Read Biatah Bidayuh PINGANDAI 19 Bible Online

PINGANDAI 19 - Biatah Bidayuh bible

PINGANDAI 19

¹Sitadŭn Apollos di Corinth, Paul panu so ka atak tarun tana di utung rais anŭ nuju Ephesus. Diginŭ ayŭh bidapŭd ngga kada murid Tuhan.

²Ka ayŭh siken ngara, “Agi kah angān kambat Roh Kudus di andu angān jadi daya adi sabah di Jesus?” “Bŭn kieh puan Roh Kudus agi,” ngara nam.

³“Baptisa adi munki ko angān kambat?” Paul siken. “Baptisa John,” ngara nam.

⁴ Paul nang, “Baptisa John inŭh yŭn ngara adi marik pimudip ngara pari ka Tapa; ka ayŭh mbŭh kidaan di daya Israel da sabah di sianŭ adi re mandŭg sundis so adŭp-i; anŭ inŭh, sabah di Jesus.”

⁵Kan ngara dingah sakanŭ, ngara rasu dog baptisa ngga adŭn Tuhan Jesus.

⁶Paul na tangan-i di tunduh ngara, ka Roh Kudus mandŭg di tunduh ngara; ngara minyu darŭm piminyu saruh buang sua piagah agah so Tapa.

⁷Ngara anŭ agi kira ka simŭng-duwŭh naan.

⁸Paul di mŭrŭt ramin simayang-Jahudi ka sitŭkŭd taruh buran minyu ngga atin pagan ngga bara daya. Ayŭh kirakar ngga bara daya, suba an bada daya sabah kayuh adi-i nang pasar Pinyipritah Tapa.[27]

⁹Pak kada ngara baking ka dŭh an sabah, ka di sirung jawin daya bagŭ ngara kinarap Aran Tuhan. Jadi Paul bu tingge ngara ka taban ngara adi sabah ngga adŭp-i, ka barang andu[28] ayŭh kirakar ngga bara daya di tibande birit yŭn daya Tyrannus siraru ngajar.

¹⁰Kayuh anŭ simŭnŭ sitŭkŭd duwŭh sawa, ndŭg ka sopŭrŭg daya darŭm utung rais Asia, bait-i daya Jahudi puan kah daya adi dŭh bangsa Jahudi, mbŭh dingah pinganang Tuhan.

¹¹Tapa ndai pingandai-nginga adi raru saruh so tangan Paul;

¹²anŭ sabab ndŭg ka pingutos tangan ka banang banang adi Paul pakai dog tambit so ayŭh yŭn bara adi birandam; ka daya adi birandam sawŭ bua, ka bara roh arap bu so daya.

¹³Kada daya Jahudi adi agi panu bijaruh ka barang yŭn agi gŭh suba pakai adŭn Jesus ngga pibu roh arap. Ngara nang di roh roh arap anŭ, “Ngga adŭn Jesus adi Paul nyuse, aku pibu angān.”

¹⁴Ju madis anak dari Imam Bās Jahudi dŭn Sceva, agi ndai simŭnŭ.

¹⁵Pak roh arap nang di ngara, “Aku puan Jesus, ka puan gŭh Paul; pak asi angān?”

¹⁶Daya adi dog mŭrŭt roh arap anŭ mirupat ka tunduh ngara ka ngga ganas kijera ngara, ndŭg ka ngara babak bu so ramin-i biragan buang piraka ngara abo tiratak tikadi so ganan ngara.

¹⁷Sopŭrŭg daya Jahudi samŭn adi dŭh bangsa Jahudi adi rŭŭ di Ephesus dingah kayuh anŭ ka mbŭh raru taru. Sabab anŭ, adŭn Jesus rasu dog kibās.

¹⁸Bagŭ meh ngara adi mbŭh sabah di Jesus mandŭg ka ngaku buang kidaan di sirung jawin daya bagŭ sopŭrŭg pingandai sarah adi ngara ko ndai.

¹⁹Bagŭ ngara adi ndai biruri karŭm kiruwar ka nguruk surat biruri ngara ka badang-i di sirung jawin daya bagŭ. Ngara niap rega dudu surat anŭ, ka prungun-i agi rimŭh-puru ribu kiping duit pirak.[29]

²⁰So kayuh saruh adi mbŭh jadi simŭnŭ, pinganang Tuhan[30] dŭ dŭ kambang di barang yŭn.

²¹Ripas kayuh anŭ adi mbŭh jadi, Paul ndai pikir-i[31] an di ka Jerusalem so ka Macedonia ngga Achaia. Ayŭh nang, “Ripas aku ko di kamanŭ, aku dŭh siŭn dŭh gŭh di ka Rome.”

²²Jadi ayŭh pait Timothy ngga Erastus, duwŭh naan pinurung-i, ka Macedonia, sitadŭn adŭp-i babŭ tui di utung rais Asia.

²³Di tika anŭ inŭh pito bās timbur di Ephesus sitagar Aran Tuhan.

²⁴Ndi naan tukang pirak dŭn Demetrius adi ndai patong patong bari-sambah yŭn tapa Artemis, ka dagang-i mbŭh dapŭd bagŭ utung yŭn bara adi nyiraja di ribo-i.

²⁵Jadi ayŭh bagan sopŭrŭg ngara da tikuruk samŭn ngara adi samah ndai kraja mun jangi ka nang di ngara, “Bara dingan, angān puan so kraja ati ata dapŭd pinyikaya ta.

²⁶Madin, adŭp ngan mbŭh kiris buang dingah kayuh adi daya anŭ dŭn Paul ndai. Ayŭh nang tapa adi manusia ndai taŭn dŭh tapa, ka mbŭh bagŭ daya sabah ayŭh, di Ephesus ka batang an di ndi tarun tana darŭm utung rais Asia.

²⁷Daya re piguru kinarap dagang ta. Daya re dŭh tia stabi di bari-sambah tapa Artemis, adi dog nyambah di Asia ngga di ndi ong ong. Tapa ta ati re dŭh tia timagah!”

²⁸Kan ngara dingah sakanŭ ngara mbŭh raru baji, ka nyirais nang, “Bās inŭh Artemis, tapa daya Ephesus!”

²⁹Jadi ndi kupo kupo mbŭh guga. Ngara nakap Gaius ngga Aristarchus, adi duwŭh naan daya Macedonia adi panu ngga Paul, ka batak ngara ka stadium.

³⁰Adŭp Paul raan di bidapŭd ngga bara daya bagŭ anŭ, pak bara adi sabah dŭh bada ayŭh.

³¹Kada bara pinguasa di utung rais anŭ, adi mbŭh dingan Paul, pait pinganang gŭh mite ayŭh dŭh kiren adŭp-i di stadium anŭ.

³²Di tika anŭ bara daya bagŭ anŭ mbŭh samah guga: agi adi nyirais nang ndi masam kayuh, agi adi nyirais nang kayuh bŭkŭn, sabab batang an sopŭrŭg ngara dŭh puan ani sabab ngara mandŭg tikuruk.

³³Agi kada ngara nang-i sitagar Alexander, amai bara daya Jahudi bada ayŭh di ka jawin. Alexander pakat tangan-i mite bara daya pirŭngŭt, ka-i suba minyu an kidaan ani adi mbŭh jadi.

³⁴Pak kan ngara kiris ayŭh daya Jahudi, sopŭrŭg ngara samah samah nyirais nang ndi masam kayuh sitadŭn duwŭh jam: “Bās inŭh Artemis tapa daya Ephesus!”

³⁵Sikasŭn-i, pingibās kupo tungang bada bara daya pajam. “Daya Ephesus!” ayŭh nang. “Sopŭrŭg ta puan kupo Ephesus timagah ngga bari-sambah Artemis adi bās, ka ngga batuh-kudus anŭ adi rabu so rangit.

³⁶Mating daya tungang miman kayuh anŭ. Angān patut pirŭŭ adŭp ngan ka dŭhnyah ndai kayuh adi dŭh tatu.

³⁷Angān mbŭh taban ngara ati kamati pŭn ngara mating mirupak bari bari-sambah puan kah kinarap tapa ta.

³⁸Kambŭi Demetrius ngga bara adi nyiraja di ribo-i an nyarah tadŭ daya, ata biyŭn bara pinguasa samŭn tarun yŭn bisara ka tipuh adi ngga daya bisara; daya bisa ngadu diginŭ.

³⁹Pak kambŭi angān an ndai rabis so anŭ, angān patut ngatur-i di udung rais.

⁴⁰Amai ripas kayuh adi mbŭh jadi di andu ati, ata bisa dog nyarah sitagar nguga kupo. Ata dŭh re tungang nyibandar adŭp ta di kayuh mun ati.”

⁴¹Ripas-i ko minyu sakanŭ, ayŭh bada bara daya maad.