Read Biatah Bidayuh PINGANDAI 16 Bible Online

PINGANDAI 16 - Biatah Bidayuh bible

PINGANDAI 16

¹Paul matak di ka Derbe ka Lystra, di yŭn agi ndi naan daya Kristen dŭn Timothy rŭŭ. Sindŭ-i adi daya Jahudi mbŭh Kristen gŭh, pak sama-i daya bangsa Greek.

²Sopŭrŭg bara adi sabah di Jesus di Lystra ka di Iconium muji Timothy.

³Paul, raan taban Timothy panu ngga adŭp-i, ayŭh bada-i bisunat. Ayŭh ndai simŭnŭ sabab sopŭrŭg daya bangsa Jahudi adi rŭŭ di tarun tarun anŭ puan sama Timothy daya bangsa Greek.

⁴Darŭm ngara panu di barang kupo, ngara nggen atur di bara adi sabah, adi bara pinyuruh ka bara nyamba eklisia di Jerusalem ko samah situju ndai; ka bada ngara tunda-i.

⁵Jadi meh sopŭrŭg eklisia dog nagap darŭm pinyabah ka bara adi sabah makin bitambah barang andu.

⁶Ngara panu di tarun tana Phrygia ngga Galatia sabab Roh Kudus dŭh bada ngara nyuse pinganang Tapa di utung rais Asia.

⁷Ka kan ngara mbŭh ndŭg baat rais Mysia, ngara suba mŭrŭt utung rais Bithynia, pak Roh Jesus dŭh bada ngara.

⁸Jadi ngara radus panu tambus[23] Mysia di ka Troas.

⁹Ngarŭm anŭ Paul agi kiris keya ka darŭm pŭmŭh ndi naan daya Macedonia mijog ka mite ayŭh, nang-i, “Mandŭg ka Macedonia ka turung kieh!”

¹⁰Kan ayŭh ko kiris kayuh anŭ, kieh rasu sidia adŭp ami an di ka Macedonia, sabab kieh mbŭh natu nang Tapa mbŭh bagan kieh da nyuse Agah Kana di daya diginŭ.

¹¹Kieh matak pakai kapar so Troas ka radus birayar nuju Samothrace, ka andu anŭ ndi nuju Neapolis.

¹²So nŭ kieh di ka Philippi, kupo adi darŭm sibungas utung rais Macedonia,[24] adi dog digŭng Rome. Kieh rŭŭ diginŭ duwŭh taruh andu.

¹³Di andu Sabbath kieh ruah so kupo anŭ di ka bŭngŭn sungi, di yŭn kieh pikir agi yŭn daya Jahudi tikuruk simayang. Kieh guru ka minyu ngga bara dayung adi agi tikuruk diginŭ.

¹⁴Ndi so ngara adi dingah kieh inŭh Lydia so Thyatira, adi tukang jua banang adi bēng. Ayŭh inŭh dayung adi nyambah Tapa, ka Tuhan mbŭh kuka atin-i da dingah buang sabah kayuh adi Paul nang.

¹⁵Ripas ayŭh ngga bara adi di ramin-i dog baptisa, ayŭh mite kieh, “Kambŭi angān sabah aku ati mbŭh batur batur sabah di Tuhan, ja nyandong ramin ku.” Ayŭh mujuk kieh da di ka arŭn-i.

¹⁶Ndi andu darŭm kieh di ka tarun yŭn simayang, kieh bidapŭd ngga ndi naan daya-gaji adi dayung adi dog mŭrŭt roh arap adi bada ayŭh pandai ninjau kayuh adi re jadi. Ayŭh mbŭh dapŭd bagŭ duit yŭn bara tuan-i so pimandai-i anŭ.

¹⁷Ayŭh tunda Paul ngga kieh, buang nyirais nang, “Bara daya ati inŭh urun Tapa adi Sambu Sopŭrŭg! Ngara mandŭg di kidaan di angān munki angān bisa dog nyiramat!”

¹⁸Ayŭh batang an barang andu nang sakanŭ, ndŭg ka Paul mbŭh susah da-i; Paul bigiring ka nang di roh anŭ, “Darŭm adŭn Jesus Kristus aku mritah kuu da ruah so ayŭh!” Jam anŭ gŭh roh anŭ ruah so ayŭh.

¹⁹Pak kan bara tuan-i kiris aran adi ngga ngara dapŭd duit mbŭh mating tia, ngara nakap Paul ngga Silas ka taban ngara ka yŭn bara adi bikuasa di yŭn daya bisara di passar.

²⁰Ka kan ngara mbŭh taban ngara duwŭh ka yŭn pingibās pingibās pritah Rome diginŭ, ngara nang, “Ngara ati daya Jahudi, ka mbŭh ndai pito di kupo ta.

²¹Ngara ngajar atur adat adi miranggar ukum-adat ta; ata daya Rome, dŭh ata bisa trima bait tunda atur adat anŭ.”

²²Bara daya bagŭ samah samah makat nyerang Paul ngga Silas. Bara pingibās anŭ nyiratak kadi piraka Paul ngga Silas ka nggen ukum bada ngara dog madŭs.

²³Ripas dog madŭs, ngara dog pibŭrŭt ka darŭm jer, ka pingubak ramin jer mbŭh dog pesan bada nakit kurung ngara.

²⁴Ko kambat pinganang, pingubak ramin jer anŭ pibŭrŭt ngara ka darŭm birit jer adi tura ka darŭm ka ngabŭt kaja ngara di asah apŭg kayuh adi bat.

²⁵Ngga arong sitŭrŭp ngarŭm Paul ngga Silas simayang buang nyanyi ka Tapa; bara daya adi dog jer adi bŭkŭn nyiringa ngara.

²⁶Ka gŭgŭh agi tana-bigugoh, ngugoh ramin jer ndŭg puun pinagap rasan-i. Bara tiban rasu tikuka ka parik basi abo rudos so sopŭrŭg daya adi dog jer.

²⁷Kan pingubak ramin jer burah ka kiris tiban tiban ramin jer mbŭh abo tikuka, ayŭh nyitak pedang-i an siŭ adŭp-i, pikir bara daya adi dog jer mbŭh abo bu.

²⁸Pak Paul nang ngga sirŭŭn bana, “Dŭhnyah ida ida ngga adŭp mu! Sopŭrŭg ami agi digiti!”

²⁹Pingubak ramin jer, muko-i mite prita, bikaduh mŭrŭt buang kimŭtŭr sidikang di kaja Paul ngga Silas.

³⁰Ayŭh taban ngara ruah buang nang, “Tuan, ani dŭh siŭn dŭh aku ndai siŭn aku dapŭd siramat?”

³¹Ngara nam, “Sabah di Tuhan Jesus, ka kuu re siramat, kuu ngga rawang mu.”

³²Ka ngara nyuse pinganang Tuhan di ayŭh ka di sopŭrŭg adi bŭkŭn di ramin-i.

³³Di jam anŭ gŭh, di ngarŭm anŭ, pingubak ramin jer anŭ taban ngara ka ndi yŭn ka sita tawan ngara; ka ayŭh ngga sopŭrŭg rawang-i rasu dog baptisa.

³⁴Komŭnŭ ayŭh taban Paul ngga Silas ka ramin-i, ka nggen man di ngara. Ayŭh ngga rawang-i mbŭh raru gaŭn, sabab ngara madin mbŭh sabah di Tapa.

³⁵Kan andu mbŭh jawa, bara pingibās pritah Rome pait bara polis ka ramin jer ngga pinganang, “Pirupas ngara.”

³⁶Ka pingubak ramin jer kidaan di Paul, “Bara pingibās agi nggen pinganang bada kuu ngga Silas dog pirupas. Angān bisa ruah, ka panu darŭm damai meh.”

³⁷Pak Paul nang di bara polis, “Kieh mating dog dapŭd ndai sarah, pak ngara mbŭh madŭs kieh adi daya Rome di sirung jawin daya bagŭ! Komŭnŭ ngara pibŭrŭt kieh ka darŭm jer. Ka madin ngara raan piruah kieh darŭm bisukan kah? Dŭh bisa! Bada adŭp pingibās pingibās pritah Rome anŭ mandŭg di piruah kieh.”

³⁸Bara polis anŭ taban pinganang anŭ ka pingibās pingibās pritah Rome, ka ngara mbŭh taru kan ngara dingah Paul ngga Silas daya Rome.

³⁹Jadi ngara mandŭg ka mite apun so ngara. Komŭnŭ ngara taban ngara ruah so ramin jer ka bada ngara bu so kupo.

⁴⁰Paul ngga Silas ruah so ramin jer, rasu di ka ramin Lydia. Diginŭ ngara bidapŭd ngga bara adi sabah di Jesus, ka muko-i minyu ngatat ngara, ngara duwŭh bu.