Read Biatah Bidayuh PINGANDAI 2 Bible Online

PINGANDAI 2 - Biatah Bidayuh bible

PINGANDAI 2

¹ Kan-i mbŭh andu Pentecost, sopŭrŭg adi sabah di Jesus mbŭh samah tikuruk di ndi yŭn.

²Ka gŭgŭh agi jawŭn so rangit sak jawŭn sabak ribut, ka-i ngisi ramin adi yŭn ngara agi aŭn guru.

³Komŭnŭ ngara kiris kayuh mun jireb apui adi kutung adŭp-i mbap di barang naan ngara.

⁴Ngara mbŭh rasu dog nguasa Roh Kudus ka piguru minyu ngga piminyu bŭkŭn nanyam Roh bada ngara minyu.

⁵Di Jerusalem agi bara daya Jahudi adi tagap darŭm adat, adi mbŭh mandŭg so barang rais di ong.

⁶Kan ngara dingah jawŭn anŭ, bara daya bagŭ tikuruk. Sopŭrŭg ngara mbŭh gŭgŭh sabab sopŭrŭg ngara dingah bara adi sabah minyu darŭm piminyu adŭp ngara.

⁷Ka buang inga inga ngara nang, “Ngara ati adi minyu sakanŭ inŭh bara daya Galilee!

⁸Mani meh garang, barang naan ata dingah ngara minyu pakai piminyu piminyu adŭp ta?

⁹Ata daya so Parthia, Media, ka so Elam; so Mesopotamia, Judea, ka so Cappadocia; so Pontus ka so Asia,

¹⁰so Phrygia ka so Pamphylia, so Egypt ka so tarun tana Libya sindŭk Cyrene. Agi kada so ata mandŭg so Rome,

¹¹bait daya Jahudi puan kah daya adi dŭh bangsa Jahudi adi mbŭh mŭrŭt adat Jahudi; ka agi kada mandŭg so Crete ngga Arabia, pak sopŭrŭg ta dingah ngara minyu darŭm piminyu adŭp ta pasar pingandai bās adi Tapa mbŭh ndai!”

¹²Nginga buang mbŭh riruk, ngara pari pari siken dingan-i, “Ani rati kayuh ati?”

¹³Pak ngara adi bŭkŭn ngga itong tapat nang, “Ngara ati mbŭh mabuk!”

¹⁴Jadi Peter mijog ngga bara pinyuruh adi simŭng-ndi naan, ka minyu ngga sirŭŭn bana di bara daya bagŭ: “Bara dingan ku daya Jahudi samŭn angān adi rŭŭ di Jerusalem, nakit dingah kayuh adi re ku nang.

¹⁵Ngara ati dŭh mabuk, sak adi nang ngan; ati gi-muran pukor prii isan isan.

¹⁶Yŭh-i ati adi nabi Joel ko nang:

¹⁷ ‘Ati inŭh kayuh adi re Ku ndai di sikasŭn tipuh, Tapa nang: Aku re ren Roh Ku di tunduh sopŭrŭg daya. Anak dari ngga anak dayung ngan re piagah kayuh adi Aku kidaan di ngara. Bara dari bujang ngan re kiris kayuh keya ka di darŭm pŭmŭh, ka bara nyamba dari ngan re biyŭn bagŭ pŭmŭh so Aku.

¹⁸Sawŭ, di bara daya-gaji Ku, dari dayung, Aku re ren gŭh Roh Ku di tipuh anŭ, ka ngara re piagah kayuh adi Aku kidaan di ngara.

¹⁹Aku re ndai pingandai-nginga di rangit ka pingandai-saruh di ong ati. Re agi deya, apui, ka asuh adi tabar;

²⁰batŭh andu re karŭm, ka buran re marui bireh mun deya, diŭ so Andu Tuhan mandŭg, andu anŭ adi bās ka bragah.

²¹Di tika anŭ, asi asi adi bagan adŭn Tuhan yŭn mite turung re dog nyiramat.’

²²“Dingah pinganang ku ati, angān adi bara dingan ku daya Israel! Jesus so Nazareth, pimandŭg-I so Tapa mbŭh dog natu di angān darŭm pingandai-nginga ngga pingandai-saruh adi Tapa mbŭh ndai so Ayŭh. Adŭp ngan mbŭh puan kayuh anŭ, amai-i mbŭh jadi di ruang ngan.

²³ Nanyam ka atur kraja pingandai adŭp-I, Tapa mbŭh natu Jesus dog nyerah ka darŭm tangan ngan; ka angān bada Ayŭh kabŭs dog masak di atuh rigang di tangan daya bidosa.

²⁴ Pak Tapa mbŭh pakat Ayŭh so kabŭs, anŭ inŭh pirupas Ayŭh so kuasa pinyikabŭs, sabab pinyikabŭs dŭh bisa muak Ayŭh.

²⁵ Amai David ko minyu pasar Ayŭh, ‘Aku kiris Tuhan di sirung jawin ku di barang tipuh; Ayŭh agi sindŭk aku, isa aku dŭh dog pinyusah.

²⁶Ngapŭi asŭng ku sanang, ka pinganang ku puno ngga pinyigaŭn. Sunggu aku ati manusia, aku re adu adu harap di janji Mai,

²⁷sabab Kaam dŭh re tagan aku di ong daya adi mbŭh kabŭs; Kaam dŭh re tandah urun Mai adi tŭtŭd madam darŭm kubur.

²⁸Kaam mbŭh kiren di aku aran adi nuju udip adi sawŭ, ka aku mbŭh gaŭn sabab Kaam agi nguan aku.’

²⁹“Bara dingan, aku dŭh siŭn dŭh an minyu ngga tarang ngga angān pasar Raja David, babuk ta adi timagah. Ayŭh mbŭh kabŭs ka dog kubur, ka kubur-i babŭ digiti ngga ata ndŭg andu ati.

³⁰ David mbŭh nabi, buang puan janji Tapa di ayŭh: Tapa bipayu ngga ayŭh an bada ndi naan so bara sesang-i jadi raja mun adŭp-i.

³¹David puan kayuh anŭ re jadi, ngapŭi ayŭh minyu pasar pinyimakat Kristus so kabŭs kan-i nang, ‘Ayŭh dŭh dog tagan di ong daya adi mbŭh kabŭs; pŭrŭng-I dŭh re madam darŭm kubur.’

³²Tapa mbŭh pakat adŭp Jesus ati so kabŭs, ka kieh mbŭh saksi di kayuh anŭ.

³³Ayŭh mbŭh dog pakat da guru di yŭn adi bikuasa tura ka tauh Tapa adi Sama-I, ka mbŭh kambat Roh Kudus so Ayŭh, nimun adi-I ko bijanji an nggen. Anŭ adi angān kiris ka dingah madin inŭh pinganggen-I adi-I ren di tunduh kieh.

³⁴ Amai dŭh-i David adi maad ka shorga; batur-i nang, ‘Tuhan nang di Tuhan ku: Guru digiti tura ka tauh Ku

³⁵ndŭg ka Aku mbŭh bada pinganyu Mu jadi bangan di ribo kaja Mu.’

³⁶“Sopŭrŭg daya Israel patut puan ngga tatu-i Jesus ati, adi angān masak di atuh rigang, inŭh sianŭ adi Tapa mbŭh bada jadi Tuhan ka Kristus!”

³⁷Kan bara daya dingah anŭ, ngara mbŭh raru bipito buang nang di Peter samŭn di bara pinyuruh adi bŭkŭn, “Dingan, ani patut ami ndai?”

³⁸Peter nang di ngara, “Barang naan angān marik pimudip ngan pari ka Tapa, ka kambat baptisa meh ngga adŭn Jesus Kristus, isa dosa ngan bisa dog apun; ka angān re bisa kambat pinganggen Tapa, anŭ inŭh Roh Kudus.

³⁹Amai janji Tapa mbŭh dog ndai di angān samŭn di anak ngan, ka di sopŭrŭg adi rŭŭ di tarun jo; sopŭrŭg, adi Tuhan Tapa ta ko bagan ka adŭp-I.”

⁴⁰Ka ngga bagŭ bang bang piminyu adi bŭkŭn ayŭh ngajar, ngatat ngara, “Nyiramat adŭp ngan so ukum adi re nyatŭk turap adi ginaka ati!”

⁴¹Bagŭ ngara sabah di pinganang-i ka mbŭh rasu dog baptisa; ka agi taruh ribu naan daya dog nambah di tibaran ngara di andu anŭ.

⁴²Ngara awet mandŭg tikuruk dingah ajar so bara pinyuruh. Ngara udip keya ka bijurud bimadis, man samah, simayang samah.

⁴³Bagŭ pingandai-nginga ngga pingandai-saruh dog ndai so bara pinyuruh, ka barang naan daya mbŭh inga inga buang taru.

⁴⁴ Sopŭrŭg adi sabah di Jesus siraru tikuruk buang samah samah dapu kayuh.

⁴⁵Ngara jua buat-rata, ka kutung duit dupan adŭp ngara, nanyam patut adi barang naan biguna.

⁴⁶Barang andu ngara mandŭg tikuruk di Ramin Tuhan, samah man di ramin dingan ngga atin gaŭn ngga atin tŭkŭn,

⁴⁷buang ngara muji Tapa. Sopŭrŭg daya kana ngga ngara. Ka barang andu Tapa nambah di ngara sinadan adi mbŭh dog nyiramat.