Read Biatah Bidayuh PINGANDAI 13 Bible Online

PINGANDAI 13 - Biatah Bidayuh bible

PINGANDAI 13

¹Di eklisia di Antioch agi bara nabi ka bara gurū: Barnabas, Simeon (adi dog kadŭn Singŭt), Lucius (so Cyrene), Manaen (adi ko samah dog mira ngga Herod[17] adi gabenor), ka Saul.

²Darŭm ngara nyambah Tuhan buang bipusa, Roh Kudus nang di ngara, “Tijuan Barnabas ngga Saul da ndai kraja adi Aku mbŭh bagan ngara da ndai.”

³Ripas bipusa ngga simayang, ngara na tangan ngara di tunduh ngara duwŭh ka pait ngara.

⁴Dog pait Roh Kudus, Barnabas ngga Saul di ka Seleucia ka birayar so nŭ di ka purau Cyprus.

⁵Kan ngara mbŭh ndŭg Salamis, ngara nyuse pinganang Tapa di ramin ramin simayang-Jahudi. Ngara bada John Mark turung ngara di kraja ngara.

⁶Ngara panu mutas purau anŭ nuju Paphos, di yŭn ngara bidapŭd ngga ndi naan daya biruri karŭm dŭn Bar-Jesus, daya Jahudi adi kadŭn adŭp-i nabi.

⁷Ayŭh anŭ dingan gabenor Sergius Paulus di purau anŭ, daya adi pitar-pandai. Gabenor anŭ bagan Barnabas ngga Saul da bidapŭd ngga adŭp-i sabab an dingah pinganang Tapa.

⁸Pak Elymas, adi biruri karŭm anŭ (anŭ inŭh dŭn-i darŭm piminyu Greek) matah, suba an bada gabenor anŭ dŭh sabah di Jesus.

⁹Pak Saul, adi dog kadŭn gŭh Paul, ngga kuasa Roh Kudus, tirek ayŭh

¹⁰ka nang, “Kuu anak Siarap! Kuu pinganyu sopŭrŭg kayuh adi kana. Kuu mbŭh puno ngga barang masam akar adi arap, ka mbŭh siraru suba an marik kayuh adi sawŭ pasar Tuhan da jadi kayuh kadong!

¹¹Tuhan re ngukum kuu madin tong-i; kuu re karak ka re agi tian-i dŭh tungang kiris jawa batŭh andu.” Di jam anŭ gŭh Elymas kinyam piningga-i mbŭh jadi karŭm, ka jiroh daya da kayak adŭp-i.

¹²Kan gabenor kiris kayuh adi mbŭh jadi, ayŭh sabah, sabab ayŭh raru nyaruh di ajar Tuhan.

¹³Paul ngga bara dingan-i birayar so Paphos ka mandŭg ka Perga, kupo di Pamphylia, di yŭn John Mark bu tingge ngara ka pari ka Jerusalem.

¹⁴Ngara pijuu panu so Perga di ka Antioch di Pisidia, ka di andu Sabbath ngara di ka ramin simayang-Jahudi ka guru diginŭ.

¹⁵Ripas basa so Ukum-adat Moses ka so surat surat bara nabi, bara pinguru di ramin simayang-Jahudi anŭ bada daya kidaan di ngara nang: “Dingan, kieh raan angān minyu di bara daya ati kambŭi angān biyŭn ajar ngga ngatat ngara.”

¹⁶Paul mijog, ko-i pakat tangan-i, ayŭh piguru minyu: “Bara dingan ku daya Israel ngga sopŭrŭg adi dŭh bangsa Jahudi adi agi digiti nyambah Tapa: dingah aku minyu!

¹⁷ Tapa daya Israel mien tayung-babuk ta ka bada ngara jadi bangsa adi bās di jaman ngara jadi daya tami rŭŭ di Egypt. Tapa taban ngara ruah so Egypt ngga kuasa bās-I,

¹⁸ ka sitadŭn pat puru sawa Ayŭh bijijŭ ngga[18] ngara di tarun tana-pajam.

¹⁹ Ayŭh nyirubuh ju bangsa di tarun tana Canaan ka bada daya adŭp-I dapu tarun tana anŭ.

²⁰ Sopŭrŭg kayuh anŭ jadi darŭm tipuh 450 sawa. “Ripas anŭ,[19] Ayŭh nggen di ngara bara akim ndŭg jaman nabi Samuel.

²¹ Ka kan ngara mite raja, Tapa nggen di ngara Saul anak Kish so tibaran-asar Benjamin, da jadi raja ngara sitadŭn pat puru sawa.

²² Ka kan-I ko kadi ayŭh, Tapa bada David jadi raja ngara. Ati inŭh kayuh adi Tapa nang pasar ayŭh: ‘Aku mbŭh dapŭd David anak Jesse daya adi Aku suka, adi re ndai sopŭrŭg kayuh adi Aku bada ayŭh ndai.’

²³Adŭp Jesus meh, adi sesang David, adi Tapa bada jadi Pinyikudip daya Israel, nimun janji-I.

²⁴ Diŭ so Jesus piguru kraja-I, John ngajar sopŭrŭg daya Israel da marik pimudip ngara pari ka Tapa, ka kambat baptisa.

²⁵ Ka darŭm John mbŭh re ngamas kraja-i, ayŭh nang, ‘Asi aku ati, nunda ka pinyidapŭd ngan? Aku dŭh sianŭ adi angān kajŭn. Pak ingat, Ayŭh inŭh mandŭg sundis so aku, ka aku dŭh sukup kana re kadi kasut so kaja-I.’

²⁶“Bara dingan ku daya Israel, adi bara sesang Abraham, ka sopŭrŭg adi dŭh bangsa Jahudi digiti adi nyambah Tapa: yŭn ata inŭh Tapa mbŭh pait agah pinyiramat anŭ.

²⁷Amai ngara adi rŭŭ di Jerusalem samŭn bara pinguru ngara dŭh puan Ayŭh Pinyikudip, buang dŭh gŭh mirati pinganang bara nabi adi ngara basa barang andu Sabbath; pak gŭt-i ngara bada pinganang bara nabi jadi bitŭtŭk kan ngara nggen ukum kabŭs di Jesus.

²⁸ Sunggu ngara dŭh biyŭn aran re nggen ukum kabŭs di Ayŭh, ngara mite Pilate nggen di Ayŭh ukum kabŭs.

²⁹ Ka kan ngara ko pijadi sopŭrŭg kayuh adi Surat-kudus nang pasar Ayŭh, ngara bisor Ayŭh so atuh rigang ka na Ayŭh darŭm kubur.

³⁰Pak Tapa pakat Ayŭh so kabŭs,

³¹ ka agi kudu kudu andu Ayŭh agi pinandŭng adŭp-I di ngara adi ko panu bijaruh ngga Ayŭh so Galilee ka Jerusalem. Ngara mbŭh jadi saksi yŭn-I di daya Israel madin.

³²Ka kieh agi digiti taban Agah Kana ka yŭn ngan: Kayuh adi Tapa ko bijanji di tayung-babuk ta Ayŭh an ndai,

³³ Ayŭh mbŭh ndai yŭn ta, adi bara sesang ngara, darŭm-I pakat Jesus so kabŭs. Nimun adi ko dog nuris darŭm Mazmur adi numbor duwŭh, ‘Kuu Anak Ku; andu ati Aku mbŭh jadi Sama Mu.’

³⁴ Ka sakati Tapa minyu pasar pakat Ayŭh so kabŭs, dŭh re madam darŭm kubur: ‘Aku re nyiberkat Kuu ngga berkat adi kudus adi Aku ko bijanji an nggen di David.’

³⁵ Ka sawŭ Ayŭh nang di ayat adi bŭkŭn, ‘Kaam dŭh re tandah Urun Mai adi tŭtŭd madam darŭm kubur.’

³⁶Amai David, muko-i ndai pinyiraan Tapa di jaman adŭp-i, ayŭh kabŭs ka dog kubur ngga tayung babuk-i, ka madam darŭm kubur.

³⁷Pak kayuh ati dŭh jadi di sianŭ adi Tapa ko pakat so kabŭs.

³⁸Sopŭrŭg ngan, bara dingan ku daya Israel, kieh raan angān puan nang so Jesus agah pasar pingapun dosa mbŭh dog nyuse di angān. Barang naan daya adi sabah di Ayŭh mbŭh dog pirupas so sopŭrŭg dosa adi dŭh Ukum-adat Moses tungang pirupas angān so.

³⁹

⁴⁰Ingat meh, garang, isa kayuh adi bara nabi ko nang dŭh dog angān:[20]

⁴¹ ‘Tingga, angān adi napat Tapa! Inga inga meh ka kabŭs! Amai kayuh adi Aku ndai andu ati inŭh kayuh adi angān dŭh re sabah, sunggu daya kidaan rati-i di angān!’ ”

⁴²Darŭm Paul ngga Barnabas ruah so ramin simayang-Jahudi, daya mite ngara mandŭg dinge andu Sabbath anŭ ndi pijuu ngajar ngara pasar kayuh anŭ.

⁴³Ka kan daya mbŭh ruah so ramin simayang-Jahudi, Paul ngga Barnabas dog tunda bara daya Jahudi samŭn bara daya adi dŭh bangsa Jahudi adi mbŭh mŭrŭt adat Jahudi. Ngara duwŭh minyu ngga ngara ka ngatat ngara da adu adu udip darŭm pinyirasi-mandis Tapa.

⁴⁴Andu Sabbath anŭ ndi batang an barang naan daya darŭm kupo anŭ mandŭg di dingah pinganang Tuhan.

⁴⁵Pak kan bara daya Jahudi kiris bara daya bagŭ, ngara mbŭh puno ngga atin sina; ngara nyakar pinganang Paul ka pimangŭh ayŭh.

⁴⁶Pak Paul ngga Barnabas tanŭ ka minyu ngga atin adi rabis pagan: “Ngga sipatut-i pinganang Tapa dog kidaan di angān diŭ. Pak amai angān abah trima-i ka dŭh nyirundeng adŭp ngan tibirang yŭn udip adi sawŭ adi tan adu adu, kieh re tingge angān ka di tudu bara daya adi dŭh bangsa Jahudi.

⁴⁷ Amai sakati inŭh pinyipesan adi Tuhan mbŭh nggen di kieh: ‘Aku mbŭh bada angān jadi jawa yŭn bara daya adi dŭh bangsa Jahudi, isa ndi ong ong bisa dog nyiramat.’ ”

⁴⁸Kan bara adi dŭh bangsa Jahudi dingah, ngara mbŭh gaŭn ka muji pinganang Tuhan; ka ngara adi mbŭh dog mien yŭn udip adi sawŭ adi tan adu adu rasu sabah di Jesus.

⁴⁹Pinganang Tuhan dog piagah di barang yŭn di ndi tarun tana anŭ.

⁵⁰Pak bara daya Jahudi ngasut bara daya adi bās darŭm kupo samŭn bara dayung adi dŭh daya Jahudi adi taru di Tapa, adi kaya ka timagah. Ngara piguru kisiis Paul ngga Barnabas ka kasig ngara so tarun tana ngara.

⁵¹ Paul ngga Barnabas tapis dabu so kaja ngara ngga matah ngara, ka ngara di ka Iconium.

⁵²Bara adi sabah di Jesus di Antioch mbŭh raru gaŭn buang mbŭh brisi ngga Roh Kudus.