Read Biatah Bidayuh PINGANDAI 22 Bible Online

PINGANDAI 22 - Biatah Bidayuh bible

PINGANDAI 22

¹“Bara dingan ku daya Jahudi, aku mite angān dingah kayuh adi re ku nakit kidaan di angān!”

²Kan ngara dingah ayŭh minyu darŭm piminyu Hebrew, ngara makin pajam; ka Paul pijuu minyu:

³ “Aku ati daya Jahudi, dog biranak di Tarsus darŭm tarun tana Cilicia, pak sikura digiti di Jerusalem di ribo Gamaliel; dog nakit ngajar pasar ukum-adat tayung-babuk ta, ka mbŭh bana bituan di Tapa mun adŭp ngan adi agi digiti andu ati.

⁴ Aku agi kisiis ndŭg kabŭs sinadan adi tunda Aran Tuhan. Aku nakap dari bait dayung ka na ngara darŭm jer.

⁵Imam Bās ngga bara Kunsil bisa kidaan kayuh adi aku nang agi sawŭ. So ngara aku agi trima surat surat nuju daya Jahudi di Damascus; jadi aku di kamanŭ di nakap daya diginŭ gŭh, ka taban ngara ka Jerusalem yŭn dog ukum.

⁶“Darŭm aku panu buang mbŭh sindŭk Damascus, ngga arong yun kumbeng, jawa so rangit agi tapŭ bana nyekar maning aku.

⁷Aku rabu ka tana ka dingah sirŭŭn nang di aku, ‘Saul, Saul! Mani kuu kisiis Aku?’

⁸‘Asi Kaam, Tuhan?’ aku siken. ‘Aku ati Jesus so Nazareth, adi kuu kisiis,’ Ayŭh nang di aku.

⁹Bara daya adi ayō aku kiris jawa anŭ, pak dŭh dingah sirŭŭn sianŭ adi minyu ngga aku.

¹⁰Aku siken, ‘Ani patut ku ndai, Tuhan?’ ka Tuhan nang di aku, ‘Makat ka nŭh di ka Damascus; diginŭ kuu re dog kidaan sopŭrŭg kayuh adi Tapa mbŭh natu re bada kuu ndai.’

¹¹Aku jadi karak sabab sekar jawa anŭ, jadi ngara adi ayō aku panu kayak ka taban aku mŭrŭt Damascus.

¹²“Di Kupo anŭ agi ndi naan daya dŭn Ananias, daya adi biyŭn atin taru di Tapa ka adi sita Ukum-adat ta buang dog muji sopŭrŭg daya Jahudi adi rŭŭ diginŭ.

¹³Ayŭh mandŭg ka yŭn ku, mijog sindŭk aku, ka nang, ‘Dingan ku Saul, kiris meh tarun!’ Di jam anŭ gŭh aku dapŭd kiris dinge, ka kiris ayŭh.

¹⁴Ayŭh nang, ‘Tapa tayung-babuk ta mbŭh mien kuu da puan pinyiraan-I, da kuu kiris Urun-I adi tŭnggŭn, ka da kuu dingah Ayŭh minyu ngga sirŭŭn adŭp-I.

¹⁵Amai kuu re jadi saksi yŭn-I, yŭn kidaan di barang naan daya kayuh adi kuu mbŭh kiris ka dingah.

¹⁶Ka madin, ani meh kajŭn mu? Makat di baptisa, siŭn dosa mu dog musor darŭm kuu bidua ka Ayŭh.’

¹⁷“Aku pari ka Jerusalem, ka sitadŭn aku simayang di Ramin Tuhan, aku kiris keya ka darŭm pŭmŭh,

¹⁸Tuhan minyu ngga aku, ‘Rikas bu so Jerusalem, sabab daya digiti dŭh re an dingah taksi mu pasar Aku.’

¹⁹Aku nam, ‘Tuhan, adŭp ngara puan aku mbŭh di ka barang ramin simayang-Jahudi nakap ka kijera ngara adi sabah di Kaam.

²⁰ Ka di andu saksi Mai Stephen dog siŭ, aku agi gŭh diginŭ nyibandar ayŭh dog siŭ buang ku nguan jipo ngara adi siŭ ayŭh.’

²¹‘Panu meh,’ Tuhan nang di aku, ‘amai Aku re pait kuu jo ka yŭn bara daya adi dŭh bangsa Jahudi.’ ”

²²Bara daya nyiringa Paul minyu, pak kan ayŭh piruah pinganang anŭ, ngara rasu nyirais nang, “Siŭ ayŭh! Dŭh ayŭh patut udip!”

²³Darŭm ngara nyirais, kuting piraka ngara, ka taran dabu tana ka rangit,

²⁴pingibās soldadu daya Rome anŭ mritah daya-i da taban Paul ngga mŭrŭt ka darŭm kuta, ka bada ayŭh dog madŭs siŭn dapŭd ani sabab daya Jahudi nyirais mun anŭ rawan ayŭh.

²⁵Pak kan ngara mbŭh mŭŭng ayŭh yŭn dog madŭs, Paul nang di ndi naan pingubak soldadu adi mijog diginŭ, “Patut kah angān nanyam ukum-adat kijera daya Rome sibayuh bisara?”

²⁶Kan pingubak soldadu anŭ dingah sakanŭ, ayŭh di ka pingibās-i ka siken, “Ani anŭ ndai mai? Daya anŭ daya Rome!”

²⁷Jadi pingibās soldadu anŭ di ka yŭn Paul ka siken ayŭh, “Kidaan di aku, kuu daya Rome kah?” “Yŭh,” Paul nam.

²⁸Pingibās anŭ nang, “Ngga bagŭ kiang duit aku bayar ngga pibŭrŭt adŭp ku jadi daya Rome.” “Pak aku dog biranak daya Rome,” Paul nam.

²⁹Ngara adi re siken ayŭh rasu ngundur; ka pingibās soldadu anŭ mbŭh taru kan ayŭh dingah Paul daya Rome, sabab ayŭh muko muak ayŭh ngga parik basi.

³⁰Pingibās soldadu anŭ an puan tatu-i, ani sabab daya Jahudi nyarah Paul; jadi andu anŭ ndi ayŭh nggen ukum bada parik basi dog kadi so ayŭh, ka pesan pingubak pingubak imam ngga bara Kunsil da tikuruk. Komŭnŭ ayŭh taban Paul ka bada ayŭh mijog di sirung jawin ngara.