Read Biatah Bidayuh PINGANDAI 18 Bible Online

PINGANDAI 18 - Biatah Bidayuh bible

PINGANDAI 18

¹Ripas anŭ, Paul bu so Athens matak ka Corinth.

²Diginŭ ayŭh bidapŭd ngga ndi naan daya Jahudi dŭn Aquila, asar daya so Pontus, adi bauh mandŭg so Italy ngga sawŭn-i Priscilla, amai Caesar Claudius mbŭh nggen ukum bada sopŭrŭg daya Jahudi bu so Rome. Paul di tudu ngara,

³ka rŭŭ buang nyiraja ngga ngara, sabab ayŭh bisangan di kraja-i adi tukang ndai bari, mun ngara.

⁴Barang andu Sabbath di ramin simayang-Jahudi ayŭh kirakar ngga bara daya, suba an bada daya Jahudi ka daya Greek sabah di Jesus.

⁵Kan Silas ngga Timothy mbŭh mandŭg so Macedonia, Paul mbit puno masā-i piagah agah so Tapa, bisaksi di daya Jahudi Jesus anŭ sawŭ Kristus.

⁶Kan ngara natang ayŭh buang nang kayuh arap pasar ayŭh, ayŭh ngambar kadi dabu so piraka-i ngga matah ka nang di ngara, “Kambŭi angān manyap, adŭp ngan tanggong adŭp ngan! Aku dŭh re tanggong. So madin aku re di ka daya adi dŭh bangsa Jahudi.”

⁷Jadi ayŭh tingge ngara ka di rŭŭ di ramin ndi naan daya dŭn Titius Justus, adi nyambah Tapa; ramin-i agi sindŭk ramin simayang-Jahudi.

⁸Crispus, adi pingubak ramin simayang-Jahudi, sabah di Tuhan, samah ngga sopŭrŭg rawang-i; ka bagŭ daya di Corinth mbŭh dingah agah so Tapa, ngara sabah, ka dog baptisa.

⁹Agi ndi sidah singarŭm, Tuhan nang di Paul keya ka di darŭm pŭmŭh, “Dŭhnyah taru puan kah jimŭ, pak pijuu ngajar,

¹⁰amai Aku agi ngga kuu. Mating daya re tungang ida ida ngga kuu, amai bagŭ daya di kupo ati mbŭh daya Ku.”

¹¹Jadi Paul rŭŭ diginŭ sitŭkŭd ndi sawa sitangah, ngajar pinganang Tapa di daya.

¹²Kan Gallio jadi gabenor pritah Rome di Achaia, daya Jahudi nguruk adŭp-i ka nakap Paul, ka taban ayŭh ka yŭn bisara.

¹³Ngara nang, “Daya ati suba ngasu daya da nyambah Tapa ngga aran adi miranggar ukum-adat ami!”

¹⁴Pak kan Paul re minyu, Gallio nang di bara daya Jahudi, “Kambŭi kayuh ati pasar pingandai sarah adi mbŭh dog ndai, aku patut sabar ngga angān daya Jahudi.

¹⁵Pak amai-i kayuh karit pasar bang bang piminyu ka dŭn dŭn ka pasar ukum-adat ngan, adŭp ngan patut ngatur-i. Aku dŭh re jadi akim ngan di kayuh mun ati!”

¹⁶Ka-i pibu ngara so yŭn bisara anŭ.

¹⁷Ka ngara, sopŭrŭg-i, nakap Sosthenes, adi pingubak ramin simayang-Jahudi ka mukong ayŭh di rawa tarun yŭn bisara anŭ. Pak Gallio taŭn dŭh adŭ piduri.

¹⁸ Paul babŭ rŭŭ diginŭ ngga bara adi sabah agi mua tian-i, ka komŭnŭ ayŭh tingge ngara, di birayar ka Syria ayō Priscilla ngga Aquila. Di Cenchreae ayŭh nundo ubak-i amai payu adi ko-i ndai.[26]

¹⁹Ngara ndŭg Ephesus, ka diginŭ Paul tingge Priscilla ngga Aquila. Ayŭh di mŭrŭt ramin simayang-Jahudi ka taban bara daya Jahudi ngga kirakar.

²⁰Kan ngara mite ayŭh rŭŭ tui ngga ngara, ayŭh abah;

²¹pak nang di ngara darŭm-i bu, “Kambŭi-i pinyiraan Tapa, aku re pari ka angān.” Jadi ayŭh birayar so Ephesus.

²²Kan ayŭh mbŭh ndŭg Caesarea, ayŭh di ka Jerusalem ka nggen tabi di bara daya eklisia, ka komŭnŭ ayŭh di ka Antioch.

²³Ripas rŭŭ diginŭ mua tian-i, ayŭh bu ka panu di barang yŭn-i di tarun tana Galatia ngga Phrygia, turung ngara adi sabah di Jesus da rabis tagap darŭm pinyabah ngara.

²⁴Di tika anŭ agi ndi naan daya Jahudi dŭn Apollos, adi dog biranak di Alexandria, mandŭg ka Ephesus. Ayŭh anŭ daya adi siradik minyu buang biyŭn tŭrŭp pinyipuan di Surat-kudus.

²⁵Ayŭh mbŭh nakit dog nyiruton di Aran Tuhan, ka ngga gruwŭn asŭng-i ayŭh piagah buang ngajar ngga batur-i pinyawŭ pasar Jesus, sunggu ayŭh puan pasar baptisa John adŭ.

²⁶Ayŭh piguru minyu ngga atin pagan darŭm ramin simayang-Jahudi. Kan Priscilla ngga Aquila dingah ayŭh, ngara taban ayŭh maad ka nakit ngajar ayŭh pasar Aran Tapa.

²⁷Kan Apollos raan di ka Achaia, bara di Ephesus adi sabah pait surat ka Achaia kidaan di bara adi sabah diginŭ da kambat ayŭh. Kan ayŭh mbŭh ndŭg, ayŭh mbŭh sawŭ jadi pinurung yŭn ngara adi so pinyirasi-mandis Tapa mbŭh jadi pinunda Jesus.

²⁸Amai ngga pinyibake karit-i ayŭh ngarah bara daya Jahudi darŭm sitama pinyipuan di sirung jawin daya bagŭ, pakai pinganang Surat-kudus ngga kiren Jesus anŭ sawŭ Kristus.