Read Biatah Bidayuh PINGANDAI 12 Bible Online

PINGANDAI 12 - Biatah Bidayuh bible

PINGANDAI 12

¹Kurang rabis di tika anŭ Raja Herod[15] piguru kisiis kada daya eklisia.

²James, adi jurud John, ayŭh bada dog siŭ ngga pedang.

³Kan-i kiris pingandai-i pimunos daya Jahudi, ayŭh nakap gŭh Peter. (Kayuh ati jadi di tipuh Gawai Ruti Dŭh-Biragi.)

⁴ Kan-i mbŭh dog nakap, Peter dog na darŭm jer, di yŭn-i dog jaga pat tibaran soldadu; tiap tibaran anŭ agi pat naan soldadu. Herod mbŭh ngatur bada ayŭh dog bisara di sirung jawin daya bagŭ ripas Gawai Paska.

⁵Jadi Peter mbŭh dog na darŭm jer, pak daya eklisia bandar bidua ka Tapa yŭn-i.

⁶Ngarŭm adi diŭ so Herod mbŭh re an taban ayŭh ka sapa di sirung jawin daya bagŭ, Peter bŭŭs di asah duwŭh naan soldadu. Ayŭh dog mŭŭng ngga duwŭh parik basi, ka di tiban ramin jer kada soldadu agi jaga.

⁷Ka gŭgŭh malaikat Tuhan agi mijog diginŭ, ka jawa nyekar darŭm birit anŭ. Malaikat anŭ tama Peter ka kies ayŭh, ka nang, “Rikas Makat!” Jam anŭ gŭh parik basi rudos so tangan Peter.

⁸Ka malaikat anŭ nang di ayŭh, “Nyisŭt taris kupong mu ka kasŭk kasut mu.” Peter nyisŭt taris kupong-i ka kasŭk kasut-i; ka malaikat nang, “Kasŭk jipo mu ka tunda aku.”

⁹Peter tunda ayŭh ruah so ramin jer, dŭh puan kayuh adi jadi kayuh adi sawŭ kah kayuh adi dŭh sawŭ; ayŭh pikir adŭp-i nyipŭmŭh.

¹⁰Ngara murah sibungas tibaran soldadu adi jaga, komŭnŭ tibaran adi numbor duwŭh, ka sikasŭn-i ngara ndŭg tiban basi adi nura kupo. Tiban anŭ tikuka sadi adŭp-i yŭn ngara, ka ngara ruah. Ngara panu di aran, ka gŭgŭh malaikat anŭ miyap so yŭn Peter.

¹¹Nganŭ Peter rada kayuh adi mbŭh jadi di adŭp-i, ka nang, “Madin aku puan-i taŭn sawŭ! Tuhan mbŭh pait malaikat-I da nyiramat aku so kuasa Herod ka so sopŭrŭg kayuh adi daya Jahudi raan ndai di tunduh aku.”

¹²Kan-i mbŭh rada kayuh anŭ, ayŭh di ka ramin Mary, sindŭ John Mark, di yŭn bagŭ daya mbŭh tikuruk ka simayang.

¹³Ayŭh gutog tiban tura ka sapa, ka ndi naan daya-gaji dŭn Rhoda mandŭg re di kuka.

¹⁴Ayŭh natŭng sirŭŭn Peter ka mbŭh raru gaŭn ayŭh bikaduh pari buang kambŭt kuka tiban, ka kidaan di bara nang Peter agi mijog di sapa.

¹⁵“Gira kuu!” ngara nang di ayŭh. Pak ayŭh darah kidaan di ngara, ka ngara nam, “Anŭ mbŭh malaikat-i.”

¹⁶Peter babŭ gutog tiban; Ka sikasŭn-i ngara kuka tiban, ka mbŭh inga inga kan ngara kiris ayŭh.

¹⁷Ayŭh pakat tangan-i mite ngara pajam, ka ayŭh nakit kidaan di ngara munki Tuhan mbŭh piruah ayŭh so ramin jer. “Kidaan kayuh ati di James samŭn di bara adi sabah di Jesus,” ayŭh nang. Komŭnŭ ayŭh bu so nŭ di ka tarun bŭkŭn.

¹⁸Kan-i mbŭh isan isan, bara soldadu mbŭh guga jiroh Peter.

¹⁹Herod nggen ukum bada daya jiroh ayŭh, pak ngara dŭh tungang dapŭd ayŭh. Jadi ayŭh bada bara soldadu anŭ dog nyasat ka nggen ukum bada ngara dog ukum kabŭs. Ripas anŭ, Herod matak so Judea ka Caesarea ka rŭŭ diginŭ sadang tian-i.

²⁰Herod mbŭh raru baji di daya Tyre ka Sidon, jadi ngara di ngga ndi tibaran tudu ayŭh. Sibungas-i ngara mujuk Blastus, adi tukang kingat kayuh di istana, mite turung so ayŭh. Komŭnŭ ngara di ka Herod ka mite bidamai ngga ayŭh, sabab rais ngara bisangan di pinguman adi mandŭg so rais-i.

²¹Di andu adi dog natap, Herod nēn piraka-i, guru di takta-i, ka nggen piminyu pinganang-i di bara daya.

²²“Ati dŭh manusia minyu, pak tapa!” ngara nyirais nang.

²³Di jam anŭ gŭh malaikat Tuhan mukong ayŭh, sabab ayŭh dŭh nggen bragah ka Tapa. Ayŭh dog man ŭrŭd ka rasu kabŭs.

²⁴Atan kayuh mun anŭ, pinganang Tapa mbŭh kambang di barang yŭn.

²⁵Barnabas ngga Saul, kan ngara muko ndai kraja ngara, ngara pari so[16] Jerusalem taban John Mark.