Read Biatah Bidayuh PINGANDAI 14 Bible Online

PINGANDAI 14 - Biatah Bidayuh bible

PINGANDAI 14

¹Mun anŭ gŭh kayuh di Iconium: Paul ngga Barnabas di ka ramin simayang-Jahudi ka ngajar ndŭg ka bagŭ daya Jahudi samŭn adi dŭh bangsa Jahudi sabah di Jesus.

²Pak daya Jahudi adi dŭh sabah ngasut daya adi dŭh bangsa Jahudi da tiru di bara adi sabah.

³Ngara rŭŭ diginŭ mua tian-i, minyu ngga atin pagan pasar Tuhan, adi mbŭh kiren ajar ngara pasar pinyirasi mandis-I agi sawŭ darŭm-I nggen di ngara kuasa ngga ndai pingandai-nginga ka pingandai-saruh.

⁴Daya darŭm kupo anŭ mbŭh pape jadi duwŭh tibaran: kada nyukong pinganang daya Jahudi, kada nyukong pinganang pinyuruh.

⁵Komŭnŭ kada daya Jahudi ngga ngara adi dŭh bangsa Jahudi samŭn pinguru pinguru ngara, bipekat an kijera ngara duwŭh ka manjan ngara ngga batuh.

⁶Kan bara pinyuruh dingah, ngara bu ka kupo Lystra ka kupo Derbe di Lycaonia, samŭn ka tarun tana maning anŭ.

⁷Diginŭ ngara nyuse Agah Kana anŭ.

⁸Di Lystra agi ndi naan daya adi mbŭh kipang so-i dog biranak, ka taŭn bŭn panu.

⁹Ayŭh guru diginŭ ka nyiringa pinganang Paul. Paul, kiris ayŭh sabah buang dapŭd dog pibua, nakit tingga ayŭh

¹⁰ka nang ngga sirŭŭn bana, “Mijog tŭnggŭn ngga kaja mu!” Daya anŭ mirupat ka mijog ka rasu panu.

¹¹Kan bara daya bagŭ kiris pingandai Paul, ngara nyirais nang darŭm piminyu Lycaonia, “Bara tapa mbŭh mūn ka ata darŭm gayŭn manusia!”

¹²Ngara kadŭn Barnabas Zeus, ka Paul, amai ayŭh adi tukang minyu, ngara kadŭn Hermes.

¹³Imam tapa Zeus, bari sambah-i agi di sapa kupo, taban sapi sapi ngga bunga bunga ka tiban kupo; ayŭh ngga bara daya bagŭ raan jugan sadis ka ngara duwŭh.

¹⁴Kan Barnabas ngga Paul dingah kayuh adi ngara re ndai, ngara nyiratak piraka ngara ka bikaduh ka yun bara daya bagŭ buang nyirais,

¹⁵ “Mani angān ndai kayuh ati? Kieh ati daya manusia mun angān! Kieh digiti kidaan Agah Kana, isa angān pasan kayuh ati adi dŭh biguna ka pari ka Tapa adi udip, adi napa rangit, ong, rawŭt, ka sopŭrŭg kayuh adi di darŭm-i.

¹⁶Jah Ayŭh tandah sopŭrŭg daya manusia kadŭg aran adŭp-i.

¹⁷Pak Ayŭh mbŭh siraru kiren adŭp-I sawŭ agi so ka kraja kana adi-I ndai: mun nggen ujen so rangit ka buwa buwa di tika jajak di angān; Ayŭh nggen di angān pinguman ka bada atin ngan gaŭn.”

¹⁸Ngga pinganang sakanŭ dŭh gŭh ngara tungang bitan bara daya jugan sadis ka ngara.

¹⁹Kada daya Jahudi mandŭg so Antioch di Pisidia ka so Iconium; ka kan ko mujuk bara daya da tunda adŭp-i, ngara manjan Paul ngga batuh ka batak ayŭh ka sapa kupo, pikir ayŭh mbŭh kabŭs.

²⁰Pak kan bara adi sabah di Jesus tikuruk maning ayŭh, ayŭh makat ka pari ka darŭm kupo. Andu anŭ ndi ayŭh duwŭh Barnabas di ka Derbe.

²¹Paul ngga Barnabas nyuse Agah Kana di Derbe ka mbŭh pijadi bagŭ murid diginŭ. Komŭnŭ ngara pari ka Lystra, ka Iconium, ka radus ka Antioch di Pisidia.

²²Ngara nagap bara pinunda diginŭ buang ngatat ngara da bijijŭ darŭm pinyabah. Ngara ngajar, “Ata dŭh siŭn dŭh an kinyam bagŭ pinyusah sibayuh ata kinyam Pinyipritah Tapa.”[21]

²³Di barang eklisia ngara tijuan nyamba nyamba eklisia, ka ngga simayang ka bipusa ngara nyerah ngara ka darŭm tangan Tuhan, adi ngara sabah.

²⁴Ripas tambus tarun tana Pisidia, ngara mandŭg ka Pamphylia.

²⁵Ka kan ngara muko nyuse Agah Kana di Perga, ngara matak ka Attalia;

²⁶ka so nŭ ngara birayar ka Antioch, di yŭn ngara ko dog nyerah ngga simayang ka darŭm pinyigrindung pinyirasi-mandis Tapa yŭn kraja adi ngara bauh ko ngamas.

²⁷Kan ngara mbŭh ndŭg Antioch, ngara nguruk bara daya eklisia ka kidaan di ngara pasar sopŭrŭg kayuh adi Tapa mbŭh ndai ngga ngara ka munki Ayŭh mbŭh kuka aran isa daya adi dŭh bangsa Jahudi bisa sabah di Jesus.

²⁸Ka diginŭ ngara rŭŭ mua tian-i ngga bara adi sabah di Jesus.