Read Biatah Bidayuh PINGANDAI 15 Bible Online

PINGANDAI 15 - Biatah Bidayuh bible

PINGANDAI 15

¹ Kada daya mandŭg so Judea ka Antioch ka piguru ngajar bara adi sabah di Jesus diginŭ, “Angān dŭh bisa dog nyiramat kambŭi angān dŭh dog nyunat nunda ka Ukum-adat Moses.”

²Paul ngga Barnabas bandar bikarit ngga ngara pasar kayuh anŭ; jadi mbŭh dog ngatur meh, Paul ngga Barnabas samŭn kada ngara adi bŭkŭn di Antioch da di ka Jerusalem ka bidapŭd ngga bara pinyuruh ka bara nyamba eklisia diginŭ pasar kayuh anŭ.

³Jadi, dog pait eklisia di pimanu ngara, ngara panu di Phoenicia ngga Samaria, kidaan pasar daya adi dŭh bangsa Jahudi mbŭh sabah di Tapa; agah ati bada sopŭrŭg bara adi sabah mbŭh raru gaŭn.

⁴Kan ngara mbŭh ndŭg Jerusalem, ngara dog kambat eklisia, bara pinyuruh, ka bara nyamba eklisia; ka ngara kidaan sopŭrŭg kayuh adi Tapa ko ndai so ngara.

⁵Pak kada adi sabah so tibaran daya Pharisee makat, ka nang, “Ngara adi dŭh bangsa Jahudi dŭh siŭn dŭh an dog nyunat ka dog kidaan da sita Ukum-adat Moses.”

⁶Bara pinyuruh ngga bara nyamba eklisia tikuruk ngudung pasar kayuh anŭ.

⁷ Ripas ngara ko tui birundeng pasar kayuh anŭ Peter mijog ka nang, “Bara dingan ku, angān puan dawŭ-i Tapa mbŭh mien aku so dupan ngan da nyuse Agah Kana di daya adi dŭh bangsa Jahudi, isa ngara dingah ka bisa sabah.

⁸ Ka Tapa, adi puan pikir-kira daya, mbŭh kiren adŭp-I nyibandar daya adi dŭh bangsa Jahudi kan-I nggen Roh Kudus di ngara, nimun-I ko nggen di ata.

⁹Di batŭh-I, ata ngga ngara agi samah; Ayŭh apun dosa ngara sabab ngara sabah.

¹⁰Jadi mani meh angān an suba Tapa, na pinyirabis bat di kawin ngara adi sabah, pinyirabis adi adŭp ta bait tayung-babuk ta dŭh tungang kabis?

¹¹Dŭh-i patut simŭnŭ; ata sabah ka dog nyiramat da pinyirasi-mandis Tuhan Jesus, ka simŭnŭ gŭh ngara.”

¹²Ka sopŭrŭg adi agi diginŭ mbŭh pirŭngŭt darŭm ngara nyiringa Barnabas ngga Paul kidaan sopŭrŭg pingandai-nginga ka pingandai-saruh adi Tapa ko ndai so ngara di dupan bara daya adi dŭh bangsa Jahudi.

¹³Ripas ngara ko minyu, James minyu: “Bara dingan ku, dingah piminyu ku!

¹⁴Simon bauh ko nakit kidaan munki Tapa ko diŭ munan daya adi dŭh bangsa Jahudi, an tambit so ngara daya yŭn adŭp-I.

¹⁵Pinganang bara nabi mbŭh biratok ngga kayuh ati. Sak adi nang Surat-kudus,

¹⁶ ‘Ripas anŭ Aku re pari, Tuhan nang, ka pari pijog ramin David. Adi rubuh Aku re pari ndai da kana ka bada-i tagap dinge.

¹⁷Ka sopŭrŭg bangsa bŭkŭn re mandŭg ka Aku, sopŭrŭg daya adi dŭh bangsa Jahudi adi Aku mbŭh bagan da jadi tung jaku.

¹⁸Sakanŭ Tuhan, adi mbŭh pitambus-i ndun jah.’

¹⁹“Di kira ku, ata dŭhnyah mito daya adi dŭh bangsa Jahudi adi mbŭh rada Tapa.

²⁰ Kaŭs-i ata patut nuris surat ngga kidaan di ngara da dŭh man pinguman adi sŭn adat nang kais, adi ko dog jugan ka tibudo; pijo adŭp ngara so pimudip adi dŭh tatu darŭm pingandai kais; ka dŭh man dāng adi kabŭs ko dog nyŭt tungo-i, bait kah deya.

²¹Amai Ukum-adat Moses mbŭh so jah dog basa di ramin simayang-Jahudi barang andu Sabbath, ka pinganang-i dog nyuse di barang kupo.”

²²Komŭnŭ bara pinyuruh ngga bara nyamba eklisia, samŭn bara daya eklisia ndai pikir-kira ngara an mien kada daya so tibaran ngara, ka pait ngara ka Antioch ayō Paul ngga Barnabas. Ngara mien duwŭh naan daya adi dog stabi bara adi sabah, Judas, adi dog kadŭn Barsabbas, ngga Silas,

²³ka bada ngara taban surat ati: “Kieh, bara pinyuruh ka bara nyamba eklisia, adi bara dingan ngan, pait tabi ka sopŭrŭg dingan adi dŭh bangsa Jahudi adi rŭŭ di Antioch, Syria, ka Cilicia.

²⁴Kieh agi dingah kada daya adi mandŭg so tibaran ami agi mito ka nyusah angān ngga kayuh adi ngara nang; pingandai ngara dŭh-i so ka pingatur ami.

²⁵Jadi kieh mbŭh tikuruk ngudung ka mbŭh samah situju mien kada daya da jadi pinyisung adi kieh bisa pait ka angān ayō Barnabas ngga Paul adi kieh rindu,

²⁶adi mbŭh ruban asŭng ngara nyiraja yŭn Tuhan Jesus Kristus.

²⁷Kieh pait ka angān Judas ngga Silas, ka adŭp ngara re kidaan kayuh ati adi kieh nuris so baba adŭp ngara.

²⁸Amai kana di Roh Kudus, kieh sopŭrŭg mbŭh samah situju dŭh re nanuh angān ngga atur rabis so ati adi biguna dŭ:

²⁹Dŭhnyah man pinguman adi ko dog jugan ka tibudo; dŭhnyah man deya; dŭhnyah man dāng adi kabŭs ko dog nyŭt tungo-i; ka pijo adŭp ngan so pimudip adi dŭh tatu darŭm pingandai kais. Sanang angān kambŭi angān dŭh ndai kayuh kayuh adi mun anŭ. Kieh harap angān sanang siraru.”

³⁰Bara pinyisung anŭ dog bada panu di ka Antioch; di Antioch ngara bada tikuruk sopŭrŭg adi sabah, ka nggen surat anŭ di ngara.

³¹Ka kan ngara ko basa, ngara mbŭh raru gaŭn amai surat anŭ ngatat ngara.

³²Judas ngga Silas, adi mbŭh adŭp ngara nabi, minyu mua tian-i ngga ngara, ngatat buang nagap ngara.

³³Ripas ngara ko rŭŭ diginŭ mua tian-i, bara diginŭ adi sabah bada ngara matak ngga siramat pari ka yŭn ngara adi pait ngara. [

³⁴Pak Silas an babŭ rŭŭ diginŭ.][22]

³⁵Pak Paul ngga Barnabas babŭ tui di Antioch, ka samah ngga bara adi bŭkŭn ngara ngajar ka nyuse pinganang Tuhan.

³⁶Ka kudu andu ripas anŭ Paul nang di Barnabas, “Ja ata pari di munan bara adi sabah, di barang kupo di yŭn ata ko nyuse pinganang Tuhan, ka tingga munki ngara madin.”

³⁷Barnabas raan taban John Mark ngga ngara,

³⁸ pak Paul pikir dŭh patut taban ayŭh, sabab ayŭh ko bu tingge ngara di Pamphylia, dŭh sua ngga ngara ndŭg pinŭbŭn kraja ngara.

³⁹Ngara duwŭh bikarit, ka birakang: Barnabas taban Mark di birayar ka Cyprus,

⁴⁰pak Paul mien Silas ka matak, ripas bara adi sabah ko nyerah ngara ka darŭm pinyigrindung pinyirasi-mandis Tuhan ngga simayang.

⁴¹Ayŭh ngga Silas panu di Syria ngga Cilicia, nagap bara daya eklisia.