Read Biatah Bidayuh PINGANDAI 20 Bible Online

PINGANDAI 20 - Biatah Bidayuh bible

PINGANDAI 20

¹Kan pito anŭ tejah mbŭh pajam, Paul bagan da tikuruk sopŭrŭg bara adi sabah ka ko-i nggen piminyu pinganang ngga ngajar ka ngatat ngara ayŭh kidaan adŭp-i re panu. Ayŭh matak ka Macedonia.

²Ayŭh panu di abong tarun tana anŭ ka ngga ajar ajar-i ayŭh ngatat ngara adi sabah di Jesus. Komŭnŭ ayŭh mandŭg ka Achaia,

³di yŭn-i rŭŭ sitŭkŭd taruh buran. Ayŭh mbŭh re an di ka Syria pak dingah daya Jahudi agi bipekat rawan adŭp-i; jadi ayŭh natu adŭp-i an pari so ka Macedonia.

⁴Sopater anak Pyrrhus, so Berea, matak ngga ayŭh; simŭnŭ gŭh Aristarchus ngga Secundus, so Thessalonica; Gaius, so Derbe; Tychicus ngga Trophimus, so utung rais Asia; ka Timothy.

⁵Ngara di diŭ ka kajŭn kieh di Troas.

⁶Kieh birayar so Philippi ripas Gawai Ruti Dŭh-Biragi, ka rimŭh andu ripas anŭ kieh bidapŭd ngga ngara di Troas, di yŭn kieh rŭŭ ndi minggu.

⁷Singumi andu Nŭm[32] kieh tikuruk yŭn bisamah man. Paul minyu di bara daya, pak ayŭh tui minyu ndŭg sitŭrŭp ngarŭm, amai ayŭh re bu andu anŭ ndi.

⁸Bagŭ prita mbŭh dog tung di birit di sambu di yŭn kieh tikuruk.

⁹Ndi naan dari adi gibabŭ mara dŭn Eutychus guru di pinjan, ka darŭm Paul babŭ minyu, Eutychus nundu; ayŭh bŭŭs ka rasu rabu so takah taruh ka ribo. Kan ngara tunduk ayŭh, ayŭh taŭn mbŭh kabŭs.

¹⁰Pak Paul mūn ka sagān, mutu tingga ayŭh ka dakŭp ayŭh. “Dŭhnyah susah,” ayŭh nang, “babŭ udip ayŭh!”

¹¹Komŭnŭ ayŭh pari maad ka sambu, mire ruti, ka man. Ripas-i ko tui minyu ngga ngara, ndŭg siri jawa, Paul matak.

¹²Ngara taban dari adi mara anŭ ngga mari, udip buang sanang asŭng-i.

¹³Kieh panu diŭ ka kapar ka birayar nuju Assos, di yŭn ami re tambit Paul. Adŭp-i ko kidaan di kieh da ndai simŭnŭ, sabab ayŭh di kamanŭ so deyŭh.

¹⁴Kan ayŭh bidapŭd ngga kieh di Assos, kieh kambat ayŭh ka darŭm kapar ka pijuu birayar ka Mitylene.

¹⁵So nŭ kieh birayar dinge, ka andu anŭ ndi kieh mandŭg ka tarun adi dŭh jo so Chios. Ndi andu ripas anŭ kieh ndŭg Samos; ka andu anŭ ndi dinge kieh ndŭg Miletus.

¹⁶Paul natu adŭp-i an birayar murah Ephesus, isa dŭh saat jam di tarun tana Asia. Ayŭh bigaut an ndŭg Jerusalem, kambŭi tungang, di andu Pentecost.

¹⁷So Miletus Paul pait pinganang ka Ephesus, mite bara nyamba eklisia bidapŭd ngga adŭp-i.

¹⁸Ka kan ngara mbŭh mandŭg bidapŭd ngga adŭp-i, ayŭh nang di ngara, “Angān puan sopŭrŭg kayuh adi aku ko ndai sitadŭn aku agi ngga angān, so sibungas andu adi ngga aku mandŭg ka darŭm utung rais tana Asia.

¹⁹Ngga atin tŭkŭn ka ngga randang batŭh aku adi urun Tuhan ndai kraja ku di tipuh pinyusah adi dog aku sabab pekat daya Jahudi.

²⁰Angān puan aku bŭn abah kidaan tadŭ kayuh adi biguna di angān darŭm aku ngajar angān di ruang daya bagŭ ka di ramin ramin ngan.

²¹Di daya Jahudi, simŭnŭ gŭh di daya adi dŭh bangsa Jahudi, aku agi bakan ngara da marik pimudip ngara pari ka Tapa, ka sabah di Tuhan Jesus.

²²Ka madin, ngga nurut pingatur Roh Kudus, aku di ka Jerusalem, dŭh puan ani re jadi di adŭp ku diginŭ.

²³Kaŭs aku puan di barang kupo so pinyibakan Roh Kudus, ramin jer ngga pinyusah agi kajŭn aku.

²⁴ Pak aku dŭh mbit bat di asŭng adŭp ku, bait aku kabŭs puan kah udip; kaŭs aku gruwŭn an ngamas kraja adi Tuhan Jesus ko nggen di aku, anŭ inŭh kidaan Agah Kana pasar pinyirasi-mandis Tapa.

²⁵“Aku mbŭh bigaur ngga sopŭrŭg ngan, nyuse Pinyipritah Tapa.[33] Ka madin aku puan angān dŭh re tia kiris aku.

²⁶Jadi aku nakit kidaan di angān andu ati: kambŭi agi so angān manyap, dŭh aku dapu tanggong.

²⁷Amai aku bŭn abah kidaan di angān sopŭrŭg kayuh adi Tapa raan angān puan.

²⁸Jaga adŭp ngan samŭn sopŭrŭg kaban eklisia adi Roh Kudus ko nyerah ka darŭm tangan ngan. Jadi pingingat eklisia Tapa,[34] nimun pingingat-biri jaga biri-i, adi Ayŭh mbŭh dapu so deya Anak-I.[35]

²⁹Aku puan ripas aku mbŭh bu, kasong kasong tarun adi mangah re mandŭg di ruang ngan, ka dŭh re tandah eklisia.

³⁰Tika re mandŭg kan agi kada daya so tibaran adŭp ngan re minyu kadong ngga kinanyap bara adi sabah da tunda adŭp-i.

³¹Ngapŭi angān jaga meh, ka ingat sandu singarŭm aku ko ngga randang batŭh ngajar angān sitŭkŭd taruh sawa.

³²“Ka madin aku nyerah angān ka darŭm pinyigrindung Tapa; agah pasar pinyirasi mandis-I gŭh re jaga angān, adi tungang pijog angān ka nggen di angān berkat Tapa adi yŭn sopŭrŭg daya.

³³Aku bŭn ripong di pirak daya, bait-i mas, puan kah piraka daya.

³⁴Adŭp ngan puan aku nyiraja ngga tangan adŭp ku ati ngga dapŭd pinguman bait kayuh pakai yŭn adŭp ku, samŭn yŭn ngara adi agi ngga aku.

³⁵Aku mbŭh kiren di angān darŭm bagŭ masam kayuh, so ka bandar nyiraja mun ati ata dŭh siŭn dŭh an turung daya adi ramah, buang ingat pinganang Jesus adi nang, ‘Sanang dŭ inŭh daya adi nggen so daya adi kambat.’ ”

³⁶Ka kan-i ko minyu sakanŭ, ayŭh sidikang ngga ngara ka simayang.

³⁷Sopŭrŭg ngara sien buang ngara dakŭp ayŭh ka sium ayŭh darŭm-i re panu.

³⁸Ngara susah sabab ayŭh nang ngara re dŭh tia kiris ayŭh. Ka ngara nguru ayŭh di ka kapar.