gŭh atin taru di Tapa, adi siraru agi ngga adŭp-i.

⁸Ayŭh kidaan di ngara kayuh adi mbŭh jadi ka pait ngara ka Joppa.

⁹Andu anŭ ndi, ngga arong kumbeng, darŭm ngara babŭ di aran pak mbŭh sindŭk Joppa, Peter maad ka tibung ramin an simayang.

¹⁰Ayŭh mbŭh sibŭrŭk ka raan man; pak sitadŭn daya sidia pinguman, ayŭh agi keya ka darŭm pŭmŭh kiris kayuh.

¹¹Ayŭh kiris rangit tikuka ka agi kayuh mūn, mun banang adi ramba, dog bisor ngga pat sikuh-i ka ong.

¹²Di darŭm-i agi barang masam dāng, adi bigawang ngga adi mikabur.

¹³Ka agi sirŭŭn nang di ayŭh, “Makat, Peter; simareh ka man!”

¹⁴Pak Peter nang, “Dŭh Tuhan! Bŭn aku man kayuh adi sŭn adat nang kais puan kah sembar.”

¹⁵Sirŭŭn anŭ nang di ayŭh dinge, “Dŭhnyah nang kais kayuh adi Tapa ko kidaan nang bisig.”

¹⁶Kayuh anŭ jadi simŭnŭ pitaruh kari, ka komŭnŭ kayuh anŭ dog tambit pari ka rangit.

¹⁷Sitadŭn Peter aŭn bipikir pasar rati kayuh adi-i kiris anŭ, daya adi dog pait Cornelius mbŭh dapŭd yŭn ramin Simon, ka madin mbŭh mijog di baŭm tiban buwang ramin.

¹⁸Ngara bagan ka siken, “Agi kah daya adi dŭn Simon Peter nyandong digiti?”

¹⁹Peter gi-aŭn suba jiroh rati kayuh adi-i bauh ko kiris anŭ, kan Roh Kudus nang, “Dingah! Taruh[11] naan daya agi mandŭg jiroh kuu.

²⁰Rikas mūn ka sagān, ka dŭhnyah abah tunda ngara amai Aku inŭh adi bada ngara mandŭg.”

²¹Jadi Peter mūn ka sagān ka nang di ngara, “Aku inŭh adi angān jiroh. Mani angān mandŭg?”

²²“Cornelius adi pingubak soldadu pait kieh,” ngara nam. “Ayŭh daya adi kana adi taru di Tapa, buang-i dog stabi bangsa daya Jahudi. Malaikat Tapa agi kidaan di ayŭh bada bagan kaam da di ka ramin-i, isa ayŭh bisa dingah kayuh adi patut kaam nang.”

²³Peter bada ngara mŭrŭt ka ngara nyirŭmŭn diginŭ. Andu anŭ ndi ayŭh matak ngga ngara; ka kada daya so Joppa adi sabah di Jesus sua ngga ayŭh.

²⁴Andu anŭ ndi ngara ndŭg Caesarea. Cornelius agi kajŭn ayŭh, ngga bara madis-i samŭn bara dingan-i adi-i ko bagan.

²⁵Kan Peter mbŭh re mŭrŭt, Cornelius tudu ayŭh ka sidikang di kaja-i ka nyambah ayŭh.

²⁶Pak Peter bada ayŭh makat. “Mijog,” ayŭh nang; “Aku ati daya biasa.”

²⁷Peter minyu ngga Cornelius darŭm-i mŭrŭt ka kiris bagŭ daya mbŭh tikuruk.

²⁸Ayŭh nang di ngara, “Adŭp ngan mbŭh puan nang daya Jahudi nanyam ka adat-i dŭh bisa bigaur ngga daya adi dŭh bangsa Jahudi. Pak Tapa mbŭh kiren di aku nang aku dŭh siŭn nang tadŭ tadŭ daya kais bait sembar.

²⁹Ngapŭi aku mandŭg dŭh ngga matah, kan aku dog bagan. Aku siken angān garang, mani angān bagan aku?”

³⁰Cornelius nang, “Kira ka taruh andu adi mbŭh ripas, ngga arong jam ati gŭh, kan aku simayang[12] di ramin ku ngga arong pukor taruh ripas kumbeng, gŭgŭh agi ndi naan daya nēn piraka adi bringam mijog di sirung jawin ku

³¹ka nang: ‘Cornelius! Tapa mbŭh dingah dua mu ka mbŭh kiris pingandai kana mu.

³²Pait daya ka Joppa da jiroh ndi naan daya dŭn Simon Peter. Ayŭh nyandong ramin Simon adi tukang nyamŭk anyit, adi piramin di tabing rawŭt.’

³³Jadi aku rasu pait daya da di jiroh kaam, ka kaam mbŭh raru kana gŭh an mandŭg. Ka madin kieh sopŭrŭg agi digiti di sirung jawin Tapa, an dingah kayuh adi Tuhan mbŭh bada kaam nang.”

³⁴ Peter piguru minyu: “Aku puan di batŭh Tapa sopŭrŭg daya agi brimun.

³⁵Daya adi taru di Ayŭh ka ndai kayuh adi batur taŭn dog trima-I, dŭh kira ani bangsa-i.

³⁶Angān puan agah adi-I pait ka daya Israel, Agah Kana pasar damai so ka Jesus Kristus, adi Tuhan sopŭrŭg.

³⁷Angān puan kraja pingandai bās adi mbŭh jadi di ndi tarun tana Israel, piguru so Galilee ripas John nyuse ajar-i pasar baptisa daya.

³⁸Angān puan pasar Jesus so Nazareth ka munki Tapa mbŭh ren di tunduh-I Roh Kudus ka kuasa. Ayŭh panu ka barang yŭn, ndai pingandai kana ka pibua sinadan daya adi dog nguasa Siarap, amai Tapa agi ngga Ayŭh.

³⁹Kieh ati mbŭh bara saksi yŭn sopŭrŭg kayuh adi-I mbŭh ndai di tarun tana Israel ka di Jerusalem. Komŭnŭ ngara nggen di Ayŭh ukum kabŭs, masak Ayŭh di atuh rigang.

⁴⁰Pak taruh andu ripas anŭ, Tapa pakat Ayŭh so kabŭs ka bada Ayŭh nandŭng,

⁴¹dŭh di sopŭrŭg daya, pak di bara saksi adi Tapa mbŭh mien, anŭ inŭh, kieh adi ko man nok ngga Ayŭh ripas-I makat so kabŭs.

⁴²Ka Ayŭh mbŭh pesan di kieh da nyuse Agah Kana di sopŭrŭg daya ka bisaksi nang Ayŭh inŭh sianŭ adi Tapa ko tijuan da jadi arang daya adi udip ngga adi kabŭs.

⁴³Sopŭrŭg nabi mbŭh minyu pasar Ayŭh, nang sopŭrŭg adi sabah di Ayŭh re dapŭd pingapun dosa so ka kuasa adŭn-I.”

⁴⁴Darŭm Peter babŭ minyu, Roh Kudus mūn di tunduh sopŭrŭg ngara adi dingah agah anŭ.

⁴⁵Bagŭ daya Jahudi adi sabah di Jesus adi mandŭg so Joppa ngga Peter mbŭh inga inga kiris Tapa ren Roh Kudus di daya adi dŭh bangsa Jahudi.

⁴⁶Amai ngara dingah ngara minyu darŭm piminyu saruh buang muji Tapa. Peter minyu:

⁴⁷“Ngara ati mbŭh kambat Roh Kudus, mun ata gŭh. Asi meh garang re nagah ngara dog baptisa ngga piin?”

⁴⁸Jadi ayŭh bada ngara dog baptisa ngga adŭn Jesus Kristus. Komŭnŭ ngara bada ayŭh rŭŭ ngga ngara sitian duwŭh taruh andu.