Read Biatah Bidayuh PINGANDAI 11 Bible Online

PINGANDAI 11 - Biatah Bidayuh bible

PINGANDAI 11

¹Bara pinyuruh ka bara adi sabah di Jesus di ndi tarun tana Judea mbŭh dingah pasar daya adi dŭh bangsa Jahudi agi gŭh kambat pinganang Tapa.

²Kan Peter di ka Jerusalem, ngara adi raan daya adi dŭh bangsa Jahudi kambat adat sunat, ngamun ayŭh,

³“Kuu mbŭh di ka ramin daya adi dŭh bangsa Jahudi, ndŭg ka muko gŭh man ayō ngara!”

⁴Jadi Peter nakit kidaan di ngara ani adi mbŭh jadi so sibungas-i:

⁵“Darŭm aku simayang di kupo Joppa, aku kiris kayuh keya ka di darŭm pŭmŭh, mūn so rangit mun ndi banang adi ramba dog bisor ngga pat sikuh-i ka yŭn ku.

⁶Aku nakit tingga darŭm-i ka kiris dāng kudip samŭn dāng tarun, dāng adi bigawang ngga adi mikabur.

⁷Ka aku dingah sirŭŭn nang di aku, ‘Makat Peter, simareh ka man!’

⁸Pak aku nang, ‘Dŭh, Tuhan! Bŭn aku man kayuh adi sŭn adat nang kais puan kah sembar.’

⁹Sirŭŭn anŭ minyu dinge so rangit, ‘Dŭhnyah nang kais kayuh adi Tapa ko kidaan nang bisig.’

¹⁰Kayuh anŭ jadi pitaruh kari, ka sikasŭn-i sopŭrŭg-i dog tarik pari ka rangit.

¹¹Di tika anŭ, taruh naan daya adi dog pait ka yŭn ku so Caesarea mbŭh mandŭg ka ramin di yŭn ku[13] nyandong.

¹²Roh Kudus bada aku di ngga ngara, dŭh kira asi asi. Nŭm naan ngara anŭ so tibaran ta di Joppa adi sabah di Jesus agi sua ngga aku di ka Caesarea, ka kieh sopŭrŭg mŭrŭt ramin Cornelius.

¹³Ayŭh kidaan di kieh munki ayŭh agi kiris malaikat mijog di ramin-i, adi nang di ayŭh, ‘Pait daya ka Joppa da tudu ndi naan daya dŭn Simon Peter.

¹⁴Ayŭh re kidaan munki kuu ngga rawang mu bisa dog nyiramat.’

¹⁵Ka kan aku piguru minyu, Roh Kudus mūn di barang naan ngara nimun-I ko mūn di barang naan ata di sibungas-i.

¹⁶ Ka aku ingat kayuh adi Tuhan ko nang: ‘John baptisa ngga piin, pak angān re dog baptisa ngga Roh Kudus.’

¹⁷Ka kambŭi Tapa mbŭh nggen pinganggen anŭ di ngara nimun-I ko nggen di ata darŭm ata sabah di Jesus Kristus, asi meh aku ati re tungang bitan pingandai Tapa?”

¹⁸Kan ngara dingah sakanŭ, ngara pajam. Ka ngara muji Tapa, “Di daya adi dŭh bangsa Jahudi gŭh Tapa mbŭh nggen aran ngga marik pimudip-i pari ka adŭp-I, siŭn dapŭd udip adi sawŭ adi tan adu adu!”

¹⁹ Kada ngara adi sabah di Jesus adi mbŭh papar sasah sitagar pinyikisiis adi timbur di andu Stephen dog siŭ, mbŭh panu jeh ka Phoenicia, Cyprus ka Antioch, piagah agah so Tapa di bara daya Jahudi adŭ.

²⁰Pak agi kada so ngara adi sabah, adi so Cyprus ka Cyrene, darŭm pimanu ngara nuju Antioch agi piagah agah anŭ di daya adi dŭh bangsa Jahudi ani,[14] kidaan di ngara Agah Kana pasar Tuhan Jesus.

²¹Kuasa Tuhan agi ngga ngara, ka bagŭ daya mbŭh sabah ka marik pimudip-i pari ka Tuhan.

²²Eklisia di Jerusalem dingah pasar kayuh anŭ, ka ngara pait Barnabas ka Antioch.

²³Kan ayŭh mbŭh ndŭg ka kiris munki masam Tapa mbŭh nyiberkat ngara, ayŭh mbŭh raru gaŭn ka ngatat sopŭrŭg ngara da tŭtŭd di Tuhan ngga siabo atin ngara.

²⁴Barnabas daya adi kana, puno ngga kuasa Roh Kudus ngga pinyabah, ka bagŭ meh daya mbŭh sabah di Tuhan.

²⁵Komŭnŭ Barnabas di ka Tarsus di jiroh Saul.

²⁶Kan-i mbŭh dapŭd ayŭh, ayŭh taban ayŭh ka Antioch. Ka agi ndi sawa ngara duwŭh bigaur ngga daya eklisia diginŭ buang ngajar bara daya bagŭ. Di Antioch inŭh bara daya adi sabah di Jesus piguru dog kadŭn Kristen.

²⁷Di tika anŭ kada nabi mandŭg ka Antioch so Jerusalem.

²⁸ Ndi so ngara, dŭn Agabus, mijog ka ngga kuasa Roh Kudus ninjau nang apag adi bisā dŭm dŭh tui re agi di barang yŭn di ong. (Apag anŭ jadi di jaman Caesar Claudius.)

²⁹Bara murid natu nang niap naan ngara re pait nanyam tungang-i pinurung ka bara dingan adi sabah adi rŭŭ di Judea.

³⁰Anŭ ngara ndai, ka bada Barnabas ngga Saul taban duit anŭ ka yŭn bara nyamba eklisia di Jerusalem.