Read Biatah Bidayuh PINGANDAI 24 Bible Online

PINGANDAI 24 - Biatah Bidayuh bible

PINGANDAI 24

¹Rimŭh andu ripas anŭ, Ananias adi Imam Bās di ka Caesarea ngga bara nyamba bangsa Jahudi samŭn ndi naan daya adi digŭng ukum-adat dŭn Tertullus. Ngara bidapŭd ngga Gabenor Felix, ka ngadu Paul di ayŭh.

²Ka kan Paul dog bagan da mŭrŭt, Tertullus rasu minyu nyarah ayŭh sakati: “Tuan Gabenor! So ka pinyibijak mai darŭm kaam digŭng rais ami kieh mbŭh tui kinyam damai, ka bagŭ kayuh bauh mbŭh mai ndai ngga pimaju rais ami ati.

³Kayuh adi mun anŭ inŭh adi kieh raan, adi kieh trima ngga sanang asŭng di barang yŭn ka di barang nga-i; kieh nggen bagŭ trima kaseh di kaam.

⁴Aku dŭh an kubo masā mai, jadi aku mite kaam dingah kayuh adi kieh kidaan.

⁵Kieh mbŭh dapŭd daya ati raru arap-i, ndai pito di dupan daya Jahudi di barang yŭn-i buang-i mbŭh pinguru tibaran daya Nazareth.

⁶Ayŭh gŭh mbŭh suba an nyembar Ramin Tuhan, ka kieh nakap ayŭh. [Kieh suba an bada ayŭh dog bisara pakai ukum-adat adŭp ami,

⁷pak Lysias, pingibās soldadu mandŭg, ka ngga kasar ayŭh tambit Paul so kieh.

⁸Komŭnŭ Lysias nggen ukum bada bara adi nyarah ayŭh bidapŭd ngga kaam.][38] Kambŭi kaam siken daya ati, kaam tungang dapŭd so adŭp-i sopŭrŭg kayuh adi bada kieh nyarah ayŭh.”

⁹Daya Jahudi sua gŭh nyarah ayŭh buang nang sopŭrŭg kayuh anŭ sawŭ.

¹⁰Gabenor pakat tangan-i bada Paul minyu, ka Paul nang, “Aku puan kaam mbŭh bisawa sawa jadi akim yŭn bangsa ami ati, ngapŭi ngga sanang asŭng aku minyu nyibandar adŭp ku di sirung jawin mai.

¹¹Adŭp mai bisa puan, gibayuh tungang simŭng-duwŭh andu adi mbŭh ripas aku di ka Jerusalem an simayang.

¹²Mating daya Jahudi kiris aku bikarit ngga tadŭ daya di Ramin Tuhan, puan kah kiris aku nguga daya, bait-i di ramin simayang-Jahudi puan kah di tadŭ yŭn-i darŭm kupo.

¹³Dŭh gŭh ngara re tungang nang kayuh adi ngara nang ngga nyarah aku sawŭ.

¹⁴Ati, aku ngaku di sirung jawin mai: Aku nyambah Tapa tayung-babuk ami tunda Aran adi ngara nang sarah. Pak aku sabah di sopŭrŭg kayuh adi dog nuris darŭm Ukum-adat Moses samŭn di surat surat bara nabi.

¹⁵Aku biyŭn pingarap di Tapa nimun adŭp ngara gŭh, nang sopŭrŭg daya, adi kana ngga adi arap, re makat so kabŭs.

¹⁶Jadi meh situngang tungang aku ngatur pimudip ku isa pikir-kira atin ku bisig di jawin Tapa ngga manusia.

¹⁷ “Ripas ko bu so Jerusalem kudu kudu sawa, aku pari kamanŭ taban sidakah ka bara daya adŭp ku buang di jugan sadis ka Tapa.

¹⁸Darŭm aku ndai simŭnŭ, ngara dapŭd aku di Ramin Tuhan ripas aku ko ngamas adat pibisig di adŭp ku. Nganŭ mating bara daya ayō ku, ka mating gŭh pito.

¹⁹Pak kada daya Jahudi so tarun tana Asia agi diginŭ; adŭp ngara inŭh patut bidapŭd ngga kaam kambŭi agi kayuh an ngara nang ngga nyarah aku.

²⁰Kambŭi dŭh, isa adŭp ngara ati kidaan sarah ku adi ko ngara dapŭd di andu aku mijog di sirung jawin Kunsil;

²¹ adŭ-i ndi kan aku nang ngga sirŭŭn bana kan aku mijog di sirung jawin ngara: ‘Aku dog bada bisara andu ati amai aku sabah daya adi mbŭh kabŭs re makat udip bauh.’ ”

²²Jadi Felix, adi taŭn ko dingah pasar Aran ati, bada bara kajŭn. Ayŭh nang di bara, “Kan Lysias adi pingibās soldadu mandŭg, aku re matŭd bisara ngan.”

²³Ayŭh bada pingubak soldadu nakit jaga Paul, pak dŭh bana kurung ayŭh bait nagah dingan-i mandŭg di sita ayŭh.

²⁴Ripas kudu kudu andu, Felix agi mandŭg ngga sawŭn-i Drusilla, adi daya Jahudi. Ayŭh bagan Paul ka komŭnŭ nyiringa Paul minyu pasar pinyabah di Kristus Jesus.

²⁵Pak kan Paul minyu pasar pinŭnggŭn, pasar jaga adŭp so pinyiripong adi sarah, ka pasar ukum di Andu Sikasŭn, Felix mbŭh taru ka nang, “Kuu bisa bu madin. Aku re bagan kuu dinge kan aku paya.”

²⁶Ayŭh agi gŭh darŭm asŭng-i harap Paul an nggen duit di adŭp-i, ngapŭi ayŭh siraru bagan Paul ka minyu kirakar ngga ayŭh.

²⁷Pak kan duwŭh sawa mbŭh ripuan, Porcius Festus gati Felix jadi gabenor. Ngga ndai kana di batŭh daya Jahudi, Felix tingge Paul darŭm jer.