Read Biatah Bidayuh PINGANDAI 17 Bible Online

PINGANDAI 17 - Biatah Bidayuh bible

PINGANDAI 17

¹Paul ngga Silas pijuu panu tambus Amphipolis ngga Apollonia ka mandŭg ka Thessalonica; diginŭ agi ndi ramin simayang-Jahudi.

²Nimun kanyet-i Paul di ka ramin simayang-Jahudi anŭ. Diginŭ, sitadŭn taruh andu Sabbath, ayŭh taban bara daya ngga kirakar, pakai pinganang Surat-kudus

³buang kidaan rati-i; so pinganang Surat-kudus anŭ ayŭh kiren di ngara nang Kristus dŭh siŭn dŭh an kinyam jera-birasa ka makat so kabŭs. “Jesus ati adi aku kidaan di angān,” Paul nang, “inŭh Kristus.”

⁴Kada ngara mbŭh sabah ka tunda Paul ngga Silas; simŭnŭ gŭh dayung dayung adi timagah samŭn ndi tibaran daya Greek adi taru di Tapa.

⁵Pak daya Jahudi mbŭh sina ka nguruk bara daya adi dŭh biguna so aran passar ka ndai tibaran-i. Ngara nguga ndi kupo kupo ka nyerang ramin ndi naan daya dŭn Jason, darŭm jiroh Paul ngga Silas an-i taban ka yŭn bara daya bagŭ.

⁶Pak kan ngara dŭh tungang dapŭd ngara, ngara tarik Jason samŭn kada ngara adi sabah ka yŭn bara pinguasa di kupo, ka nyirais nang, “Bara daya ati mbŭh ndai pito di barang yŭn! Madin ngara mbŭh di kupo ta,

⁷ka Jason agi kambat ngara di ramin-i. Ngara sopŭrŭg mbŭh miranggar ukum ukum-adat Caesar, nang agi raja adi bŭkŭn, adi dŭn Jesus.”

⁸Ngga pinganang anŭ ngara bada daya bagŭ samŭn bara pinguasa kupo guga.

⁹Ka kan bara pinguasa kupo ko bada Jason samŭn ngara adi bŭkŭn bayar ngga duit nanyam adi dog miratak siŭn dog pirupas, ngara bada ngara bu.

¹⁰Kan-i mbŭh singarŭm, bara adi sabah bada Paul ngga Silas bu ka Berea. Kan ngara mbŭh ndŭg nŭ, ngara di ka ramin simayang-Jahudi.

¹¹Daya diginŭ agi mirati dŭ so daya di Thessalonica. Ngara suka dingah agah pasar Jesus, ka barang andu ngara birajar pinganang Surat-kudus an puan sawŭ ngga dŭh kayuh adi Paul nang.

¹²Bagŭ ngara mbŭh sabah; ka bagŭ gŭh dayung daya Greek adi bās pangkat-i samŭn bara dari daya Greek sabah.

¹³Pak kan bara daya Jahudi di Thessalonica dingah dinge Paul agi nyuse pinganang Tapa di Berea, ngara di kamanŭ ka ngasut buang nguga bara daya.

¹⁴Bara adi sabah rasu bada Paul bu ka bŭngŭn rawŭt; pak Silas ngga Timothy babŭ diginŭ.

¹⁵Ngara adi nguru Paul bu, taban ayŭh jeh ka Athens ka komŭnŭ pari ka Berea ngga pinyipesan so Paul bada Silas ngga Timothy, kambŭi tungang, rikas tudu adŭp-i.

¹⁶Sitadŭn Paul di Athens kajŭn Silas ngga Timothy, ayŭh mbŭh raru susah kan ayŭh kiris munki masam puno kupo anŭ ngga dudu tibudo.

¹⁷Jadi ayŭh taban ngga kirakar di ramin simayang-Jahudi bara daya Jahudi samŭn bara daya adi dŭh bangsa Jahudi adi nyambah Tapa, ka simŭnŭ gŭh di arong passar barang andu ngga tadŭ tadŭ daya adi agi murah.

¹⁸Agi kada gurū Epicurean ngga gurū Stoic sitama pinyipuan ngga ayŭh. Agi kada so ngara siken, “Ani pinyipuan-i? Mating pimandai-i pak ayŭh minyu mun daya adi pandai!” Adi bŭkŭn nang, “Ayŭh mun adi minyu pasar tapa adi saruh.” Ngara nang sakanŭ sabab Paul ngajar pasar Jesus ka pasar pinyimakat so kabŭs.[25]

¹⁹Jadi ngara taban Paul ka sirung jawin kunsil kupo, adi dog kadŭn Areopagus, ka nang, “Kieh an puan ajar bauh anŭ adi kuu nang.

²⁰Kada kayuh adi kieh dingah kuu nang agi saruh di kieh; kieh an puan ani sibandar-i.” (

²¹Amai sopŭrŭg daya Athens samŭn daya tami adi rŭŭ diginŭ raru suka kubo masā kidaan bait dingah tadŭ tadŭ kayuh bauh.)

²²Paul mijog di sirung jawin kunsil kupo anŭ ka nang, “Aku kiris darŭm sopŭrŭg kayuh angān daya Athens taŭn mbŭh raru tagap darŭm adat.

²³Amai darŭm aku panu di kupo ngan ka tingga tarun tarun yŭn ngan bisambah, aku dapŭd ndi mija-sambah adi agi dog nuris dieh, ‘Ka Tapa adi Dŭh dog Puan.’ Anŭ adi angān nyambah, sunggu angān dŭh puan, anŭ inŭh kayuh adi aku piagah di angān madin.

²⁴ Tapa, adi napa ong ngga sopŭrŭg kayuh adi agi dieh, inŭh adi nguasa rangit ngga ong. Ayŭh dŭh rŭŭ darŭm bari bari-sambah adi manusia ndai.

²⁵Dŭh gŭh Ayŭh biguna di pinurung so manusia, amai adŭp-I inŭh adi nggen sopŭrŭg kayuh, udip ngga asŭng di manusia.

²⁶So ndi manusia Ayŭh mbŭh pijadi sopŭrŭg bangsa, ka bada ngara udip di ndi ong ong. Adŭp-I muko diŭ ngŭtŭ tipuh ka siri siri tarun adi yŭn ngara rŭŭ.

²⁷Ayŭh ndai simŭnŭ isa ngara jiroh Ayŭh, ka kadŭ-i bisa dapŭd Ayŭh darŭm ngara jiroh Ayŭh. Pak Tapa sibandar-i dŭh jo so barang naan ata;

²⁸nimun adi ko daya nang, ‘Darŭm Ayŭh ata udip, mikitak buang agi di ong.’ Sak adi dog nang kada ngan adi tukang bipatun, ‘Ata gŭh bara anak-I.’

²⁹Amai ata ati mbŭh bara anak Tapa, ata dŭh siŭn bada Ayŭh keya ka gambar dog ndai so mas puan kah pirak puan kah batuh, adi dog mŭŭt bait dog mutik so pimandai manusia.

³⁰Tapa mbŭh kambŭt tipuh tipuh adi mbŭh ripas adi ngga daya dŭh puan Ayŭh; pak madin Ayŭh mbŭh pesan di sopŭrŭg daya di barang yŭn da marik pimudip ngara pari ka Ayŭh.

³¹Amai Ayŭh muko so ka ndi naan daya adi-I ko mien miratak andu adi ngga-I nggen bisara di ndi ong ong ngga pinyitŭnggŭn. Ayŭh muko kiren kayuh anŭ agi sawŭ darŭm-I pakat daya anŭ so kabŭs!”

³²Kan ngara dingah Paul minyu pasar pinyimakat so kabŭs, kada ngara napat ayŭh, pak adi bŭkŭn nang, “Kieh raan dingah kuu minyu pasar kayuh ati dinge.”

³³Komŭnŭ Paul bu so udung anŭ.

³⁴Kada daya tunda ayŭh buang sabah di Jesus; ndi so ngara inŭh Dionysius, daya kunsil, ka ndi naan dayung dŭn Damaris, ka agi dinge adi bŭkŭn.