Read Biatah Bidayuh PINGANDAI 23 Bible Online

PINGANDAI 23 - Biatah Bidayuh bible

PINGANDAI 23

¹Paul, buang-i tirek bara daya Kunsil, ayŭh nang, “Bara dingan ku daya Israel! Ndŭg andu ati, gibabŭ bisig pikir-kira atin ku pasar munki pimudip ku di sirung jawin Tapa.”

²Ananias, adi Imam Bās, bada ngara adi mijog sindŭk Paul napar ayŭh di baba-i.

³ Paul nang di ayŭh, “Tapa manŭn re napar kaam, kaam adi keya ka sindung adi dog ngu da buda! Kaam guru diginŭ nggen bisara di tunduh aku nunda Ukum-adat, pak adŭp mai dŭh tunda-i darŭm kaam bada ngara napar aku!”

⁴Bara adi sindŭk Paul nang di ayŭh, “Kuu mbŭh pimangŭh Imam Bās Tapa!”

⁵ Paul nam, “Bara dingan ku daya Israel, dŭh aku puan ayŭh Imam Bās. Taŭn sawŭ Surat-kudus nang, ‘Angān dŭh siŭn minyu kinarap daya adi mritah angān.’ ”

⁶ Kan Paul kiris kada so tibaran anŭ mbŭh bara daya Sadducee ka adi bŭkŭn mbŭh bara daya Pharisee, ayŭh nang ngga sirŭŭn bana, “Bara dingan ku daya Israel! Aku ati daya Pharisee, anak daya Pharisee. Aku dog nyarah sabab aku harap daya adi kabŭs re makat udip bauh!”

⁷Kan ayŭh muko nang sakanŭ, bara daya Pharisee ngga bara daya Sadducee rasu bikaii, ka tibaran anŭ pape. (

⁸ Amai daya Sadducee dŭh sabah daya re makat so kabŭs, dŭh gŭh sabah di malaikat bait di roh; pak daya Pharisee sabah di so taruh-i.)

⁹Sirais mbŭh jadi makin bana, ka kada so bara gurū Ukum-adat Jahudi adi so tibaran Pharisee mijog buang bana matah: “Kieh dŭh tungang dapŭd sarah daya ati! Manyah-i roh puan kah malaikat sawŭ ko minyu di ayŭh!”

¹⁰Kan karit ngara mbŭh jadi kaii, pingibās soldadu anŭ, taru te Paul abo da ngara, mritah bara soldadu-i da mūn di ka tibaran anŭ, ka tambit Paul so ngara ka taban ayŭh ka kuta.

¹¹Ngarŭm anŭ Tuhan agi mijog sindŭk Paul ka nang, “Dŭhnyah taru! Kuu muko bisaksi yŭn Ku di Jerusalem, kuu dŭh siŭn dŭh gŭh ndai simŭnŭ di Rome.”

¹²Isan isan andu jawa ndi kada daya Jahudi tikuruk ka bipekat. Ngara bipayu dŭh re man nok ndŭg ka ngara ko siŭ Paul.

¹³Agi rabis so pat puru naan ngara adi mbŭh bipekat an ndai simŭnŭ.

¹⁴Ngara di ka bara pingubak imam ka bara nyamba bangsa Jahudi ka nang, “Kieh mbŭh bipayu dŭh man ndŭg ka kieh ko siŭ Paul.

¹⁵Ngapŭi angān meh samŭn Kunsil pait pinganang ka pingibās soldadu daya Rome bada taban Paul ka yŭn ngan, bada adŭp ngan mun adi re nakit pirasa har-i. Ka kieh bisa tuman ka siŭ ayŭh sibayuh ayŭh ndŭg ti.”

¹⁶Pak anak jurud dayung Paul adi dari agi dingah pasar pekat ngara; ayŭh di ka kuta ka kidaan di Paul.

¹⁷Ka Paul bagan ndi so bara pingubak soldadu ka nang di ayŭh, “Taban dari ati ka yŭn pingibās ngan; agi kayuh an-i kidaan di ayŭh.”

¹⁸Pingubak soldadu anŭ taban ayŭh ka yŭn pingibās soldadu, ka nang, “Paul, adi dog jer, bagan aku ka bada aku taban dari ati ka yŭn mai, sabab agi kayuh an-i nang di kaam.”

¹⁹Pingibās anŭ tambit tangan dari anŭ, ka taban ayŭh ka bŭngŭn, ka siken ayŭh, “Ani anŭ an mu kidaan di aku?”

²⁰Ka ayŭh nang, “Bara Pinguasa Jahudi mbŭh bipekat an mite kaam taban Paul sipagi ka Kunsil, bada-i mun adi re nakit pirasa har-i.

²¹Pak dŭhnyah piduri, sabab agi rabis pat puru naan daya re tuman ayŭh. Ngara mbŭh ndai payu-i, dŭh man nok ndŭg ka ngara ko siŭ ayŭh. Ngara madin mbŭh sidia re ndai simŭnŭ, pak kajŭn pinyinam mai.”

²²Pingibās soldadu anŭ nang, “Dŭhnyah kidaan di tadŭ tadŭ daya kuu agi nggen puan di aku pasar kayuh ati.” Ka ayŭh bada dari anŭ maad.

²³Komŭnŭ pingibās anŭ bagan duwŭh naan pingubak soldadu-i ka nang, “Bada sidia duwŭh ratus naan soldadu, samŭn ju puru naan adi bikuda ka duwŭh ratus naan adi digŭng jarok, ka sidia yŭn re matak ka Caesarea pukor prii sikambŭh.

²⁴Sidia kada kuda bada Paul pakai ka nakit jaga ayŭh di aran ndŭg ka angān mbŭh ndŭg Gabenor Felix.”

²⁵Ka ayŭh nuris surat, sakati:

²⁶“Aku Claudius Lysias, nuris ka tuan Gabenor Felix: Tabi.

²⁷Daya Jahudi agi nakap daya ati ka muko dŭm tadŭ re siŭ ayŭh. Aku dingah ayŭh daya Rome, ka aku di ngga bara soldadu ku ka nyiramat ayŭh.

²⁸An puan ani sarah-i adi bada ngara nyarah ayŭh, aku taban ayŭh ka Kunsil ngara.

²⁹Aku dapŭd mating sarah adi yŭn-i patut dog siŭ bait dog na darŭm jer. Kayuh adi bada ngara nyarah ayŭh batur-i pasar ukum-adat adŭp ngara.

³⁰Ka kan aku dog nggen puan pasar pekat ngara adi re tuman ayŭh, aku rasu ndai pikir ku an pait ayŭh ka kaam, buang pesan ngara adi nyarah ayŭh da ngadu ayŭh di sirung jawin mai.”

³¹Jadi bara soldadu, ndai nimun adi dog kidaan, tambit Paul ka taban ayŭh ngarŭm anŭ ka Antipatris.

³²Andu anŭ ndi bara soldadu adi panu kaja pari ka kuta, tandah ngara adi nunggang kuda pijuu pimanu ngara ayō Paul.

³³Ngara taban ayŭh ka Caesarea, jugan surat anŭ ka gabenor, ka nyerah Paul ka ayŭh.

³⁴Gabenor basa surat anŭ ka siken Paul so utung rais aki ndi ayŭh. Kan ayŭh dingah Paul so tarun tana Cilicia,

³⁵ayŭh nang, “Aku re pirasa har mu kan ngara adi nyarah kuu mbŭh mandŭg.” Komŭnŭ ayŭh nggen ukum bada Paul dog jaga darŭm istana anŭ.