Read Biatah Bidayuh PINGANDAI 21 Bible Online

PINGANDAI 21 - Biatah Bidayuh bible

PINGANDAI 21

¹Ko kidaan adŭp ami re panu di ngara, kieh birayar radus nuju Cos. Andu anŭ ndi kieh ndŭg Rhodes, ka so nŭ kieh pijuu ka Patara.

²Diginŭ kieh dapŭd ndi kapar adi re di ka Phoenicia; kieh mŭrŭt, ka rasu birayar.

³Kan kieh mbŭh tungang kiris Cyprus, kieh birayar so tura ka siratan nuju Syria. Kieh ndŭg deyŭh di Tyre, di yŭn barang re dog piruah so kapar.

⁴Diginŭ kieh bidapŭd ngga kada bara adi sabah ka rŭŭ ngga ngara ju andu. Ngga kuasa Roh Kudus ngara kidaan di Paul da dŭh di ka Jerusalem.

⁵Ka kan tipuh ami ayō ngara mbŭh ripuan, kieh bu so nŭ ka pijuu pimanu ami. Sopŭrŭg ngara, samŭn sawŭn ngara ngga bara anak ngara, nguru kieh ruah so kupo di ka tabing rawŭt; diginŭ kieh sidikang ka simayang.

⁶Ka kan-i mbŭh jam kieh birakang, kieh di mŭrŭt kapar ka adŭp ngara maad.

⁷Kieh pijuu birayar, so Tyre nuju Ptolemais, di yŭn kieh nggen tabi di bara adi sabah ka rŭŭ ngga ngara ndi andu.

⁸ Andu anŭ ndi kieh bu so nŭ di ka Caesarea. Diginŭ kieh nyandong ramin Philip adi pinyuse Injil, ndi so ngara adi ju naan adi dog mien jadi pinurung di Jerusalem.

⁹Ayŭh biyŭn pat madis anak dayung adi bayuh banan, adi piagah agah so Tapa.

¹⁰ Sitadŭn kieh rŭŭ diginŭ kudu kudu andu, ndi naan nabi dŭn Agabus mandŭg so Judea.

¹¹Ayŭh mandŭg tudu kieh, tambit abŭt kupong Paul, mŭŭng kaja tangan adŭp-i ngga abŭt kupong anŭ, ka nang, “Ati inŭh kayuh adi Roh Kudus nang: Daya adi dapu abŭt kupong ati re dog mŭŭng daya Jahudi mun ati di Jerusalem, ka ngara re nyerah ayŭh ka tangan daya adi dŭh bangsa Jahudi.”

¹²Kan kieh dingah anŭ, kieh ngga sopŭrŭg adi agi diginŭ mite Paul dŭh di ka Jerusalem.

¹³Pak ayŭh nam, “Ani ati ndai ngan, sien buang nyusah atin ku? Aku mbŭh sidia dŭh yŭn dog mŭŭng adŭ di Jerusalem pak yŭn dog siŭ diginŭ yŭn adŭn Tuhan Jesus.”

¹⁴Kieh dŭh tungang bitan ayŭh, ka kieh tandah buang nang, “Isa-i kayuh jadi nanyam pinyiraan Tuhan.”

¹⁵Ripas ko rŭŭ diginŭ mua tian-i, kieh misŭn piraka ami ka matak ka Jerusalem.

¹⁶Kada murid so Caesarea sua ngga kieh ka taban kieh ka ramin daya adi re ami nyandong,[36] Dŭn daya anŭ inŭh Mnason, so Cyprus, adi mbŭh so sibungas-i sabah di Jesus.

¹⁷Kan kieh mbŭh ndŭg Jerusalem, bara adi sabah di Jesus kambat kieh ngga gaŭn.

¹⁸Andu anŭ ndi Paul di ngga kieh di bidapŭd ngga James; ka sopŭrŭg nyamba eklisia agi diginŭ.

¹⁹Paul nggen tabi di ngara ka kidaan sopŭrŭg kayuh adi Tapa mbŭh ndai so kraja-i yŭn daya adi dŭh bangsa Jahudi.

²⁰Ko dingah ayŭh, sopŭrŭg ngara muji Tapa. Ka ngara nang, “Paul, kuu adi dingan ami, kuu kiris kudu ribu daya Jahudi mbŭh sabah di Jesus, ka munki masam tŭtŭd ngara di Ukum-adat.

²¹Ngara agi dog kidaan nang kuu agi ngajar sopŭrŭg daya Jahudi adi rŭŭ di rais daya adi dŭh bangsa Jahudi da kambŭt Ukum-adat Moses, ka kidaan di ngara da dŭh nyunat anak ngara bait tunda adat Jahudi.

²²Ngara tatu re puan kuu agi mandŭg. Ani meh re ta ndai?

²³ Ati kayuh adi kieh raan kuu ndai. Digiti agi pat naan daya adi mbŭh ndai payu-i.

²⁴Tunda ngara ka sua ndai adat pibisig ngga ngara ka tanggong biranja ngara, isa ngara tungang nundo ubak-i.[37] Simŭnŭ daya re puan nang kayuh adi ngara dingah pasar kuu dŭh sawŭ, pak sibandar-i kuu sita Ukum-adat Moses.

²⁵ Pak mun ngara adi dŭh bangsa Jahudi adi mbŭh sabah di Jesus, kieh ko pait surat ka ngara bada ngara dŭh man pinguman adi ko dog jugan ka tibudo, puan kah deya, puan kah dāng adi kabŭs ko dog nyŭt tungo-i, ka pijo adŭp ngara so pimudip adi dŭh tatu darŭm pingandai kais.”

²⁶Jadi Paul taban ngara anŭ, ka andu anŭ ndi ayŭh ndai adat pibisig di adŭp-i ayō ngara. Komŭnŭ ayŭh di mŭrŭt Ramin Tuhan ka nggen puan kudu kudu andu-i re ndŭg pinŭbŭn tipuh adat pibisig anŭ, adi ngga sadis re dog jugan yŭn barang naan ngara.

²⁷Pak kan ju andu anŭ mbŭh re ripuan, kada daya Jahudi so tarun tana Asia kiris Paul di Ramin Tuhan. Ngara nguga bara daya ka nakap Paul.

²⁸“Bara daya Israel!” ngara nyirais nang. “Turung! Ati inŭh daya adi panu ka barang yŭn ngajar barang naan daya da rawan bangsa Israel, rawan Ukum-adat Moses, samŭn Ramin Tuhan ati. Ka madin ayŭh tanŭ ka mbŭh taban kada daya adi dŭh bangsa Jahudi ngga mŭrŭt ka darŭm Ramin Tuhan, ngga nyembar Yŭn Kudus ati!” (

²⁹ Ngara nang sakanŭ sabab ngara agi kiris Trophimus so Ephesus ngga Paul darŭm kupo, ka ngara pikir Paul agi taban ayŭh ka darŭm Ramin Tuhan.)

³⁰Ka ndi kupo kupo mbŭh guga, ka bara daya samah bikaduh di nakap Paul, ka tarik ayŭh ngga ruah so Ramin Tuhan. Ka tiban Ramin Tuhan rasu dog tŭŭp.

³¹Darŭm bara daya bagŭ anŭ mbŭh suba re siŭ Paul, pinganang mbŭh dog pait ka pingibās soldadu daya Rome nang Jerusalem agi guga.

³²Pingibās soldadu anŭ rasu bagan kada pingubak soldadu samŭn bara soldadu ka bigaut di ka yŭn bara daya. Kan bara daya kiris ayŭh ayō bara soldadu, ngara rasu ko mukong Paul.

³³Pingibās soldadu tudu Paul, nakap ayŭh, ka nggen ukum bada ayŭh dog muak ngga duwŭh parik basi. Ayŭh siken, “Asi daya ati, ka ani anŭ ko-i ndai?”

³⁴Bara daya bagŭ samah nyirais, agi nang sakati agi nang sakanuh; ka amai pingibās anŭ mbŭh dŭh adŭ tungang dapŭd ruru-i amai bara mbŭh samah guga, ayŭh mritah daya-i da taban Paul ka kuta.

³⁵Kan ayŭh mbŭh ndŭg sigŭn tungoh, bara soldadu tunduk adŭ ayŭh sabab bara daya mbŭh makin mangah.

³⁶Sopŭrŭg ngara tunda ayŭh buang nyirais nang, “Siŭ ayŭh!”

³⁷Darŭm bara soldadu mbŭh re taban Paul ka darŭm kuta, ayŭh minyu di pingibās soldadu anŭ: “Bisa aku nang kayuh di kuu?” “Kuu minyu Greek, dŭ?” pingibās anŭ siken.

³⁸“Jadi kuu dŭh meh daya Egypt anŭ adi ko dawŭ-i nguga daya, ka taban pat ribu naan pinyamun adi bisinyata ka tarun tana-pajam?”

³⁹Paul nam, “Aku daya Jahudi, dog biranak di Tarsus di tarun tana Cilicia, daya so kupo adi timagah. Turung bada aku minyu di bara daya ati.”

⁴⁰Pingibās soldadu anŭ nyibandar ayŭh minyu; ka Paul, mijog di tungoh, pakat tangan-i mite daya pajam. Kan ngara mbŭh pajam, Paul minyu di ngara darŭm piminyu Hebrew: